ދިވެހި ރާއްޖެއާއި ތުރުކީއާއި ދެމެދު އެކުލަވާލަމުންދާ މިނިވަން ވިޔަފާރީގެ އެއްބަސްވުން ނުވަތަ ”ޕްރިފަރެންޝިއަލް ޓްރޭޑް އެގްރީމެންޓް“ ގެ ދަށުން ރާއްޖެއިން ތުރުކީއަށް އެކްސްޕޯޓްކުރާ އައިޓަމްތަކުގެ ތެރެއިން ޑިއުޓީ އެއްކޮށް ކަނޑާލަން ތުރުކީން އެއްބަސްވި އައިޓަމްތަކުގެ ތެރޭގައި، ކަންނެއްޔާއި ހިކިމަސް ހިމެނޭކަމަށް އިކޮނޮމިކް މިނިސްޓަރު މުޙައްމަދު ސަޢީދު ވިދާޅުވެއްޖެ އެވެ.
ދައުލަތުގެ މީޑިއާ ޕީއެސްއެމްއިން ރޭ ގެނެސްދިން ރާއްޖެ މިއަދު ޕްރޮގްރާމްގައި، ތުރުކީއާއެކު ވެވޭ މިނިވަން ވިޔަފާރީގެ އެއްބަސްވުމުގެ މަސައްކަތްތައް ގޮސްފައިވާ ހިސާބު ހާމަކުރައްވަމުން މިނިސްޓަރު ވިދާޅުވީ، ރާއްޖެއިން ޖުމްލަ 214 ބާވަތެއް އެއްކޮށް ޑިއުޓީ ކަނޑާލަދިނުމަށް ހުށަހެޅިކަމަށާއި، އެހެންނަމަވެސް ތުރުކީއިން އެއްބަސްވީ އޭގެތެރެއިން 38 ބާވަތަކުން އެއްކޮށް ޑިއުޓީ ކަނޑާލާގޮތަށް ކަމަށެވެ. އަދި ދެން ހުރި އައިޓަމްތައްވެސް މިހާރު ނަގާ ޑިއުޓީއަށްވުރެ ވަރަށް ބޮޑުތަން ކުޑަކޮށްދިނުމަށް އެއްބަސްވެފައިވާ ކަމަށް މިނިސްޓަރު ވިދާޅުވި އެވެ.
”0 ޓެރިފްގައި ނުވަތަ އެއްގޮތަކަށްވެސް ރާއްޖެއިން ތުރުކީއަށް އެކްސްޕޯޓް ކުރާ އައިޓަމްގެތެރެއިން އެއްގޮތަކަށްވެސް ޑިއުޓީ ދައްކަން ނުޖެހޭ 38 އައިޓަމްއެއް އެބަޮއޮތް ލިބިފައި. މިއީ މީގެކުރިން އެއްވެސް ވަރަކަށް ލިބިފައިހުރި އައިޓަމްތަކެއް ނޫން.“ މިނިސްޓަރު ވިދާޅުވި އެވެ.
މިނިސްޓަރު ވިދާޅުވީ މީގެތެރޭގައި ސަރުކާރުން އެންމެ އިސްކަމެއް ދީގެން އޭގައި ހިމެނި އައިޓަމްގެ ގޮތުގައި ކަންނެއްޔާއި މަހުގެ ބާވަތްތައް ހިމެނޭކަމަށެވެ. އެގޮތުން، ކަޅުބިލަ މަހާއި، ރީނދޫ އުރަހަ ކަންނެލި، އަދި ލޯބޮޑު ކަންނެލީގެ އިތުުރުން، ހިކިމަހާއި، ހިކިމަހުގެ އެކި ބާވަތްތަކުން ތައްޔާރުކުރާ ކާނާވެސް ހިމެނޭ ކަމަށް މިނިސްޓަރު ވިދާޅުވި އެވެ. އެހެންކަމުން އެއްބަސްވުމުގައި ސޮއިކޮށް ތަންފީޒްކުރަން ފެށުމުން މިބާވަތްތައް ތުރުކީއަށް އެކްސްޕޯޓްކުރާއިރު އެއްވެސް ޑިއުޓީއެއް ދައްކާކަށް ނުޖެހޭނެއެވެ. ޑިއުޓީ މައާފްވީއެވެ. މިނިސްޓަރު ވިދާޅުވީ މީގެކުރިން މިފަދައިން ތުރުކީން މިބާވަތްތަކުން ޑިއުޓީ މައާފްކޮށްދީފައި ނުވާކަމަށާއި، މިގޮތަށް %0 ޓެރިފް ލިބިގެން ދިއުމަކީ ވަރަށް ބޮޑު ކުރިއެރުމެއްގެގޮތުގައި ދެކޭ ކަމަށެވެ.
މިނިސްޓަރު ވިދާޅުވީ، މިދިޔަ ބުރާސްފަތި ދުވަހު މިނިވަންވިޔަފާރީގެ އެއްބަސްވުން އެކުލަވާލެވި ނިމިފައިވާކަމަށާއި، އެއަަށް އަމަލުކުރަން ފެށުމުގެ މަސައްކަތް ފެށޭނީ އެގައުމުގެ ގާނޫނު ހަދާ މަޖިލީޙަށް ހުށަހަޅައި އެ ފަސްކުރެވިގެން ކަމަށެވެ. އެމަރުހަލާ ނިމި މިއަހަރުގެ ޑިސެންބަރު މަހު ފަހުކޮޅު ނުވަތަ ޖެނުއަރީ މަހުގެ ކުރީކޮޅު އެ އެއްބަސްވުން ތަންފީޒް ކުރެވޭވަރުވާނެކަމަށް މިނިސްޓަރު ވިދާޅުވި އެވެ.
ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ތުރުކީވިލާތަށް މިދިޔަ އަހަރު ފަހުކޮޅު ކުރެއްވި ރަސްމީ ދަތުރުފުޅުގައިވަނީ ރާއްޖެއިން އެޤައުމަށް އެކްސްޕޯޓުކުރާ މަހުގެ ޓެރިފް ކުޑަކުރުމަށް ގިނަ މަޝްވަރާތަކެއް ކުރައްވާފަ އެވެ. އެގޮތުން ދެ ޤައުމު ދެމެދު ވިޔަފާރީގެ ގުޅުން ބަދަހިކުރުމަށް ސޮއިކުރެވުނު އެއްބަސްވުމުގެ ތެރެއިން ރާއްޖެއާއެކު ޕްރިފަރެންޝަލް ޓްރޭޑް އެގްރިމެންޓް (ޕީޓީއޭ)ގައި ސޮއިކުރުމުގެ މަޝްވަރާތައް ފެށީ، މި އަހަރުގެ މާރިޗު މަހު އެވެ.