ޕަބްލިކް ސެކްޓަރ އިންވެސްޓްމަންޓް ޕްރޮގްރާމް (ޕީއެސްއައިޕީ) ގެ ދަށުން ކުރިއަށްދާ މަޝްރޫޢުތައް އަވަސްކުރުމާ ގުޅޭގޮތުން މަސްވެރިކަމާއި ކަނޑުގެ ވަސީލަތްތަކާ ބެހޭ ވުޒާރާ އާއި ގެދޮރުވެރިކަމާއި ބިމާއި އުމްރާނީ ތަރައްޤީއާ ބެހޭ ވުޒާރާއިން މަޝްވަރާކޮށްފި އެވެ.
އިއްޔެ މަސްވެރިކަމާއި ބެހޭ ވުޒާރާގައި ބޭއްވި މި ބައްދަލުވުމުގައި ދެ ވުޒާރާގެވެސް ކަމާ ގުޅޭ އިސްވެރިން ބައިވެރިވަޑައިގެންނެވި އެވެ.
މި ބައްދަލުވުމުގައި މަސްވެރިކަމާއި ކަނޑުގެ ވަސީލަތްތަކާ ބެހޭ ވުޒާރާއިން ވަނީ ސައުދީ ފަންޑުގެ ދަށުން ކުރިއަށްދާ ބައެއް ޕްރޮޖެކްޓުތައް މި މަހުގެ ފަހުކޮޅު އެވޯޑްކުރެވިގެންދާނެ ކަމަށް މަޢުލޫމާތު ދެއްވާފަ އެވެ. އަދި ށ. ފުނަދޫ، ދ. މީދޫ އަދި ދ. ބަނޑިދޫގެ އައިސްޕްލާންޓް ޕްރޮޖެކްޓް އިއްޔެ ކޮންޓްރެކްޓަރާ ޙަވާލުކުރާނެކަަމަށްވެސް ވިދާޅުވެފައި ވެއެވެ. މީގެ އިތުރުން، ރާއްޖޭގެ އެކި ސަރަހައްދުތަކުގައި އަޅަމުންދާ މަސް ރައްކާކުރާ ކާރުޚާނާތަކާ ގުޅޭ މަޢުލޫމާތުވެސް ޙިއްސާކޮށްފައި ވެއެވެ.
މަސްވެރިކަމާ ބެހޭ ވުޒާރާގެ ބޭފުޅުން ފާހަގަކުރެއްވި ގޮތުގައި ޕްރޮޖެކްޓް އިވެލުއޭޝަންގައި ކުރިމަތިވާ އެންމެ ބޮޑު ގޮންޖެހުމަކީ ދާއިރާއާ ގުޅުންހުރި އިންޖިނިއަރެއް ނެތުމުވެ.
މި ބައްދަލުވުމުގައި، ގެދޮރުވެރިކަމާއި ބިމާއި އުމްރާނީ ތަރައްޤީއާ ބެހޭ ވުޒާރާގެ ބޭފުޅުން ވަނީ މިއަހަރު ޕީއެސްއައިޕީގެ ތެރޭގައި ހިމެނިފައިވާ މަޝްރޫއުތަކުގެ އެންމެ ފަހުގެ މަޢުލޫމާތު ހިއްސާކުރުމަށް އެދިވަޑައިގެންފަ އެވެ. އަދި، މަޝްރޫއުތައް ހިންގުމަށް ކުރިމަތިވާ ދަތިތައް ޙިއްޞާކުރެއްވުމަށްވެސް އެދިލެއްވިއެވެ. މީގެ އިތުރުން، މަޝްރޫއުތައް ހިންގުމަށް އެ ވުޒާރާޒާރާގެ ފުރިހަމަ އެއްބާރުލުން ދޭނެކަމުގެ ޔަގީންކަންވެސް އެބޭފުޅުން ވަނީ އަރުވާފަ އެވެ.