ރާއްޖޭގެ މެރިޓައިމް ދާއިރާއިން އިންގިލާބީ ބަދަލެއް ގެނައުމަށްޓަކައި ކުރެވޭ މަސައްކަތުގެ ދަށުން ފުރަތަމަ ފަހަރަށް ރާއްޖޭގައި ބަންކަރިންގެ ޚިދުމަތް ފަށަން ތައްޔާރުވެއްޖެއެވެ.
މި ޚިދުމަތް ދެނީ، ސްޓޭޓް ޓްރޭޑިން އޯގަނައިޒޭޝަން(އެސްޓީއޯ) އަދި މޯލްޑިވްސް ޕޯޓްސް ލިމިޓެޑް(އެމްޕީއެލް) ގުޅިގެންނެވެ. އެސްޓީއޯއިން ވޯރުކޮށްދޭނީ، އޮފްޝޯ ބަންކަރިންގެ ޚިދުމަތެވެ. އެއީ، ތެޔޮ ވިއްކުމެވެ. އެމްޕީއެލްއިންކުރާނީ، އެ ޚިދުމަތް ލިބިގަންނަ ކަސްޓަމަރުންނަށް ނުވަތަ ޚިދުމަތް ހޯދާ އުޅަނދަށް ބޭނުންވާ މެރިޓައިމް ޚިދުމަތްތައް ފޯރުކޮށްދިނުމެވެ.
އެސްޓީއޯއިން މިކަމަށް ވަމުންދާ ތައްޔާރީތަކަށް ބަލާއިރު އެކުންފުނިން ވަނީ، 13 މާރިޗު 2024ގައި ހަކަތައިގެ ވިޔަފާރިކުރާ ދުނިޔޭގެ އެންމެ ބޮޑު އަމިއްލަ ކުންފުނި، ވިޓޯލްއާ އެކު އެމްއޯޔޫއެއްގައި ސޮއިކޮށްފަ އެވެ. އަދި، ދުނިޔޭގެ އެކި ސަރަޙައްދުތަކުގައި ބޯޓުފަހަރަށް ތެޔޮ ފޯރުކޮށްދިނުމުގެ ޚިދުމަތް ފުޅާ ދާއިރާއެއްގައި ދެމުން އަންނަ ވިޓޯލް ބަންކާސްގެ މެޕުގައި ދިވެހިރާއްޖެ މިހާރު ވަނީ ހިމަނާފަ އެވެ.
އިހަވަންދިއްޕޮޅުގައި، އޮފްޝޯ ބަންކަރިންގެ ޚިދުމަތް ފެށުމަށްޓަކައި އެސްޓީއޯއިން ވަނީ ގާތްގަނޑަކަށް 4000 ޓަނުގެ ތެޔޮ އުފުލޭ ދެބޯޓު ގެނެސްފަ އެވެ. މީގެ ތެރެއިން ފުރަތަމަ ބޯޓު ”މެރިން އެންޖެލް“ މި މަހުގެ 09 ވަނަ ދުވަހު ވަނީ ކުޅުދުއްފުށީގައި ބަނދަރުކޮށްފަ އެވެ. އަދި. ދެވަނަ ބޯޓް ކަމަށްވާ ”މެރިން ބެއްލާ“ ކުޅުދުއްފުށީގައި މިމަހުގެ 13 ވަނަ ދުވަހު ވަނަީ ބަނދަރުކޮށްފަ އެވެ. އެސްޓީއޯއިން ބުނީ، ފުރަތަމަ އިންޓަނޭޝަނަލް ބަންކަރިންގެ ޚިދުމަތުގެ ދަށުން ފުރަތަމަ ފަށާނީ ފްލޯޓިން ބަންކަރިންގެ ޚިދުމަތްކަމަށެވެ. އޭގެ މާނައަކީ ކަނޑުގައި އުޅަނދު ބާއްވައިގެން ތެޔޮ އަޅައިދިނުމެވެ.
ބަންކަރިންގެ ޚިދުމަތް ފެށުމަށްޓަކައި އެމްޕީއެލްއިން ވަނީ ޓަގު ބޯޓާއި، ޕައިލެޓު ބޯޓު އިހަވަންދިއްޕޮޅަށް ގެންގޮސްފަ އެވެ. އަދި އިންޓަނޭޝަނަލް ބަންކަރިންގެ ޚިދުމަތް ދިމުގައި ހުންނަންޖެހޭ ޝަރުތު ކަމަށްވާ، އިންޓަނޭޝަނަލް ޝިޕް އެންޑު ޕޯޓު ސެކިއުރިޓީ ގޭޓު (އައިއެސްޕީއެސް” ގޭޓު) ވެސް ގާއިމް ކޮށް ނިމި، ބަންކަރިންގ ޚިދުމަތް ފެށުމަށް ވާންޖެހޭ ހުރިހާ ތައްޔާރީތަކެއް ނިމިފައިވާކަމަށް އެމްޕީއެލްއިން ބުނެފައި ވެއެވެ. އެގޮތުން، އެތަނަށް ބޭނުންވާ މުވައްޒަފުން ނަގައި އިދާރީ ހުރިހައި ކަމެއްވެސް ވަނީ ފުރިހަމަކޮށްފަ އެވެ. އެތަނުގައި މޯލްޑިވްސް ނެޝަނަލް ޑިފެންސް ފޯރސް(އެމްއެންޑީއެފް) އާއި އިމިގްރޭޝަނާއި، ކަސްޓަމްސްއާއި ޕޯޓްސް ހެލްތުގެ މުވައްޒަފުން ހަރަކާތްތެރިވާނެކަމަށް އެމްޕީއެލްއިން ބުނެފައި ވެއެވެ.
ރާއްޖޭގެ އުތުރުގައި މިފެށޭ ބަންކަރިންގ ޚިދުމަތާއި އެކު އެސަރަޙައްދުން ފޯރު ކޮށްދިނުމަށް ތައްޔާރު ވެފައިވާ މެރިޓައިމް ދާއިރާގެ އެހެނިހެން ޚިދުމަތްތައް ސާފު ވާނޭ ހެން އެމްޕީއެލްއިން ވަނީ، އެކަމަށް ޚާއްސަ ވެބުސައިޓެއް ވެސް ތައްޔާރު ކޮށްފައެވެ. އެއީ ums.mv / އުތުރު މެރިޓައިމް ސާވިސަސް އެވެ. މިހާރު ވަނީ ކަމާގުޅޭ ހުރިހައި މައުލޫމާތެއް އެ ވެބްސައިޓަށް އަޕްލޯޑްކޮށްފަ އެވެ.
ބަންކަރިންގ ޚިދުމަތާއި އެކު އިންޓަރނޭޝަނަލް ކަސްޓަމަރުންނަށް، އިތުރު 14 ޚިދުމަތްތަކެއް ކަސްޓަމަރުން ބޭނުންވެއްޖެ ހިނދެއްގައި ފޯރުކޮށްދޭންވެސް އެމްޕީއެލްއިން ވަނީ ތައްޔާރުވެފަ އެވެ. އެ ޚިދުމަތް ދިނުމަށް 24 ގަޑިއިރު ޖަވާބުދާރީވާނެ ކޯލްސެންޓަރެއްވެސް ވަނީ ގާއިމުކޮށްފަ އެވެ.
އެމްޕީއެލްއިން އިންޓަނޭޝަނަލް ބޯޓްތަކަށް ފޯރުކޮށްދޭ ޚިދުމަތްތަކުގެ ތެރޭގައި ޕައިލެޓް ޚިދުމަތާއި، ކްރޫ ޗޭންޖްކުރުމުގެ ޚިދުމަތާއި،ބޯޓްތަކަށް ބޭނުންވާ ސާފު ފެނާއި، ކާބޯތަކެތި ސަޕްލައިކޮށްދިނުމާއި، އަޑީ ތެޔޮ ސަޕްލައިކޮށްދިނުމާއި، މެއިންޓެނަންސް ޚިދުމަތާއި، މެރިން ސަވައިލެންސް ޚިދުމަތް ހިމެނެއެވެ.
ބަންކަރިންގެ ޚިދުމަތް ފަށަން މިހާރު ނިންމާފައވަނީ މިމަހުގެ 19 ވަނަ ދުވަހު އެވެ. އެދުވަހު ތެޔޮ ވިއްކާނެ ކަސްޓަމަރަކު ނުވަތަ ތެޔޮ އަޅާނެ ބޯޓެއްވެސް މިހާރު ވަނީ ހަމަޖެހިފަ އެވެ.