ދިވެހި ރައްޔިތުންގެ މެދުގައި މަސްވެރިންގެ އަގުވެއްޓޭ ފަދަ ގޮތަކަށް ރައްޔިތުންގެ އަގު ވައްޓާލަން ސަރުކާރުގެ މަންދޫބަކު މާކުރީގެ ވީޑިއޯއެއް ސަރުކާރު ޕްރޮމޯޓް ކުރަންވެގެން ސޯޝަލް މީޑިއާގައި ޕޯސްޓްކޮށްފި އެވެ.
ޔޫތު މިނިސްޓްރީގެ ޑެޕިއުޓީ މިނިސްޓަރ މަރިޔަމް ޝިއުނާ މިއަދު އެކްސްގައި ޕޯސްޓްކޮށްފައިވަނީ، މިމަހުގެ ކުރީ ކޮޅު ގއ. ވިލިނގިލީ ފަހިމަގު ދޯނީގަ ފައިސާ ބެހި ދުވަހެއްގެ ވީޑިއޯ އެކެވެ. އޭރު ދިނީ ޑިސެންބަރު ސަތާރައާއި ހަމަޔަށް ވާ ފައިސާ އެވެ.
ޝިއުނާ މީގެ ކުރިން އެކްސްގައި އިންޑިއާ އާއި ބެހޭ ގޮތުން ކުރި ޕޯސްޓަކާއި ގުޅިގެން އިންޑިއާ އާއި ރާއްޖެއާއި ދެމެދު ނުތަނަވަސްކަންވެރިވެ ދެގައުުމުގެ ގުޅުން ވަނީ ހީނަރުވެފަ އެވެ. މިޢީ މިއިން ޒަމާނަކުވެސް ސަރުކާރު މަންދޫބެއްގެ ފަރާތުން ފެނުނު މަންޒަރެއް ނޫނެވެ. މިހާރު އެކަމަނާ މަސައްކަތް ކުރައްވަމުން ގެންދަވަނީ މަސްވެރިންގެ އަގުވައްޓާލާ ރައްޔިތުންނާއި މަސްވެރިންނާ ދޭތެރޭ ފިތުނަ އާއި ފަސާދަ އުފެއްދުމަށެވެ. އަދި، ސަރުކާރުން ކުރާ ކަންތައް މަތި އަޅަން މިދަނޑިވަޅުގައި މަސްވެރިން ހަތިޔާރަކަށް ނަގައިގެން ސޯޝަލް މީޑިއާގައި ދޮގު މައުލޫމާތު ފެތުރުމަށެވެ.
މަސްވެރިޔަކު ނުކުމެ މިސަރުކާރުން މަސްވެރިންނަަށް ދިން ފައިސާ ދައްކާލައިފި! pic.twitter.com/ElWt0XAk2F
— Mariyam Shiuna (@shiuna_m) February 22, 2024
މި ވީޑީއޯ މައްސަލައިގައި މަސްވެރިން ރުޅިގަދަވެ މިހާރު ދަނީ ނުރުހުން ފާޅުކޮށް ސޯޝަލް މީޑިއާގައި ޝުއޫރު ފާޅު ކުރަމުންނެވެ.
”ވާނުވާ ނޭނގުނަސް ވާނެ ޓުވީޓު ކުރަން! ފައިސާ ސަރުކާރުން ދިނީކީ ނޫން ފައިސާ މަސްވެރިން ނިކުމެ ފެލާލީ! މަސްވެރިންނަށް ސަރުކާރުން ދޭން ހުރި ފައިސާ ގިނަ ދުވަސްތަކެއްވަންދެން ނުދައްކައި ހުރުމުން މަސްވެރިން އިހުތިޖާޖުކޮށް ސަރުކާރަށް ފިއްތުންތައް ކުރިމަތި ކުރުވައިގެން ، ސަރުކާރަށް މަޖުބޫރުވެގެން އިއްޔެ މަސްވެރިންނަށް އޭގެއިން ބައެއް ދިނީ“ މަސްވެރިޔާ ސާޖިދު ބުނެފައި ވެއެވެ.
މި ވީޑިއޯއިން ފެންނަ އަލިބެއަކީ މަސްވެރިންގެ ކަންތައްތަކުގައި އަޑު އުފުލާ ވީޑިއޯތަކުން އާންމުކޮށްފެންނަ ފަރާތެކެވެ. ސަރުކާރަށް ރައްދުކޮށް އޭނާ ދީފައިވާ މެސެޖްތައް ސޯޝަލް މީޑިއާގައި މީހުން ޕޯސްޓްކޮށް ހަދައެވެ. އަދި ނިމިގެންދިޔަ ކޫއްޑޫ އިހުތިޖާޖުގައި ފައިސާ ހޯދަން އެންމެ ގަދަޢަށް އަޑު އުފުލި މަސްވެރިންގެ ތެރޭގައިވެސް އޭނާ ހިމެނެ އެވެ.
މަސްވެރިޔާ އަށް ފައިސާ ލިބުނީ އެ މަސްވެރިޔާ ނުކުމެ ރައީސް އަށް ޗޯރު މުއިއްޒު ގޮވައިގެން ކޫއްޑޫ ހުއްޓުމަކަށް ގެނެސްގެން. https://t.co/nKHnlYnG6h pic.twitter.com/GiXjhDqanE
— Ahu Madhu (@Dhonkolhu) February 22, 2024
މަސްވެރިން ބުނީ އިއްޔެ ފައިސާ ދޫކުރީ ރައީސް ދެކުނަށް ކުރެއްވި ދަތުރުފުޅުގައި ގއ އަށް އަރާވަޑައިގަންނަވަން އިތުރު ގޮތެއް ނެތިގެން ކަމަށެވެ. މަސްވެރިން އެ ދަތުރު ސިފަ ކުރަނީ މަސްވެރިންނަށް ދޭން ހުރި ލާރި ނުދީ ކުރައްވާ ކެމްޕޭން ދަތުުރުތަކެއްގެ ގޮތުގައެވެ. މަސްވެރިން ބުނީ މިފަހަރުގެ އިންތިޚާބުން އޭގެ ނަތީޖާ ފެނިގެންދާނެކަމަށެވެ.
މަސްވެރިންނަށް ދޭން ހުރި ފައިސާ ސަރުކާރުން ނުދީގެން ކޫއްޑޫ މަސް ފެކްޓަރީއާއި އައްޑޫ ސިޓީ ފިޝަރީޒް ކޮމްޕްލެކްސްގައި މަސްވެރިން އިހުތިޖާޖުކުރި އެވެ. ސަރުކާރަށް ޕްރެޝަރު ބޮޑުވެ ރޭ ވަނީ މަސްވެރިންނަށް ދޭން ހުރި ފައިސާގެ ބައެއް ދޫކޮށްފަ އެވެ. މަސްވެރިން އިހުތިޖާޖު ހުއްޓާލީ ދޭން ހުރި ފައިސާ އެކި ފަހަރު މަތިން ބަހާލައިގެން ދޭނެ ކަމަށް ސަރުކާރުން ވައުދު ވުމުންނެވެ.
މިފްކޯއިން ރޭ ދޫކުރީ 70 މިލިއަން ރުފިޔާ އެވެ. މިދިޔަ ހަފުތާ ކިރި މަހުގެ 26 މިލިއަން ރުފިޔާ މި ހަފުތާ ތެރޭ ދޫކުރާއިރު އަންނަ ހޯމައިގައި 30 މިލިއަން ދޫކުރަން ސަރުކާރުން ވަނީ ނިންމާފަ އެވެ. ބާކީ 180 މިލިއަން ރުފިޔާ މާޗު 5 އަށް ދީ ޚަލާސްކުރާނެކަމުގެ ޔަގީންކަންވެސް ސަރުކާރުން ވަނީ ދީފަ އެވެ.