ދިވެހި ކަނޑުތަކުގެ މައްޗަށް ދިވެހީންގެ ބާރު ގެއްލިއްޖެނަމަ، އެއީ ހައިހޫނުކަމެއްގެ ފެށުންކަން ދިވެހީން ދަންނަކަމަށް ރައީސުލްޖުމްހޫރިއްޔާ ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ ދިވެހި ފަސްގަނޑުގައި މިނިވަންކަމާއެކު ތިބުމަށް މިނިވަންކަމުގެ ބަޠަލުން ކުރައްވާފައިވާ މަސައްކަތަށް އަލި އަޅުއްވާލައްވަމުން މިއަދު ބޭއްވި ގައުމީ ދުވަހުގެ ރަސްމީ ޖަލްސާގައި ދެއްކެވި ވާހަކަފުޅުގަ އެވެ.
އެމަނިކުފާނުގެ ވާހަކަފުޅުގައި، ދިވެހީންނަކީ އަބަދުވެސް މިނިވަންކަމުގެ ބަޠަލުންކަމާއި، ދިވެހީންގެ ޠަބީޢަތަކީ މިނިވަންކަމާއެކު ދެމިތިބުންކަމަށްވާތީ، އެމަނިކުފާނުގެ މުޅި ސިޔާސަތު ބިނާކުރަނީ، އެ އަސާސްގެ މައްޗަށްކަމަށް ވިދާޅުވިއެވެ. އަދި، މިއަދު ރާއްޖޭގައި ބޭރުގެ ސިފައިން ޤާއިމުވެ ނެތީ އެހެންވެގެންކަމަށާއި، މިއަދު ރާއްޖެ ބަލަހައްޓަން އެންމެ ޒަމާނީ ޓެކްނޯލޮޖީއާއެކު އުޅަނދުތައް އުދުހެމުން އެދަނީ އެ އައަސާސްތަކުގެ މަތިންކުރަމުންދާ މަސައްކަތުގެ ނަތީޖާކަމުގައި ވިދާޅުވި އެވެ.
ރައީސް ވިދާޅުވީ މިއަދު ދިވެހި ޤައުމިއްޔަތުގެ ޚާއްޞަ ނިޒާމެއް ތަޢާރަފުކުރެވި، އެ ދާއިރާގެ ތަޢުލީމާއި ހޭލުންތެރިކަން އާންމުކުރަމުން ދަނީ އެ މުހިންމު ބޭނުމުގައިކަމަށެވެ. އަދި، ދިވެހި ޤައުމިއްޔަތުން ދަސްވާނީ ދިވެހިވަންތަކަން ކުރިއަރުވަންކަމަށާއި، މި ލޮބުވެތި ދިވެހިރާއްޖެ ނުވަތަ ދިވެހި ފަސްނގަޑާ ދިވެހީން ހަވާލުވާންކަމަށެވެ.
އެމަނިކުފާނުގެ ވާހަކަފުޅުގައި، އިންސާނުން އެ މީހުން ދިރިއުޅޭ ފަސްގަނޑަށް ވަފާތެރިވެ، އެ ފަސްގަނޑު ދިފާޢުކޮށް، އެ ފަސްގަނޑަށް ފުރާނަ ދެނީ، އެ ފަސްގަނޑުން އޭނާގެ ފުރާނަ ސަލާމަތްކޮށްދީ، އޭނާގެ ބަނޑުފުރާނަ މުއްތިކުރެވޭނަމަ ކަން މިސާލު ޖެއްސެވި އެވެ. އަދި، މިއީ ޒަމާނުއްސުރެ ދިވެހީން މަސްކަނޑުތައް ސަލާމަތްކުރާ ޠަބައީ ސިއްރުކަން ފާހަގަކުރެއްވި އެވެ.
”ދިވެހީންގެ މަސްކަނޑުތައް ދިވެހީން ޒަމާނުއްސުރެ ސަލާމަތްކުރާ ޠަބީޢީ ސިއްރަކީ، ދިވެހީން ބަނޑުފުރާނަ މުއްތިކުރާ މައިރޯއްޖަކީ އެ ކަނޑުތަކުން ލިބޭ ރިޒުޤު ކަމުގައިވުން. އެ ކަނޑުތަކުގެ މައްޗަށް ދިވެހީންގެ ބާރު ގެއްލިއްޖެނަމަ، އެއީ، ހައިހޫނުކަމެއްގެ ފެށުންކަން ދިވެހީން ދަތުން.“ ރައީސް ވިދާޅުވި އެވެ.
ރައީސް ވިދާޅުވީ އޭގެ މާނައަކީ، ޤައުމަށް ވަފާތެރި ދަރީން ބިނާކުރުމަށްޓަކައި މަސައްކަތްތެރި ޖީލުތަކެއް ބިނާކުރަން ޖެހޭކަމެވެ. އަދި، ދިވެހީންގެ ފަސް ހިއްސު، ދިވެހީންގެ މަސްކަނޑާއި ފަސްގަނޑާ އިހުއްސުރެ ގުޅިފައިވާ ގޮތަށް އަންނަން އޮތްތާނގައި ވެސް ގުޅުވާލަން ޖެހޭކަމެވެ.
”މަސައްކަތްތެރިކަން ބިނާވެފައި އޮންނަނީ ވަޒަންވެރިކަމުގެ މައްޗަށް. ދިރިއުޅުމެއް ލިބުމުގެ މައްޗަށް. އަންނަން އޮތް ދިވެހި ޖީލުތަކަކީ، މި ބިމަށް ވަޒަންވެރި ޖީލުތަކަކަށް ހެދުން ކިތަންމެހާ ވެސް މުހިންމު. މި ނުކުތާގައި ވަޒަންވެރިކަމޭ އަޅުގަނޑު މި ދަންނަވަނީ، ފަހަރެއްގައި ވެސް ހަމައެކަނި ބޯހިޔާވަހިކަމަކަށް ނޫން. ވަޒަންވެރިކަމޭ މި ދަންނަވަނީ، ދިރިއުޅުމުގެ މަސައްކަތްތެރިކަމާއެކު ވަޒަނެއްގައި ދިރިއުޅުމަށް.“ ރައީސް ވިދާޅުވި އެވެ.
ރައީސް ވިދާޅުވީ، ތަނެއްގެ ބާރާއި ނުފޫޒު އަބަދުވެސް އޮންނާނީ، އެ ތަނެއްގެ މުއްސަނދިކަން ނުވަތަ ރިސޯސްތައް، އެ ބައެއްގެ އަތުގައި އޮތް ބަޔަކަށްކަމަށާއި، ރިސޯސްތައް އަތްމައްޗަށް އަރާނީ، މަސައްކަތްތެރިކަމާއި ހުނަރުވެރިކަމުގެ ތެރެއިންކަމަށެވެ.
ތަނެއްގެ ބާރާ ނުފޫޒު އަބަދުވެސް އޮންނާނީ އެތަނެއްގެ މުއްސަނދިކަން ނުވަތަ ރިސޯސްތައް އެބައެއްގެ އަތުގައި އޮތް ބަޔަކަށް. ރިސޯސްތައް އަތްމައްޗަށް އަރާނީ މަސައްކަތްތެރިކަމާއި ހުނަރުވެރިކަމުގެ ތެރޭން – ރައީސުލްޖުމްހޫރިއްޔާ pic.twitter.com/ab2SYLuhwp
— The President's Office (@presidencymv) September 4, 2024