ސަރުކާރުން ދެއްވާ ހިތްވަރު ދިނުމުގެ ގައުމީ އިނާމްގެތެރެއިން މަސްވެރިކަމުގެ ދާއިރާއިން ހިތްވަރު ދިނުމުގެ ޤައުމީ އިނާމު، ގއ. ވިލިނގިލި، ވާކަރުގެ، އިބްރާހީމް ތައްޚާނަށް ރައީސް ޑރ. މުއިއްޒު ދެއްވައިފި އެވެ.
ތައްޚާނަށް ލިބުނީ، މަސްވެރިކަމުގެ ދާއިރާއިން ދޮށީގެ މަސްވެރިކަން ކުރުމުގެ ރޮނގުން ގައުމީ އިނާމެވެ. މި އިނާމު ތައްޚާނާއި ހަވާލުކޮށްދެއްވީ، މި އަހަރުގެ ޤައުމީ ދުވަހުގެ މުނާސަބަތުގައި ދަރުބާރުގޭގައި މިއަދު ބޭއްވެވިގައުމީ ދުވަހުގެ ރަސްމީ ޖަލްސާގަ އެވެ. ހިތްވަރު ދިނުމުގެ ޤައުމީ އިނާމުގެ ގޮތުގައި ރައީސުލްޖުމްހޫރިއްޔާ ދެއްވީ، ހަނދާނީ ފިލައެކެވެ.
އިބްރާޚިމް ތައްޚާން މަސްވެރިކަމުގެ ދާއިރާއަށް ނިކުތީ އުމުރުން އެންމެ 14 އަހަރުގަ އެވެ. އެގޮތުން ދޮށީގެ މަސްވެރިކަމުގެ ދާއިރާގައި މިއަދާއަހަޔަށްވެސް ދެމިހުރީ އެކަމުގައި އޮތް ޝައުގުވެރިކަމެއްގެ ބޮޑުކަމުންނެވެ. މަސްވެރިކަން ކުރަމުންދާތާ އަހަރެއްހާ ދުވަސްވީއިރު ދޮށީ މަސްވެރިކަމުގެ ކެޔޮޅަކާހަމަޔަށް ވާސިލުވެވި، ދޯނީގެ ވެރިންގެ އިތުބާރު ހޯދުން އެއީ ލިބުނު ފުރަތަމަ ކާމިޔާބީކަން ފާހަގަކުރެވެއެެވެ. އޭގެ ފަހުންވެސް މިއަދާ ހަމަޔަށްވެސް މަސްވެރިކަން ކުރަމުންގެންދަނީ ކެޔޮޅެއްގެ ގޮތުގަ އެވެ.
1978 ވަނަ އަހަރުން ފެށިގެން 2008 ވަނަ އަހަރުގެ ނިޔަލަށް ދޮށީގެ މަސްވެރިކަމުގެ ކެޔޮޅެއްގެ ގޮތުގައި، އެކި މީސް މީހުންގެ ދޯނި ފަހަރު ތައްޚާން ދުއްވާފައި ވެއެވެ.
ޤައުމީ އިނާމަށް ބޭފުޅުން ހޮއްވެވީ، އެކަމަށްޓަކައި ރައީސުލްޖުމްހޫރިއްޔާ އުފައްދަވާފައިވާ ޤައުމީ އިނާމާބެހޭ ކޮމިޓީއިންނެވެ.ގައުމީ އިނާމާބެހޭ ކޮމިޓީގެ ބޭފުޅުން ތައްޚާންގެ މަސައްކަތްތައް ވަޒަންކުރެއްވުމަށް ވިލިގިއްޔަށް ކުރެއްވި ޒިޔާރަތުގައި، ކެޔޮޅު ތައްޚާންގެ މަސްވެރިކަމުގެ ޚިދުމަތާބެހޭ މައުލޫމާތު އޮޅުން ފިލުއްވުމަށް ކައުންސިލްގެ މެންބަރުންނާ ބައްދަލުކުރެއްވި އެވެ. އެބޭފުޅުންގެ މިދަތުރުފުޅުގައި އިބްރާހިމް ތައްޚާނަކީ މަސްވެރިކަމުގައި ދިގު މުއްދަތެއް ހޭދަކޮށްފައިވާ ހީވާގި ކެޔޮޅެއް ކަމާއި، ގިނަ އަދަދެއްގެ ކެޔޮޅުން އެ ދާއިރާއަށް ނެރެވާފައިވާ ކެޔޮޅެއްކަން ފާހަގަކުރެވުނު ކަން އެކޮމިޓީން ބުނެފައި ވެއެވެ.
ކެޔޮޅު ތައްޚާންގެ އިތުރުން 8 ބޭފުޅަކަށާއި ކުންފުންޏަކަށް އެކި ދާއިރާތަކުން މިއަދުގެ ޖަލްސާގައި ހިތްވަރު ދިނުމުގެ ގައުމީ އިނާމް ދީފައި ވެއެވެ.
ޤައުމީ އިނާމަކީ، ދިވެހި ޤައުމާއި ދިވެހި މުޖުތަމަޢުގެ ލާބައާއި މަންފާއަށްޓަކައި ވަކިވަކި ފަރުދުންނާއި، މަދަނީ މުއައްސަސާތަކުންނާއި، މަދަނީ ޖަމުޢިއްޔާތަކާއި ޖަމާޢަތްތަކުންނާއި، ވިޔަފާރި އިދާރާތަކުން ދެމެހެއްޓެނިވި ގޮތެއްގައި ދިވެހި ޤައުމުގެ ތަރައްޤީގައި ކުރަމުންގެންދާ މަސައްކަތްތަކުގައި، އެ ފަރާތްތަކުން ހޯދާ ކުރިއެރުންތައް ބަލައިގަނެ، އެ ކަންކަމުގެ އަގު ވަޒަންކޮށް، އެ ފަރާތްތަކަށް ހިތްވަރުދިނުމުގެގޮތުން ސަރުކާރުން ދެމުން އަންނަ އިނާމެކެވެ.