ރ. މަޑުއްވަރީގައި ސަރުކާރުން ގާއިމުކޮށްފައިވާ އައިސްޕްލާންޓް މި މަހުގެ ތެރޭގައި އޮޕަރޭޝަނަށް ގެނެވޭނެކަމަށް، މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީން ބުނެފި އެވެ.
މަޑުއްވަރީ އައިސްޕްލާންޓް މިހާރު ހިންގަމުން އަންނަނީ މަޑުއްވަރީ ކައުންސިލުންނެވެ.
މިފްކޯއިން ބުނީ، އައިސްޕްލާންޓް އެކުންފުނީގެ ދަށަށް ގެނެސް އޮޕަރޭޝަނަށް ގެނައުމަށްޓަކައި ވާންޖެހޭ އެންމެ ފަހުގެ ތައްޔާރީތައް ވަމުން އަންނަ ކަމަށެވެ. އެގޮތުން، ކައުންސިލުން މިފްކޯއަށް އެތަން ހިންގުމަށް ކުއްޔަށްދިނުމުގެ އެއްބަސްވުމުގެ ޑްރާފްޓް ބަދަލުކުރެވި، މިހާރު ކުރިޔަށްދަނީ އެ ފަައިނަލް ކުރުމުގެ މަރުހަލާ ކަމަށް މިފްކޯއިން ބުންޏެވެ.
”މިފްކޯއިން އެގްރީމެންޓަށް ގެންނަން ޖެހޭ ބަދަލު، އަޅުގަނޑުމެން ބޭނުންވާ ކްލޯސް ހިމަނާފައި ކައުންސިލަށް އެގްރީމެންޓްގެ ޑްރާފްޓް ފޮނުވާފަވަނީ. މި ބަލަނީ އާދީއްތަ ހާތާނގައި ކަންސިލުން ބޭނުންވާ ބަދަލުގެނެސް އެ ލިބޭނެކަމަށް. އެގްރީމެންޓް ފައިނަލްކޮށް ސޮއިކުރާއިރަށް އޮޮޕަރޭޝަން ފެއްޓޭވަރަށް އައިސްޕްލާންޓް އޮތީ ތައްޔާރުވެފައި.“ މިފްކޯގެ އޮފިޝަލް ވިދާޅުވި އެވެ.
މިފްކޯއިން މިހާރު ވަނީ އައިސްޕްލާންޓަށް ބޭނުންވާ 2 މުވައްޒަފަކު ހޯދަން އިއުލާނުވެސްކޮށްފަ އެވެ. އެކުންފުނިން ބުނީ، މުވައްޒަފުން ނެގުމުގައި އެރަށުގެ ރަށްވެހިންނަށް އިސްކަންދޭނެކަމަށެވެ. މުވައްޒަފުން ނަގައި، ކައުންސިލާއެކު އެގްރީމެންޓްގައި ސޮއިކޮށް މިމަހުގެ ތެރޭގައި އައިސްޕްލާންޓް އޮޕަރޭޝަނަށް ގެނެވޭނެކަމަށް މިފްކޯއިން ބުންޏެވެ.
މަސްވެރިންނަށް ފަސޭހަގޮތެއްގައި އައިސް ލިބޭނެ އިންތިޒާމު ހަމަޖެއްސުމަށް ސަރުކާރުން މަސައްކަތްކުރަމުން އަންނަ އިރު، މަޑުއްވަރީ އައިސް ޕްލާންޓް މިފްކޯއިން ހިންގާގޮތަށް ނިންމާފައިވަނީ މަސްވެރިންގެ އެކަމަށް އެދިގެންކަމަށް މަޑުއްވަރީ ކައުންސިލުން ބުންޏެވެ. އައިސްޕްލާންޓަކީ ކައުންސިލުންވެސް ބޮޑެތި ޚަރަދުތަކެއްކޮށްފައި ހުރި ތަނެއްނަމަވެސް އެތަން ދޫކޮށްލަނީ ތެލުގެ އަގު އިންތިހާއަށް ބޮޑުވެ އޮޕަރޭޝަން ހިންގަން ދަތިވުމުގެ ސަބަބުންނެވެ. އެތަން މިފްކޯއަށް ދޫކޮށްލަނީ ބިމުގެ ކުލި ދައްކާގޮތަށެވެ.
އައިސް ޕްލާންޓުން މިހާރު އައިސް ޓަނެއް ވިއްކަމުން އައީ 1250 ރުފިޔާގެ ރޭޓުންނެވެ. މިފްކޯއިން އެތަން އޮޕަރޭޝަނަށް ގެނައުމާއެކު، މިފްކޯގެ އެހެން ފެސިލިޓީތަކުން އައިސް ވިއްކާ އަގުގައި މަޑުއްވަރީ އައިސްޕްލާންޓުންވެސް އައިސް ވިއްކާނެކަމަށް މަސްވެރިން އުންމީދުކުރެއެވެ. މިހާރު މިފްކޯގެ ފެސިލީޓީތަކުން އައިސް ޓަނެއް ވިއްކަނީ 750 ރުފިޔާ އަށެވެ.
މަޑުއްވަރީ އައިސްޕްލާންްޓަކީ، 25 ޓަނުގެ އައިސް އުފައްދާ 50 ޓަނުގެ އައިސް ރައްކާކުރެވޭ އައިސްޕްލާންޓެކެވެ. އެތަން ހުޅުވީ 2021 ވަނަ އަހަރުގެ މަސްވެރިންގެ ދުވަސްކަމަށްވާ ޑިސެންބަރުމަހުގެ 10 ވަނަ ދުވަހުއެވެ. މަޑުއްވަރީ އައިސްޕްލާންޓް އޮޕަރޭޓްކޮށް، ބަލަހައްޓައި، އައިސްޕްލާންޓުން ހޯދަންޖެހޭ ނަފާއެއް ހޯދުމުގެ ހުރިހައި ފުރުސަތެއް އޭރުގެ ސަރުކާރުން ދޫކޮށްލީ މަޑުއްވަރީ ކައުންސިލަށެވެ. އަދި، އެއީ ކައުންސިލްގެ ތަނެކެވެ.
މަޑުއްވަރީގެ އިތުރުން ރ އަތޮޅު އަލިފުށްޓާއި ދުވާފަރުގައިވެސް އައިސްޕްލާންޓް ހުރެއެވެ.