ދޮށީ މަސްވެރިކަމަށް ޚާއްސަކޮށްގެން، ފުވައްމުލަކުގެ އުތުރުގައި އަޅާފައި އޮތް ބޮއި ކައިރީގައި ފުލުހުންގެ އުޅަނދެެއް ހަރަކާތްތެރިވި މައްސަލަ ބަލަމުންދާކަމަށް ފުލުހުން ބުނެފި އެވެ.
ފުލުހުންގެ އުޅަނދު ފުވައްމުލަކު ބޮއެ ކައިރީ ހަރަކާތްތެރިވެ މަސްވެރިކަން ކުރި މައްސަލައާ ގުޅިގެން، ފުލުހުންގެ ބަހެއް ހޯދާލުމަށް ކެޔޮޅާ ނޫހުން ގުޅާލުމުން ފުލުހުންގެ ތަރުޖަމާނު، އަހްމަދު ޝިފާން ވިދާޅުވީ ފުލުހުންގެ އުޅަނދަކީ މަސްވެރިކަން ކުރަން ހުންނަ އުޅަނދެއް ނޫންކަމަށާއި، ބޮއިގައި ފުލުހުން މަސްވެރިކަން ނުކުރާނެކަމަށެވެ. އަދި، މިއަދު އެ ދައުރުވަމުންދާ ވީޑިއޯއާއި ގުޅިގެން އެ މައްސަލަ ބަލަމުންދާކަމަށް ޝިފާން ވިދާޅުވި އެވެ.
”ރަށް ބޮއިގަ ފުލުހުން މަސްވެރިކަމެއް ނުކުރާނެ. އެކަމު އެކަން ހިގާފަ އެއޮތީ. އެއީ ކިހިނެއް ހިނގައިދިޔަ ކަމެއްތޯ ބަލަމުން މިދަނީ.“ ޝިފާން ވިދާޅުވި އެވެ.
ރަށް ބޮއި ކަނދުފައްޗަކީ، ކަނޑުމަހުގެ ދޮށީގެ މަސްވެރިކަން ކުރުމަށް ޚާއްސަކޮށް ހަރުކޮށްފައިވާ ކަނދުފަތިތަކެކެވެ. މިކަނދުފަތީގައި އެހެނިހެން އުޅަނދު ގާތްކޮށް މަސްވެރިކަން ކުރުމަކީ މަނާކަމެކެވެ.
ފުވައްމުލަކު އިރުމަތީ މަސްވެރިކަމަށް އަޅާފައިވާ ބޮއިއެއްގަައި މިއޮތީ ދައުލަތު މުދަލެއް ބޭނުންކޮށްގެން ޤަވާއިދާ ޚިލާފަށް މަސްވެރިކަން ކުރަން. ސްޕޯޓްސް ފިޝިންގް ކުރަން ބޭނުން ނަމަ އަމިއްލަ މީހުންގެ ލޯންޗުތަކުގައި ދޭ. pic.twitter.com/eBERamjhqA
— LoLoL (@MirzaagMV) September 13, 2024
މަސްވެރިން ބުނީ، ފުލުހުން ފަދަ ގާނޫނު ނަގަހައްޓަން ތިބޭ ބައެއްގެ ފަރާތުން މިފަދަ އަމަލެއް ފެނުމުން ގަބޫލުކުރަން ދަތި ކަމަށެވެ. އަދި، ފުލުހުންނަކީ މަސްވެރިންވެސް އަދި އެހެނިހެން ރައްޔިތުންވެސް ހިމާޔަތްކޮށް ރައްކާތެރިކުރަން ތިބޭ ބަޔަކަށް ވީހިނދު، މިއީ ބަލައިގަންނަން ދަތި މަންޒަރެއް ކަމަށް މަސްވެރިން ބުނެފައި ވެއެވެ.
”މިއީ އަޅުގަނޑުމެން ހިމާޔަތްކުރަން ތިބި ފަރާތްތަކުން ކަންތައް ކުރަންވާގޮތް. ދާއިމީ ހައްލެއް ކިހިނެއްތޯ މިވަރުން ގެންނާނީ. މިއީ އަޅުގަނޑުމެން އެންމެ މިއަދު ހިތުގައި އުފެދޭ ސުވާލެއް.“ ކެޔޮޅަކު ބުންޏެވެ.
މި މައްސަލައިގައި ފިޝަރީޒް މިނިސްޓަރު ވިދާޅުވީ، ބޮއެގައި އެހެން ފަރާތްތަކުން މަސްވެރިކަން ކުރާތީ، އެކަމަށް މީހުން ހޭލުންތެރިކުރުވުމުގެ މަސައްކަތް ފަށަން ތައްޔާރުވަމުން އަންނަކަމަށެވެ.
”ތިކަމުގެ އެވެއަރނެސް ވަރަށް ފުޅާކޮށް ވަރަށް އަވަހަށް އެބަ ޖައްސަން.“ މިނިސްޓަރު ވިދާޅުވި އެވެ.
ރާއްޖޭގެ އެކި ސަރަހައްދުގައި ގާއިމުކޮށްފައިވާ ރަށް ބޮއި ކަނދުފައްޗަށް އެހެން އުޅަނދުތައް ކައިރިކޮށް މަސް ބާނާ މައްސަލަ ދޭތެރެ ދޭތެރެއިން ފެންމަތިވެއެވެ.
އެންމެ ގިނައިން މި މައްސަލަ ފާހަގަކުރެވިފައިވަނީ މާލެ ސަރަހައްދު ބޮއިތަކުންނެވެ. އެ ބޮއި ތަކަށް ފަރުމަސްވެރިންނާއި، ސަފާރީތަކާއި، ރިސޯޓްތަކުގެ ލޯންޗު ފަހަރު ގާތްކުރާ މައްސަލަ ވަނީ ވަރަށް ބޮޑުވެފަ އެވެ.