މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ (މިފްކޯ) އިން ގދ. ގައްދޫ އައިސް ޕްލާންޓް އަލުން އޮޕަރޭޝަނަށް ގެނެސްފި އެވެ.
މިފްކޯއިން ބުނީ، ކުރިން 25 ޓަނުގެ ކެޕޭސިޓީ ހުންނަ، ގައްދޫ އައިސްޕަލާންޓް އޮޕަރޭޝަނަށް ގެނައީ، ދުވާލެއްގެ މައްޗަށް 50 ޓަނުގެ ފްލޭކްސް އުފެއްދޭ ވަރަށް އަޕްގްރޭޑްކޮށްގެން ކަމަށެވެ. އަދި، ފްލޭކްސް އައިސް އުފައްދާ އެހެން އައިސް ޕްލާންޓުތަކާ ޚިލާފަށް، އަމިއްލައަށް އައިސް ނެގުމުގެ ބަދަލުގައި، ގައްދޫ އައިސް ޕްލާންޓުން، އައިސް ބަކެޓަށް ޕްލާންޓުގެ އެހީގައި އައިސް އެޅިގެންދާނެކަމަށް މިފްކޯއިން ބުންޏެވެ.
”އެކަމުގެ ސަބަބުން މަސްވެރީންނަށް ފަސޭހައިން އައިސް ލިބިގެންދާނެ.“ މިފްކޯއިން ބުންޏެވެ.
ގައްދޫ އައިސް ޕްލާންޓުގެ އިތުރުން، މިފްކޯގެ ބެލުމުގެ ދަށުން އިތުރު 5 ރަށެއްގައި ދަނީ އައިސް ޕްލާންޓުތައް އޮޕަރޭޓް ކުރަމުންނެވެ.
މިފްކޯއިން މިވަގުތު އެހެން ރަށްރަށުގައި ހިންގާ އައިސް ޕްލާންޓުތައް:
1. ހޯރަފުށި – 25 ޓަން (ފްލޭކްސް)
2.މަޑުއްވަރި – 25 ޓަން (ފްލޭކްސް)
3. ގާފަރު – 25 ޓަން (ފްލޭކްސް)
4. ތިނަދޫ – 50 ޓަން (ބްލޮކް އައިސް)
5. ފުވައްމުލައް – 25 ޓަން (ފްލޭކްސް)
މިފްކޯގެ ފެސިލިޓީތައް:
* ފެލިވަރު ފިޝަރީޒް ކޮމްޕްލެކްސް – 100 ޓަން (ބްލޮކް އައިސް)
* ކޫއްޑޫ ފިޝަރީޒް ކޮމްޕްލެކްސް – 80 ޓަން (ބްލޮކް އައިސް)
* އައްޑޫ ފިޝަރީޒް ކޮމްޕްލެކްސް – 50 ޓަން (ފްލޭކްސް)
ފެނަކައިން ކުރިން ހިންގަމުން އައި ބައެއް އައިސް ޕްލާންޓްތައް އޮޕަރޭޓްކުރުން ހުއްޓާލަން އެކުންފުނިން ނިންމުމާއި ގުޅިގެން، ފެނަކައިގެ ބެލުމުގެ ދަށުން އޮޕަރޭޓް ކުރަމުން އަންނަ 18 އައިސް ޕްލާންޓާ ހަވާލުވުމުގެ އެންމެ ފަހުގެ ތައްޔާރީތައް ވަމުން އަންނަކަމަށް މިފްކޯއިން ބުނެއެވެ.
ފެނެކަައިން އައިސް ޕްލާންޓްތައް އޮޕަރޭޓްކުރުން ހުއްޓާލާނެކަން އިއުލާނުކުރި ދުވަހު އެކުންފުނީގެ އިސްވެރިން ވިދާޅުވީ، މިފްކޯއާ އެތަންތަން ހަވާލުކުރުމުގެ އެންމެހައި އިޖުރާއަތުތައް ފުރިހަމަ ކުރެވެންދެން، ނުވަތަ ހަވާލުކުރުމުގެ ހުރިހައި މަރުހަލާއެއް ނިމެންދެން މަސްވެރިންނަށް އައިސް ފޯރުކޮށްދޭނެކަމަށެވެ.