ރާއްޖޭގެ ކަނޑުގެ ހާއްސަ އިގުތިސާދީ ސަރަހައްދުގައި މަސްވެރިކަން ކުރަމުން ދިޔަ ދިވެހި މަސްދޯނިތަކަށް އިންޑިއާ ސިފައިން ހަތިޔާރާއެކު އެރި މައްސަލައިގައި އިންޑިއާއިން އެކަމަށް ޖަވާބު ނުދެނީސް އިންޑިއާގެ މަނަވަރެއް ރާއްޖެ އަތުވެއްޖެއެވެ.
ރާއްޖޭގެ ކަމާގުޅޭ އެއްވެސް އިދާރާއަކާ ކޯޑިނޭޓް ކުރުމެއް ނެތި އިންޑިއާ ކަނޑުގެ ސިފައިން ބައިނަލްއަގުވާމީ ކަނޑުގެ ގާނޫނުތަކާއި އުސޫލުތަކާ ހިލާފަށް ދިވެހި ތިން މަސްދޯންޏަކަށް އެރި މައްސަލަ ހޫނުވެ، އިންޑިއާ ސިފައިން ހިންގި އެ އޮޕަރޭޝަންގެ ތަފްސީލު ހޯދުމަށް ފޮރިން މިނިސްޓްރީ މެދުވެރިކޮށް އިންޑިއާ ސަރުކާރުގައި އެދުނެވެ. އެހެންނަމަވެސް މިހާތަނަށް އެއަށް ޖަވާބެއް ލިބުނުކަމެއް ސަރުކާރުންނާއި ޑިފެންސް މިނިސްޓްރީން ހާމަކޮށްފައެވެ ނުވެއެވެ.
އިންޑިއާއިން ޖަވާބެއް ނުދެނީސް އިއްޔެ އިންޑިއާގެ ކޯސްޓްގާޑު އުޅަނދު ސަމާރްތް އާއި އަބީނާވް ގެ އިތުރުން ކޯސްޓްޑުގެ ހެލިކޮޕްޓަރަކާއި ޑޯނިއާ މަތިންދާ ބޯޓެއް ރާއްޖެ އައިސްފައިވާ ކަމަށް އިންޑިއާ ކޯސްޓްގާޑުން ބުނެފައިވެއެވެ. އެމްއެންޑީއެފުން ބުނާގޮތުގައި މި އަުޅަނދުތައް ރާއްޖެ އައީ، ތަމްރީނު ތަކަކަށެވެ. މި ތަމްރީނުތަކަކީ ރާއްޖެއާ އިންޑިއާ އަދި ސްރީލަންކާގެ ދެމެދުގައި އޮންނަ އަސްކަރީ ގުޅުން އިތުރުށް ހަރުދަނާ ކުރުމާއި ކަނޑުމަތީގައި ދިމާވާ ހާދިސާތަކުގައި ތިން ގައުމު ގުޅިގެން ހަރަކާތްތެރިވާނެ ގޮތްތައް ދަސްކުރުމުގެ މަގްސަދުގައި ބާއްވާ ތަމްރީނުތަކެކެވެ.
މީގެ އިތުރުން އިންޑިއާގެ ކޯސްޓްގާޑުގެ އެޑިޝަނަލް ޑިރެކްޓަރ ޖެނެރަލް އެސް ޕަރަމޭޝް ވެސް އިއްޔެވަނީ މި ތަމްރީނުގައި ބައިވެރިވަޑައިގަތުމަށް ރާއްޖެ ވަޑައިގެންފަ އެވެ. ޕަރަމޭޝް ރާއްޖެ ވަޑައިގަތުމުން ވެލާނާ އިންޓަނޭޝަނަލް އެއާޕޯޓުން އޭނާއަށް މަރުހަބާ ވިދާޅުވީ އެމްއެންޑީއެފް ކޯސްޓްގާޑުގެ ކޮމަޑާންޓް ކާނަލް މުހައްމަދު ސަލީމެވެ.
މަސްވެރިން ބުނީ އިންޑިއާ ސިފައިން ދިވެހި މަސްދޯންޏަށް އެރި މައްސަލަ ވަކި ކޮޅެއްގައި ނުޖެހެނީސް އިންޑިއާ ކޯސްޓްގާޑް ވެރިންނަށް ރާއްޖެއިން މަރުހަބާ ކިޔައި އަދި އިންޑިއާ ކޯސްޓްގާޑްގެ އުޅަނދުތައް ރާއްޖޭގެ ކަނޑުގެ ސަރަހައްދަށް ވަނުމުގެ ހުއްދަ ދިން ދިނުން ބަލައި ނުގަނެވޭނެކަމަށެވެ.
“ މިއޮތްހާ ދުވަހު ބުނީ އިންޑިއާ ސިފައިން މަސްދޯނިތަކަށް އެރީ ހުއްދަ ނެތިއޭ. އެކަން ވީގޮތެއް ނޭގެނީސް އިއްޔެ އިންޑިއާ މަނަވަރު ރާއްޖެ ގެނައިމާ އަހަރުމެންނަށް ލިބެނީ ނުތަނަވަސްކަމެއް. ގައިމު މިފަހަރު އެމްއެންޑީއެފުން ހުއްދަ ދީގެން އެވަނީ. އަސްލު ބުނަންޏާ އެކަން ބަލައިގަންނަން ވަރަށް ދަތި.“ މަސްވެރިއަކު ބުންޏެވެ.
އެހެން މަސްވެރިއަކު ބުނީ ދިވެހިން ބިރުވެރިކަމެއްގެ ތެރެއަށް ވައްޓާލި ބަޔަކު ރާއްޖެއަށް އެމްއެންޑީއެފުން ގެނައިމާ ވަރަށް ކަމުނުދާކަމަށެވެ.
”ދޯންޏަށް އެރި ވީޑިއޯ ބަލާލި ބަޔަކަށް ރަނގަޅަށް އިނގޭނެ އެ ދޯނިތަކުގެ މީހުން ތިބި ހާލަތު. އެ ވާހަކަ ކިޔާދޭއިރުވެސް ގައިން އެބަ ހީބިހި ނަގާ. އަސްލު ވީނުވީއެއް ނޭނގެނީސް އިންޑިއާ ސިފައިން ގެނައުން ބަލައިނުގަނެވޭނެ. މިއިން އިނގެނީ އަސްލު މަސްވެރިންނަށް ދިމާވި އެހާދިސާއަށް މާބޮޑު ސަމާލުކަމެއް ނުދޭކަން. އިންޑިއާ ހަމަ އައުޓް.“ މަސްވެރިއަކު ބުންޏެވެ.
ހއ. ދިއްދޫގެ އިރުއުތުރުން 72 ނޯޓިކަލް މޭލު ބޭރުން، ރާއްޖޭގެ ހާއްސަ އިގްތިސާދީ ސަރަަހައްދުގެ ތެރޭގައި މަސްވެރިކަން ކުރަމުންދިޔަ، އދ. މަހިބަދޫ ’އަސުރުމާ 3‘ ނަމަކަށް ކިޔާ ބޯޓަކަށް އިންޑިއާ ކަނޑުގެ ސިފައިން ހަތިޔާރާ އެކު އެރި ކަމުގެ ރިޕޯޓު އެ ދޯނިން ކުރި އެވެ. އޭގެ ފަހުން ’މޮހޮރާ 3‘ އަދި ’ނިރު 7‘ ނަމަކަށް ކިޔާ ދެ ދޯންޏަކަށް ވެސް އިންޑިއާ ސިފައިން އެރި މައްސަލަ ފެންމަތިވި އެވެ.
މަސްބޯޓުތަކަށް އިންޑިއާ ސިފައިން އެރި މައްސަލައިގައި ޑިފެންސް މިނިސްޓްރީން ބުނީ ރާއްޖޭގެ މަސްދޯނިތަކަށް އަރާފައިވަނީ އިންޑިއާ ކޯސްޓްގާޑް ޝިޕް 246 އަދި އިންޑިއާ ކޯސްޓްގާޑް ޝިޕް 253 އަށް ނިސްބަތްވާ ބޯޑިން ޓީމްތަކުންކަން ކަށަވަރު ކުރެވިފައިވާ ކަމަށެވެ.
މިއޮޕަރޭޝަން ހިގައި ދިޔަގޮތެއް އެއްވެސް ގޮތެއް އަދި ސާފެއް ނުވިއެވެ. ފޮރިން މިނިސްޓްރީން ފޮނުވި ސިޓީގެ ޖަވާބު ލިބުނުކަމެއް ވެސް ނޭނގެއެވެ. އަންގާރަދުވަހު ފިޝަރީޒް މިނިސްޓަރ އަހްމަދު ޝިޔާމް ރައްޔިތުންގެ މަޖިލީހަށް ހާޒިރު ކޮށް މެންބަރަކު މިކަމާއި ސުވާލެއް ކުރެއްވުމުން މިނިސްޓަރ ވަނީ އެކަން އަދި ސާފުކޮށް އެނގި ނުލައްވާކަމަށް ވިދާޅުވެފަ އެވެ. އަދި ކަމާއި ގުޅޭ އިދާރާތަކުން އެކަން ސާފުކުރެއްވުމަށްފަހު ތަފުސީލު ހާމަކުރައްވާނެކަމަށް ވިދާޅުވިއެވެ.
މި މައްސަލައިގައި ޑިފެންސް މިނިސްޓަރ ޣައްސާން މައުމޫން މަޖިލިސް ތަޅުމަށް ހާޒިރުކޮށް ސުވާލުކުރަން ވެސް މެންބަރަކު ވަނީ ހުށަހަޅުއްވާފަ އެވެ. އަދި ބުދަ ދުވަހު ޣައްސާން މަޖިލީހުގެ ގައުމީ ސަލާމަތާއި ބެހޭ ކޮމިޓީއަށް ހާޒިރު ކުރި ބައްދަލުވުންކުރިޔަށް ދިޔައީ ސިއްރުކޮށްގެންނެވެ. 241 ކޮމިޓީއަށް މި މައްސަލައިގައި ޑިފެންސް މިނިސްޓްރީން ސިޓީއެއް ފޮނުވި އެވެ. އެހެންނަމަވެސް ކޮމިޓީން ނިންމީ އެ ސިޓީއާއި އެ ބައްދަލުވުން ސިއްރުކުރުމަށެވެ. އެހެންކަމުން މިމައްސަލަ އަދި އޮތީ ”ވާނުވާ“ ގައެވެ.