މޯލްޑިވްސް ނެޝަނަލް ޔުނިވަސިޓީ(އެމްއެންޔޫ) އާއި ފިޝަރީޒް މިނިސްޓްރީ ގުޅިގެން ގާއިމުކޮށްފައިވާ ފިޝަރީޒް ކޮލެޖުގެ ދަށުން މިއަހަރު ފަށާ ކޯސްތަކުގައި ބައިވެރިވުމުގެ ފުުރުސަތު މިއަދަށް ހަމަވާނެއެވެ.
މޯލްޑިވްސް ނެޝަނަލް ޔުނިވާސިޓީ(އެމްއެންޔޫ) އިން ދެވަނަ ޓާމުގައި ފެށުމަށް ހަމަޖެހިފައިވާ ކޯސްތަކުގެ ތެރެއިން ފިޝަރީޒް ކޮލެޖުގެ ދަށުން ހިންގުމަށް ހަމަޖެހިފައިވާ މަސްވެރިކަމުގެ ދާއިރާގެ ހަތަރު ކޯހެއްގައި ބައިވެރިވުމުގެ ފުރުުސަތު ހުޅުވާލީ މިދިޔަ އޯގަސްޓްމަހުގެ 26 ވަނަ ދުވަހު އެވެ. މިއަދު މެންދުރުފަހު 14:00 ގައި ހަމަޔަށް އެކޯސްތަކަށް އެޕްލައި ކުރުމުގެ ފުރުސަތު ހަމަވާނެއެވެ.
ކޮލެޖް އޮފް ފިޝަރީޒް އެންޑް އޯޝަން ސައިންސަސްގެ ދަށުން ހިންގުމަށް ހަމަޖެހިފައިވާ ކޯސްތައް:
1- ނޭޝަނަލް ސެޓްފިކެޓް 3 އިން ސްޕޯޓްސް ފިޝިންގ ގައިޑިންގ
2- ނޭޝަނަލް ސެޓްފިކެޓް 1 އިން ފިޝް ޕްރޮސެސިންގ އެންޑް ކޮލިޓީ ކޮންޓްރޯލް
3- ނޭޝަނަލް ސެޓްފިކެޓް 2 އިން ފިޝް ޕްރޮސެސިންގ އެންޑް ކޮލިޓީ ކޮންޓްރޯލް
4- ނޭޝަނަލް ސެޓްފިކެޓް 3 އިން ފިޝް ޕްރޮސެސިންގ އެންޑް ކޮލިޓީ ކޮންޓްރޯލް
ފުލްޓައިމް(ބްލެންޑެޑް)ކޮށް ހުރިހައި ކޯސްތަކެއްވެސް ހިންގުމަށް ހަމަޖެހިފައިވާއިރު، ސްޕޯޓްސް ފިޝިންގ ގައިޑިންގ ކޯސް ހިންގުމަށް ހަމަޖެހިފައިވަނީ މާލެ، ކުޅުދުއްފުށި އަދި އައްޑޫ ސިޓީގައެވެ. އަދި، އަނެއް 3 ކޯސް ހިންގަނީ މާލެ ސިޓީއާއި ލ. ގަމުގައި ކަމަށް އެމްއެންޔޫއިން ބުނެފައި ވެއެވެ.
ކޯސްތަކަށް އެޕްލައިކުރާނީ އޮންލައިންކޮށް portal.mnu.edu.mv ގައިވާ ޕޯރޓަލް މެދުވެރިކޮށް ކަމަށާއި، އިތުރު މަޢުލޫމާތު ބޭނުންވާނަމަ studentservices@mnu.edu.mv އަށް މެއިލް ކުރުމުން އަދި 1445 ފޯނާ ގުޅާލުމުން މައުލޫމާތު ލިބޭނެ އިންތިޒާމު ހަމަޖައްސާފައި ވާކަމަށް އެމްއެންޔޫއިން ބުނެއެވެ. މި ކޯސްތަކާ ބެހޭ މަޢުލޫމާތު courses.mnu.edu.mv/ އިން ބަލާލެވޭނެއެވެ.
ރާއްޖޭގައި ފުރަތަމަ ފަހަރަށް ފިޝަރީޒް ކޮލެޖެއް ޤާއިމުކުރެއްވުމަށް ނިންމަވާފައިވާކަން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އިއުލާނު ކުރެއްވީ މިދިޔަ އަހަރު ފާހަގަކުރި، ދިވެހިރާއްޖޭގެ 43 ވަނަ މަސްވެރިންގެ ދުވަހުގެ މުނާސަބަތުގައި ބޭއްވި ޖަލްސާގައި ދެއްކެވި ވާހަކަފުޅުގަ އެވެ. އަދި ފިޝަރީޒް ކޮލެޖް ގާއިމުކުރުމުގެ އެއްބަސްވުމަކަށް އެމްއެންޔޫއާއި ފިޝަރީޒް މިނިސްޓްރީއާ މެދު ފަހުމުނާމާއެއްގައި ސޮއިކޮށްފައިވަނީ މިދިޔަ އަހަރުގެ ޑިސެންބަރުމަހުގެ 27 ވަނަ ދުވަހު އެވެ. އެކޮލެޖަށް ޑީންއެއް ހަމަޖައްސާފައިވަނީ މިމަހުގެ 1 ވަނަ ދުވަހު އެވެ. އެ މަގާމަށް އައްޔަން ކުރައްވާފައިވަނީ މެރިން ސައެންސްގެ ދާއިރާއިން މަތީ ތައުލީމު ހާސިލުކުރައްވާފައިވާ ދާއިރާހެ ތަޖުރިބާކާރު ބޭފުޅެއްކަމުގައިވާ ޑރ. ރިޔާޒް ޖައުހަރީ އެވެ.