ރ.އަތޮޅު މަޑުއްވަރީ ކައުންސިލުން ހިންގަމުން އައި އެރަށުގެ އައިސް ޕަލާންޓު މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ(މިފްކޯގެ) ދަށަށް ބަދަލުކޮށް، މިފްކޯއިން ވަނީ އިއްޔެ ހަވާލުވެފަ އެވެ.
މިހާރު މިފްކޯއިން ސީދާ އެ އައިސް ޕްލާންޓް އޮޕަރޭޓްކުރަން ފަށާފައިވާއިރު، އެތަން މިހާރު ބަލަހައްޓަމުން ދަނީ ފެލިވަރު ފިޝަރީޒް ކޮމްޕްލެކްސް (އެފްއެފްސީ) ގެ އިންޖިނިއަރުންގެ ޓީމުންނެވެ. މިފްކޯއިން ވަނީ އެތަން އޮޕަރޭޓްކުރަން ބޭނުންވާ މުވައްޒަފުންވެސް މިހާރު ހަމަޖައްސާފަ އެވެ.
މިފްކޯގެ ޕްރޮޖެކްޓްސް އެންޑް ޓެކްނިކަލް ޑިޕާޓުމަންޓުގެ ޖެނެރަލް މެނޭޖަރު މުއާޒު އަލީ ވިދާޅުވީ، އިއްޔެއިން ފެށިގެން މިފްކޯއިން މަޑުއްވަރީގެ އައިސް ޕްލާންޓާއި ހަވާލުވެ ހިދުމަތް މިހާރު ޚިދުމަތްދޭން ފަށާފައިވާކަމަށެވެ. ކައުންސިލުން އައިސް ޕްލާންޓް ހިންގި އިރު، މަސްވެރިންނަށް އައިސް ވިއްކަމުން އައީ، ޓަނެއް 1250 ރުފިޔާގެ ރޭޓުންނެވެ. ކައުންސިލުން އަގުބޮޑުކޮށް ވިއްކަން ޖެހުނީ، އެތަން އޮޕަރޭޓްކުރުމަށް ކުރަންޖެހޭ ޚަރަދުބޮޑުކަމުންނެވެ. ކައުންސިލުން މިފްކޯއަށް އެތަން ދޫކޮށްލީވެސް، ތެލުގެ އަގު އިންތިހާއަށް ބޮޑުވެ އޮޕަރޭޝަން ހިންގަން ދަތިވެގެންނެވެ.
މުއާޒް ވިދާޅުވީ، މިފްކޯއިން އަބަދުވެސް މަސައްކަތްކުރާނީ މަސްވެރިންނަށް އައިސް ހޯދުމުގައި މިހާރު ދިމާވާ ދަތިތައް ހައްލުކޮށް،ލުއި ފަސޭހަގޮތެއްގައި އައިސް ލިބޭނެ އިންތިޒާމު ހަމަޖެއްސުމަށް ކަމަށެވެ. އެހެންކަމުން، މިފްކޯއިން އައިސް ޕްލާންޓާއި ހަވާލުވެ އޮޕަރޭޝަން ފެށުމާއެކު މިހާރު އައިސް ޓަނެއް ވިއްކާނީ 750 ރުފިޔާގެ ރޭޓުންކަމަށް މުއާޒް ވިދާޅުވި އެވެ.
”މި ފެށި ހިދުމަތާއެކު 750 ރުފިޔާގެ ރޭޓުން މަސްވެރީންނަށް އައިސް ޓަނެއް ފޯރުކޮށްދެވޭނެ. މިއީ 25 މެޓްރިކް ޓަނުގެ ފްލޭކްސް އައިސް ޕްލާންޓެއް. އަދި 50 ޓަނުގެ އައިސްގެ ސްޓޮކެއް މެއިންޓެއިން ކުރެވޭނެ. މަސްވެރީންނަށް ލުއިފަސޭހަ ގޮތްތައް ކުރިއަށް އޮތް ތަނުގައިވެސް ހޯދުމުގައި މިފްކޯ ދެމި އޮންނާނެ.“ މުއާޒު ވިދާޅުވި އެވެ.
މިފްކޯއާއި އައިސް ޕްލާންޓް ހަވާލުކުރުމަށް އިއްޔެ ވަނީ ކުލީ އެގްރީމެންޓްގައި ސޮއިކޮށްފަ އެވެ. ކައުންސިލުންް، މިފްކޯއަށް އައިސް ޕްލާންޓް ދޫކޮށްލީ، މިފްކޯއިން ބިމު ކުލި ދައްކާގޮތަށެވެ. ކައުންސިލް އިދާރާގައި އިއްޔެ ބޭއްވި ބައްދަލުވުމެއްގައި، މިފްކޯގެ ފަރާތުން އެއްބަސްވުމުގައި ސޮއިކުރެއްވީ، ކުންފުނި ވަގުތީގޮތުން ހިންގެވުމާއި ހަވާލުވެވަޑައިގެން ހުންނެވި ޗީފް ފައިނޭންޝަލް އޮފިސަރ (ސީއެފްއޯ) އިލްޔާސް ހަނީފެވެ. ކައުންސިލްގެ ފަރާތުން ސޮއިކުރެއްވީ މަޑުއްވަރީ ކައުންސިލްގެ ރައީސް މުހައްމަދު ސޯދިގު (ޗޯޓު) އެވެ.
މަޑުއްވަރީ އައިސް ޕްލާންޓަކީ 2021 ވަނަ އަހަރުގެ ޑިސެމްބަރު މަހުގެ 10 ވަނަ ދުވަހު ހިދުމަތް ދޭން ފެށި ތަނެކެވެ. އެއީ މަސްވެރީންގެ ދުވަހާއި ދިމާކޮށް ހުޅުވި ތަނެކެވެ.