މަސްވެރީން އަތުން ގަނެފައިވާ ކަނޑުމަހުގެ ފައިސާ އޮޑިވެރީންނަށް ޖަމާކުރުމުގެ މަސައްކަތް މިއަދު ކުރިޔަށް ގެންދާނެކަމަށް މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ(މިފްކޯ) އިން ބުނެފި އެވެ.
މިފްކޯއިން ބުނީ، މިއަދު ޖަމާކުރާނީ ދެ ހަފްތާއަށް ވާ ފައިސާ ކަމަށެވެ. އެއީ، އޯގަސްޓް މަހުގެ 9 އިން 23 އަށް ކިރާފައިވާ 445 ޓަނަށްވާ 7 މިލިއަން ރުފިޔާކަމަށް މިފްކޯއިން ބުންޏެވެ. އަދި، ބެކް ލޮގްގައި ބާކީ ހުރި ފައިސާ ދައްކާނެ ދުވަހެއް ފަހުގެ ތާރީޚެއްގައި ހާމަކުރާނެކަމަށްވެސް މިފްކޯއިން ބުންޏެވެ.
”ދެން މިފްކޯއިން ދޫކުރާނީ އޯގަސްޓު 24 އިން ސެޕްޓެމްބަރު 9 އާއި ދެމެދަށްވާ 2 ހަފްތާގެ މުއްދަތުގެ ފައިސާ. އެ މުއްދަތުގެ ތަފްސީލް އެނގޭނީ އަންނަ ހަފްތާގެ ހޯމަ ދުވަހުގެ ފަހުން. އަދި އެ މުއްދަތު ހަމަވުމުން އެ ފައިސާވެސް ވީހާވެސް އަވަހަށް އޮޑިވެރީންނަށް ޖަމާކޮށްދޭނެ.“ މިފްކޯއިން ބުންޏެވެ.
މިފްކޯއިން އާންމުކޮށްފައިވާ ތަފާސް ހިސާބުތައް ދައްކާގޮތުންނަމަ، 24 އޯގަސްޓް އިން އިއްޔެގެ ނިޔަލަށް، ކިރާފައިވާ މަހަށް އައުޓްސްޓޭންޑިންގެ ގޮތުގައި މިހާރު ހުރީ 6.1 މިލިއަން ރުފިޔާ އެވެ. މިފްކޯއިން ބުނީ އިއްޔެ އެކަނިވެސް 43 ދޯންޏަކުން 121.8 މެޓްރިކް ޓަނުގެ މަސް ވަނީ ކިރާފައި ވާކަމަށެވެ.
ސަރުކާރާއި މިފްކޯގެ ކޭޝްފްލޯގެ ދަތިކަމުގެ މި ހާލަތުގައިވެސް އެ ކުންފުނީގެ ބޯޑާއި މެނޭޖުމެންޓުގެ އިތުރުން، ސަރުކާރާއި، ފިޝަރީޒް މިނިސްޓްރީން ގުޅިގެން ކުރެވޭ މަސައްކަތުގައި ސަރުކާރުން ދޭ އެހީތެރިކަން ފާހަގަކޮށް މިފްކޯއިންވަނީ ޝުކުރު އަދާކޮށްފަ އެވެ.