މަސްވެރިންނަކީ ދައުލަތް ބަލައިގަންނަ ބަޔަކަށް ހެދުމުގެ މަގްސަދުގައި ސަރުކާރުން ވަނީ ”މަސްވެރިންގެ ގައުމީ ދަފްތަރު“ އެކުލަވާލާ ރަޖިސްޓްރީކުރުމަށް ހުޅުވާލާފަ އެވެ.
ރާއްޖޭގައި ގިނަ އަދަދެއްގެ މަސްވެރި އޮޑިފަހަރާއި މަސްވެރިން ތިބި އިރު މިހާތަނަށް މި ދަފްތަރުގައި ރަޖިސްޓްރީވެފައިވަނީ، ނިސްބަތުން މަދު ބައެކެވެ. މިކަން ހަލުވިކޮށް، އޮކްޓޯބަރުމަހުގެ ނިޔަލަށް ދަފްތަރު ފުރިހަމަކުރުމަށް މިނިސްޓްރީން އަމާޒު ހިފާފައިވާއިރު، މި މަސައްކަތުގައި އޮޑިވެރިންނާއި، ކެޔޮޅުންނާއި، މަސްވެރިންގެ އެހީތެރިކަން ވަރަށް ބޮޑަށް ބޭނުންވެއެވެ. އެއީ، އާޚިރުގައި މިކަމުގެ މަންފާކުރާނީ މަސްވެރިންނާއި، މަސްވެރިންގެ އާއިލާތަކަށް ކަމަށްވާތީ އެވެ. އެހެންކަމުން އެންމެންވެސް މި ވަގުުތު އަވަސްވެގަންނަންވީ، މި ދަފްތަރު ފުރިހަމަކުރުމަށް ދެވެން އޮތް ހުރިހައި އެއްބާރުލުމެއްދީ، އޮޑިވެރިންވެސް އިސްވެ، މަސްވެރިން ދަފްތަރުކުރުމެވެ. އޮޑިވެރިޔާ ކުރަންވީ ކަމަކީ، އޭނާގެ އުޅަނދާއި ފަޅުވެރިންނަކީ، މި ބުނާ ދަފްތަރުގައި ރަޖިސްޓްރީވެފައިވާ ބައެއްކަން ކަށަވަރުކުރުމެވެ.
މަސްވެރިން ދަފުތަރު ކުރަނީ މިހާރުވެސް ބޭނުންކުރަމުން އަންނަ އެންޑްރޮއިޑް އަދި އައިއޯއެސް ފޯނުތަކުގައި ބޭނުންކުރެވޭ ’ކެޔޮޅު‘ އެޕްލިކޭޝަނުންނެވެ. ކެޔޮޅު އެޕްލިކޭޝަނަކީ، މަސްވެރިކަމާ ގުޅުންހުރި މަޢުލޫމާތު ނަގައި، ރައްކާކޮށް ބަލަހައްޓާ ނިޒާމެކެވެ. މި ސިސްޓަމްގައި މަސްވެރިން ދަފުތަރުކުރުން ބެހިގެންވަނީ 3 މަރުހަލާއަކަށެވެ.
ދަފުތަރުކުރުމުގެ މަރުހަލާތައް:
- ފުރަތަމަ މަރުހަލާއަކީ އޮޑިވެރިޔާ ނުވަތަ އޮޕަރޭޓަރު ދަފުތަރުވުން
- ދެވަނަ މަރުހަލާއަކީ، އޮޑި ދަފުތަރުވުމުން އެ ދޯނިން މަހަށްދާ ކެޔޮޅު އައްޔަނުކުރުން
- ތިންވަނަ މަރުހަލާއަކީ، ކެޔޮޅު ދަފުތަރުވުމަށްފަހު ކެޔޮޅަށް ޚާއްޞަ ކޯޑެއް އެޕްލިކޭޝަން ތެރެއިން ޖެނެރޭޓްކުރުން
އެޕްލިކޭޝަނުން ކެޔޮޅަށް ފޮނުވާ އެ ކޯޑު ފަޅުވެރިންނަށް ފޮނުވުމުން، ކޯޑު ބޭނުންކޮށްގެން ފަޅުވެރިންނަށް ދަފުތަރުގައި ރަޖިސްޓަރީކުރެވެނޭއެވެ. ފަޅުވެރިން ކެޔޮޅު އެޕްލިކޭޝަން ފޯނަށް ޑައުންލޯޑުކުރުމަށްފަހު އީފާސް ބޭނުންކޮށްގެން ލޮގިންވުމުން ކޯޑު ޖަހަން އަންނާނެ އެވެ. ކެޔޮޅުދޭ ކޯޑު ޖެހުމުން ދަފުތަރުވާން ހުށަހަޅާ ފަޅުވެރިންގެ މައުލޫމާތު ނަގަނީ ޑީއެންއާރުންނެވެ.
މަސްވެރިންގެ ޤައުމީ ދަފްތަރުގައި ރަޖިސްޓްރީވުމަށް އަމަލުކުރާނެ ގޮތް. pic.twitter.com/bjQcO7KMf7
— Ministry of Fisheries and Ocean Resources (@MFORmv) August 9, 2024
ދަފުތަރުވެގެންދާނީ ކެޔޮޅު ދޭ ކޯޑު ބޭނުންކޮށް ދޯނީގެ ފަޅުވެރިއަކަށް ވުމަށް ހުށަހަޅާ ފަޅުވެރިންގެ ތެރެއިން ކެޔޮޅު ހުއްދަދޭ ފަޅުވެރިންނަށް އެކަންޏެވެ. ދަފުތަރުގެ ޞައްޙަކަން ކަށަވަރުކުރުމަށް ދޯނީގެ ފަޅުވެރިންގެ މަޢުލޫމާތު ހުރިހާ ފަޅުވެރިންނަށް ފެންނަން ހުންނާނެއެވެ.
މަސްވެރިންގެ ދަފްތަރު ފިޝަރީޒް މިނިސްޓަރު ޝިޔާމް އިފްތިތާހު ކޮށްދެއްވާފައިވަނީ، ށ. ކޮމަންޑޫގައި މި އަހަރުގެ ފެބްރުއަރީ މަހުގެ 16 ވަނަ ދުވަހުގެރޭ ބޭއްވި ޖަލްސާއެއްގަ އެވެ. އެރޭ މިނިސްޓަރު ދެއްކެވި ވާހަކަފުޅުގައި ދަފްތަރު ފުރިހަމަ ވެގެން ދިއުމުން މަސްވެރިންނަށް ލިބިގެންދާނެ ގިނަ ގުނަ ފައިދާތަކުގެ މައްޗަށް އަލި އަޅުއްވާލެއްވި އެވެ.
އެމަނިކުފާނު އެރޭ ދެއްކެވި ވާހަކަފުޅުގައި، މަސްވެރިންގެ ދަފްތަރާ ގުޅި ލާމެހިފައި ހުރި ވަރަށް ގިނަ ކަންތައްތަކެއް އެބަހުރިކަން ފާހަގަކުރައްވައި، މަސްވެރިންގެ ދަފްތަރާއެކު، މާލީ އަދި އިޖުތިމާއީ ހިދުމަތްތައް ހޯދުމުގައި މަސްވެރިންނަށް އިތުރު ފަސޭހައަކަށްވެގެންދާނެ ކަމަށް ވިދާޅުވި އެވެ. އެގޮތުން، ރާއްޖޭގެ ބޭންކުތަކާއި އެހެން މުއައްސަސާތަކުން އެހެން ސިނާޢަތްތަކުގައި މަސައްކަތްކުރާ ފަރާތްތަކަށް ޚާއްސަކޮށް ސްކީމްތަކާއި ލުއި ލޯނުތައް ތަޢާރަފްކުރާއިރު، މަސްވެރިންނަށް އޭގައި ބައިވެރިވާން ނޯންނަކަން ފާހަގަކުރައްވައި، ދަފްތަރާއެކު އެކަންވެސް ހައްލުވާނެކަމަށް ވިދާޅުވި އެވެ.
މަސްވެރިންނަށް މިހާރު ދިމާވެފައިވާ އެންމެ ބޮޑު މައްސަލައަކީ، މަސްވެރިން ކިރާ މަހަށް މިފްކޯއިން ބިލު ދެއްކުން ލަސްކުރުމެވެ. މިފްކޯއިން ބިލުތައް ދެއްކުމުގައި ލަސްތަކެއް އުޅޭތީ، މަސްވެރިންްނާއި މަސްވެރިންގެ އާއިލާތަކުންދަނީ ގިނަ ތަކްލީފްތަކެއް އުފުލަމުންނެވެ. މީގެތެރޭގައި، ޔުޓިލިޓީސް ބިލުތައް ނުދެއްކި ކަރަންޓާއި ފެން ކަނޑާލުމާއި، ބިލުތަކަށް ޖޫރިމަނާ ދައްކަން ޖެހުން ހިމެނެއެވެ. ދަފްތަރު އިފްތިތާހު ކުރި ރޭ މިނިސްޓަރު ވިދާޅުވީ ދަފްތަރުގެ ތެރެއިން މިކަމަށްވެސް ހައްލެއް ލިބޭނެކަމަށް އުންމީދު ކުރައްވާކަމަށެވެ.
”އުއްމީދުކުރަން މިދަފްތަރުގެ އެހީގައި މިދަންނަވާ މުއައްސަސާތަކާ މި ދަފްތަރު ގުޅުވޭ ހިސާބުން ފެށިގެން އެނގޭނެ މިފްކޯއިން އެބައޮތްކަން މިދޯނީގެ މިވެނި މަސްވެރިއަކަށް މިވެނި އަދަދަކަށް މިވެނި މަހެއްގަ ފައިސާ އަންނަން. އެހެންވެއްޖެކަމަށް ވަނީނަމަ އެއްކަލަ ޔުޓިލިޓީ ކުންފުނި، އެއީ ފެނަކަވިޔަސް ސްޓެލްކޯވިޔަސް އެގޭގެ ކަރަންޓް ނޫނީ ފެން ކަނޑާނުލާ ބެހެއްޓޭނެ އިންތިޒާމްތައް ރަނގަޅު މަސައްކަތެއް މި ދަފްތަރާއެއްކޮށް ކޮށްފިނަމަ އެކަންތައްތައް ހައްލުކޮށްލެވޭނެ. މިކަހަލަ ބައިވަރު ކަންތައްތައް މަސްވެރިންގެ ދަފްތަރާއެކީގައި ހާސިލުކުރެވިގެންދާނެ.“ ދަފްތަރު އިފްތިތާހުކުރި ރޭ މިނިސްޓަރު ވިދާޅުވި އެވެ.
މަސްވެރިންނަށް ދިމާ ވެފައިވާ ގިނަ މައްސަލަތަކަށް ދަފްތަރު މެދުވެރިކޮށް ހައްލުކުރެވޭނެ އިންތިޒާމުތަކެއް ހަމަޖެހޭގޮތަށް އޮތްއިރު، ވީހާވެސް އަވަހަށް މީގައި ދަފްތަރުވުން މުހިންމެވެ.
އިތުރު މައުލޫމާތު ބޭނުންވާނަމަ، ފިޝަރީޒް މިނިސްޓްރީގެ ކޮމްޕްލަޔަންސް ނަންބަރު 792،8271 އަށް ވައިބަރ ކޮށްލާށެވެ.