މަސްވެރިން ދަފުތަރުކުރުމުގެ މަސައްކަތް އިތުރަށް ފުޅާކުރުމަށްޓަކައި ކައުންސިލްތަކާ ގުޅިގެން މަސައްކަތްކުރުމާ ބެހޭގޮތުން މަޝްވަރާކޮށްފި އެވެ.
މިއަދު ބޭއްވި، މި މަޝްވަރާ ބައްދަލުވުމުގައި ބައިވެރިވެ ވަޑައިގަތީ މަސްވެރިކަމާއި ކަނޑުގެ ވަސީލަތްތަކާ ބެހޭ ވަޒީރު އަޙްމަދު ޝިޔާމް އާއި މިނިސްޓަރ އޮފް ސިޓީސް، ލޯކަލް ގަވަރންމަންޓް އެންޑް ޕަބްލިކް ވާރކްސް އާދަމް ޝަރީފް ޢުމަރުއާއި ދެވުޒާރާގެ އިސްފަރާތްތަކެވެ.
މި ބައްދަލުވުމުގައި ވަޒީރު ޝިޔާމް އަދި އެ ވުޒާރާގެ ޓީމުން މަސްވެރިން ދަފުތަރުކުރުމުގެ މަސައްކަތް މިހާރު ކުރިއަށް ގޮސްފައިވާ އަދާހަމަ މައުލޫމާތު އެރުވިއެވެ. މި މަސައްކަތް ކުރިއަށްދަނީ ރާއްޖެ ޒޯނުތަކަކަށް ބަހާލައިގެން، ވުޒާރާގެ ޓީމުތަކާއި ކައުންސިލްތަކުގެ ފޯކަލް ޕޮއިންޓުތަކާ ގުޅިގެންނެވެ. މިހާތަނަށް ވަރަށް ގިނަ މަސްވެރިން ދަފުތަރުކުރެވިފައިވާ ކަމަށް ވެސް މަޢުލޫމާތު ދެއްވިއެވެ.
ވަޒީރު އާދަމް ޝަރީފް ޢުމަރުގެ ވާހަކަފުޅުގައި މަސްވެރިން ދަފްތަރު ކުރުމުގެ މަސައްކަތް އިތުރަށް ހަރުދަނާކުރުމަށްޓަކައި ދެ ވުޒާރާ ގުޅިގެން މަސައްކަތްކުރާނެ ޚާއްޞަ ޓީމެއް އެކުލަވާލުމުގެ މުހިންމުކަން ފާހަގަކުރެއްވި އެވެ. މީގެ އިތުރުން، ކައުންސިލްތަކާއެކު ބާއްވާ ބައްދަލުވުންތަކުގައި ދަފުތަރުގެ މަޢުލޫމާތު ހިއްސާކުރައްވާނެ ކަމަށާއި، އެ ވުޒާރާގެ ޓީމުން އެހީތެރިކަން ފޯރުކޮށްދޭނެ ކަމަށް ވެސް ވިދާޅުވި އެވެ.
މި ބައްދަލުވުމުގައި، ކައުންސިލްތަކުން މަސްވެރިން ދަފުތަރުކުރުމަށް ބޭނުންވާ އިތުރު އެހީތެރިކަމާ ބެހޭގޮތުން ވެސް މަޝްވަރާކުރި އެވެ. މި މަސައްކަތަކީ ރާއްޖޭގެ މަސްވެރިކަމުގެ ދާއިރާ ތަރައްޤީކުރުމަށް ކުރެވޭ މުހިންމު މަސައްކަތެއްގެ ގޮތުގައި ދެ ވަޒީރުން ވެސް ފާހަގަކުރެއްވި އެވެ.
މަސްވެރިންނަކީ ދައުލަތް ބަލައިގަންނަ ބަޔަކަށް ހެދުމަކީ މި ސަރުކާރުގެ ސިޔާސަތެކެވެ. އެގޮތުގެ މަތީން މަސްވެރިންގެ ގައުމީ ދަފްތަރެއް އެކުލަވާލުމަށް ރައީސް ޑރ މުހައްމަދު މުއިއްޒު ވެވަޑައިގެންފައިވާ ރިޔާސީ ވައުދުފުޅު ފުއްދުމަށްޓަކައި، މަސްވެރިންގެ ފުރިހަމަ ގައުމީ ދަފްތަރެއް އެކުލަވާލުމުގެ ގޮތުން، ރާއްޖެ 6 ޒޯނަކަށް ބަހާލައިގެން ފިޝަރީޒް މިނިސްޓްރީގެ ޚާއްސަ ޓީމުތަކުންދަނީ މަސައްކަތް ކުރަމުންނެވެ.
ސަރުކާރުގެ ސިޔާސަތަކީ، މަސްވެރިންނަކީ ދައުލަތުގެ މުއައްސަސާއެއްގައި ދަފުތަރުވެފައި ތިބި ބަޔަކަށް ހެދުންކަމަށްވާއިރު، ދަފުތަރުގެ މަސައްކަތް ނިމޭއިރު، ރާއްޖޭގައި މަހަށް ދުއްވާ ހުރިހާ ދޯންޏަކާއި، ކެޔޮޅުންނާއި އަދި ފަޅުވެރިންގެ ރަސްމީ މަޢުލޫމާތު ވުޒާރާގެ ޑޭޓާބޭސްގައި ރައްކާކުރެވި ބެލެހެއްޓިގެން ދާނެކަމަށް ފިޝަރީޒް މިނިސްޓްރީން ބުނެފައި ވެއެވެ.