ހުޅަނގު މޫސުމުގެ ވިއްސާރައަށް ފަހު މަސްވެރިކަމާއި އެންވެރިކަން މަޑު މަޑުން ރަނގަޅުވަމުން އަންނަތާ ދެމަސް ވަރު ވެއްޖެއެވެ. މަސްވެރިކަމާއި އެންވެރިކަން ދަށްވުމުގެ ސަބަބުން މަހަށް ނުނިކުމެ ތިބި އޮޑިތައްވެސް މަހަށް ނިކުމެ، މިދިޔަ ހަތަރު ހަފްތާއެއް ހާދުވަހު ރަނގަޅަށް މަސް ބޭނި އެވެ. މަސްވެރިކަން ރަނގަޅު ސަރަހައްދުތައް ބަލައި، އޮޑިތައް އަދިވެސް އެ ނިސްބަތްވާ ސަރަހައްދުތައް ނޫން އެހެން ސަރަހައްދުތަކަށް ދުއްވަން ޖެހުން މިއީ ބޮޑު ޚަރަދެއް ދާކަމެކެވެ. އެހެންނަމަވެސް، މާޔޫސްކަން ދުއްވާލާ އާ ހިތްވަރަކާއެކު މަހަށް ނިކުމެ، މިފްކޯގެ ފެސިލިޓީސްތަކަށް ދަނީ މަސްކިރަމުންނެވެ. މިފްކޯގެ މިދިޔަ ހަތަރު ހަފްތާގެ މަސް ކިރުވި ރިޕޯޓްތަކަށް ބަލާލުމުން އެ ހެޔޮ ބަދަލު ފެންނާނެއެވެ.
އެހެންނަމަވެސް ހިތާމައަކީ، އެތައް ފައިސާއެއް އޮޑިއާއި، ފަޅުވެރިންގެ އެކި ކަންކަމަށް ޚަރަދުކޮށް، ދަރަންޏަށް ތެލާއި އައިސް އަޅައިގެން މަހަށް ނިކުމެ، ކިރާ މަހަށް މިފްކޯއިން އެކަށީގެންވާ މުއްދަތެއްގައި ފައިސާ ނުދައްކާ މައްސަލައެވެ. އެކަމަކާހެދި ޚަރަދު ނުޗަލައިގެން މިހާރު އޮޑިތައް ތިބީ އަނެއްކާވެސް އެހެލާ ހިސާބުގަ އެވެ. މިފްކޯއިން ފައިސާ ނުދޭތީ، މިފްކޯއަށް މަސްކިރާ ގިނަ އޮޑިތައް މިހާރު ތިބީ، ފަޅުވެރިންނަށް ކޮއްތު ހަމަޖެއްސޭނެ ގޮތެއް ނެތިގެން މަހަށް ނުފުރިފަ އެވެ.
”ހުވަދު އަތޮޅާއި އައްޑޫ އަތޮޅުގައި އަދިވެސް މަސްވެރިކަން ދަށް. ދެކުނުން މަހަށް ފުރާ އޮޑީގެ އަދަދުއަސްލު މަހަށް ނުފުރަނީ މިފްކޯއިން މިހަދާ އެއްޗަކުން ދެކޮޅު ނުޖެހިގެން. ކުރިން ވެއްޖިއްޔާ އޮޑިން ލިބޭ އެއްޗަކުން ނުވީމަ އޮޑި މީހާ ކޮންމެވެސް ގޮތެއް ހަމަޖައްސާނެ. މިހާރު ކުރާނެކަމެއް ދެންނެތް. ކަންތައް މިވާގޮތުން އޮޑިވެރިންވެސް މިދިޔަ 3 މަހެއްހާ ދުވަހު ފުނޑިއްޖެ. ފަޅުވެރިންނަށް ކޮއްތު އެރުވޭނެ ގޮތެއް ނެތީމައި މަޑުކޮށްލައިގެން މިތިބީ މިފްކޯއިން ފައިސާކޮޅު ލިބެންދެން“ ކެޔޮޅަކު ބުންޏެވެ.
ކެޔޮޅުން ބުނީ، މަސްވެރިކަން އެންމެ ދަށްވި ދުވަސްވަރާއި ދިމާކޮށް މިފްކޯއިން މަަސްގަންނަ އަގު ދަށްކުރުމަށްފަހު، ކިރާ މަހަށް ފައިސާ ދިނުމުގައި ލަސްވަމުންދާތީ އެއްގޮތަކަށްވެސް މިހާރު ދެކޮޅު ޖެއްސެން ނެތްކަމަށެވެ. މިހާރު ”ބެކް ލޮގް“ ގައި މިފްކޯގެ ބިލެއް ނެތިއްޔާ ތެޔޮވެސް ދޫނުކުރާ ކަމަށެވެ. އެހެންކަމުން، އެތައް ދުވަހެއް ކޮށްފައި ފައިސާ އޮޑިފަހަރަށް ދޫކުރާއިރު، އެ ނަގާފައި ހުންނަ އައިހާއި، ތެލަށް ކަނޑާފައި ފައިސާ ދިނުމުން ކޮޅެއްގައި ނުޖެހޭ ކަމަށެވެ.
”ޢެވްރެޖްކޮށް ދަތުރަކަށް ފަށާނީ 15 ފީފާ ތެޔޮ ބަރުކޮށްގެން. އަދި ކޮބާ ކޮންމެ ދަތުރަކަށް ދާ އައިސް؟ ފަޅުވެރިންގެ ކޮއްތު؟ އޮޑީގެ މެއިންޓެނަންސް.ޖުމްލަކޮށް ބަލާނަމަ މަސް ދަތުރެއްގައި ދުވާލެއްގެ މައްޗަށް 10،000 ރުފިޔާއަށްވުރެ ޚަރަދުަު ބޮޑުވާނެ. އެހެންވީމައި މިހާރު ބާނާ މަސްކޮޅަށް ފައިސާ ނުލިބޭތީ ދަންތުރައެއްގައި ޖެހިފައި މިތިބެނީ. ތެލާއި އައިސް ކްރެޑިޓަށް ލިބުނަސް، ފަޅުވެރިން ބަނޑުފުރާނަ މުއްތިކޮށްގެންތާ ދަތުރުވެސް ކުރެވޭނީ.؟“.ކެޔޮޅަކު ބުންޏެވެ.
ކެޔޮޅުން ބުނީ، މިފްކޯއިން އެ ބުނާ މުއްދަތެއްގައި ފައިސާ ނުދެއްކޭނަމަ، މިފްކޯގެ ފެސިލިޓީތަކުން މިހާރު އޮޑިފަހަރަށް ކޮއްތު ކްރެޑިޓަށް ދޫކުރެވޭނެ ނިޒާމުވެސް ހަމަޖައްސައިދޭން ޖެހޭ ހިސާބަށް ކަންތައް ހިނގައްޖެ ކަމަށެވެ.
”ދެހަފްތާއިން ދެހަފްތާއިން ދޭން އެންމެ ފަހުން ބުނީ. އެކަމެއްވެސް ނުވި. އެހެންވީމައި ބަރާބަރަށް ލާރި ނުދެވެންޏާ ތެޔޮވެސް، އައިސްވެސް، ކޮއްތުވެސް ”ބެކްލޮގް“ އިން ކަނޑާގޮތަށް ހަމަޖައްސައިދީ. އެސްޓީއޯގެ ފިހާރަތަކުން އަހަރުމެންނަށް ކޮއްތު ކްރެޑިޓަށް ދޫކުރާގޮތްވެސް ހަމަޖައްސައިދޭންވީ ފައިސާ ބަރާބަރަށް ނުދެއްކެންޏާ.ކޮންމެ ފަހަރަކު މުޒާހަރާއެއް ކޮށްގެން ނޫނީ އެއްކަމެއްވެސް ވާކަމަކަށް ނުވޭ.“ ކެޔޮޅަކު ބުންޏެވެ.
މިފްކޯއިން 24 އޯގަސްޓުން ފެށިގެން އޮޑިފަހަރުން ކިރުވި މަހަށް ވާ ފައިސާ ނުދައްކަ އެވެ. އޯގަސްޓް24 އިން ސްޕެޓްމްބަރު 6 އަށް(ދެ ހަފުތާ) ގެ ބިލު އޮތީ ޕެންޑިންގ ގަ އެވެ. ފައިސާ ދެވޭނެ ދުވަހެއް މިފްކޯއަށް ވެސް ބުނެދޭކަށް ނޭގުނެވެ. މިއީ، މަސްވެރިކަން ރަނގަޅުވެ ގިނަ ދުވަސްތަކަކަށްފަހު ގިނަ ދޯނިތަކެއް މަސް ކިރި ދެހަފްތާ އެވެ. މިހާރު މިހިނގަނީ އޯގަސްޓް 7 އިން ފެށިގެން އިއްޔެ އާ ހަމަޔަށް 10 ދުވަސް ވީ އެވެ. އަނެއް ދެ ހަފުތާވެސް ހަމަވާން ގާތްވަނީ އެވެ.
ކެޔޮޅުން ބުނަނީ މިފްކޯއިން ބުނާ އަގަކަށް އެއްބަސްވެގެން މަސް ކިރަނީ ކަމަށެވެ. މިހާރު މަސް ކިލޯއެއް 16ރުފިޔާއަށް މިފްކޯއިން ގަންނަމުން އަންނައިރު އަނެއްކާވެސް މަސް ގަންނަ އަގު މިފްކޯއިން ދަށްކުރަން އުޅޭކަމުގެ ޚަބަރު ލިބެމުން އަންނަކަމަށް ކެޔޮޅުން ބުންޏެވެ. ކެޔޮޅުން ބުނަނީ ކޮންމެ އަގެއްގައި މަސް ގަތް ނަމަވެސް، އެ ގެންނަ މަހަށް މިފްކޯއިން ފައިސާދޭނަމަ ”އޯކޭ“ ކަމަށެވެ.
”16 ރުފިޔާއަށް އަގު ތިރިކުރި އިރު ބުނި އެ އަގަށް ވިއްކީމައި ފައިސާ ދައްކަން ފަސޭހަވާނެކަމަށް. މިފްކޯއަށް ދެކޮޅު ނުޖެހެންޏާ މަސް ނުގަންނަން ވީނު؟ އަހަރުން އަތުން ގަތް މަސްކޮޅަށް ވާ ފައިސާ ދޭށޭ ބުނެ މި އާދޭސް މި ކުރަނީ. މިފްކޯއިން މިހަދަ އެއްޗަކުން ހާލުގައި ޖެހި މިއިން ޒަމާނެއްގައި ހާލުގައި ނުޖެހޭ ވަރަށް މަސްވެރިން މި ތިބީ ހާލުގައި ޖެހިފައި. އަނގަޔާ އަތާ ދިމާ ނުވޭ ގޮތަކަށް ބުނަންޏާ.ގައިމު އަހަރުން އަތުން ގަންނަ މަހުން އެމީހުން ވިޔަފާރި އެބަކުރޭ. އަހަރުމެންނަށް ފައިސާ ނުދެންޏާ އެމަހަށް ހަދާ ގޮތެއްވެސް އެބަ އިނގެންޖެހޭ. އެއީ ޕްރޮސެސް ކުރިޔަސް އެކްސްޕޯޓް ކުރިޔަސް.“ ކެޔޮޅަކު ބުންޏެވެ.
މިފްކޯއިން ފައިސާ ނުދައްކާތީއާއި، މެދު ރާއްޖެތެރޭގައި މިދުވަސްކޮޅު މަސްވެރިކަން ރަނގަޅުކަމުން އެތައް ތެލެއް އަންދާފައި ދެކުނުގެ ބައެއް އޮޑި ފަހަރުވެސް މިހާރު ދަނީ ލ އަތޮޅު ގައި ހުންނަ ހޮރައިޒަން އަށެވެ. އެއީ، ހޮރައިޒަން އިން ރަނގަޅު އަގުގައި މަސް ގަންނާތީ އެވެ. ހޮރައިޒަން އިން ގަންނަނީ 18 ރުފިޔާ އަށެވެ.
“ ހޮރައިޒަން އިން ގަންނަނީ، 18 އަށް. އެކަމު ބިލު ހަދަނީ 16 ރުފިޔާގެ ރޭޓުން. ބާކީ2 ރުފިޔާ އަށް ވާ ފައިސާ މި ދެނީ ކޭޝްއިން. އެހެންވީމައި އޭތިކޮޅުން އެބަ ފަޅުވެރިންގެ ކޮއްތު އެބަ ހަމަޖައްސާލެވޭ. ގާސިމްމެން ސަރުކާރާއި ގުޅިގެން އަގަށް މި ބަދަލު މިގެނައީ އަޑިގައި ތިބެގެން. މިއީ ވެސް މި މީހުން ޖައްސާ ގޭމެއް.“ ކެޔޮޅަކު ބުންޏެވެ.
ކޮންމެޔަކަސް ކެޔޮޅުން އެދެނީ އެމީހުން ކުރި މަސައްކަތުގެ އުޖޫރަ އަވަހަށް ދިނުމަށެވެ. ކެޔޮޅުން ބޭނުންވަނީ، ފަޅުވެރިންގެ ކޮއްތު ހަމަޖައްސައިގެން މަހަށް ފުރުމަށެވެ. މިފްކޯއިން ލާރި ނުދިނީމައި ފަޅުވެރިންވެސް ފައިބާތީ ކެޔޮޅުންނަށްވެސް އޮޑިވެރިންނަށްވެސް މިހާރު ވަރަށް ދައްޗެވެ. ހުރިހައި ކެޔޮޅުންގެވެސް ކަންބޮޑުވުމަކީ މިފްކޯއިން ފައިސާ ދިނުން ލަސްވުމެވެ.