މާދަން ކޫއްޑޫ އޮޕަޜޭޝަނަށް ގެނެވޭވަރުވާނެ: ކެޔޮޅުން

މަސްވެރިން އަތުން ގަތް މަހަށް ދޭން ހުރި ފައިސާގެ ބައެއް މިފްކޯއިން ދޫކުރަން ފެށުމުން އިހުތިޖާޖު މެދުކަނޑާލަން މަސްވެރިން ނިންމައިފި އެވެ.

ކެޔޮޅާއާ ވާހަކަ ދެއްކި ކެޔޮޅުން ބުނީ މިފްކޯއިން ޕްރޮސެސް ކުރަން ބުނި 70 މިލިއަން ރުފިޔާ ބައެއް އޮޑިތަކަށް މިހާރު ލިބިފައިވާ ކަމަށެވެ. މިފްކޯއިން މިއަދާ މާދަމާ ޕްރޮސެސް ވާނެކަމަށް ބުނެފައިވާތީ މަޑުމަޑުން އިހުތިޖާޖު ރޫޅާލާ ބައެއް އޮޑިތައް މިހާރު ފުރަން ތައްޔާރުވަމުން އަންނަ ކަމަށް ކެޔޮޅުން ބުންޏެވެ. އަދި އިހުތިޖާޖު މެދުކަނޑާލުމުން މާދަމާ ކޫޢްޑޫގެ އޮަޕަރޭޝަން ފެއްޓޭނެކަމަށް ކެޔޮޅުން ބުންޏެވެ.

“ ބުނި ވަރަކަށް ނޫން އެ ފައިސާ ދޫކުރީކީ. 119 މިލިއަން ދޭން މިފްކޯ ސީއީއޯ ބުނި. އެކަމު މިރޭ މި ދޫކުރީ 70 މިލިއަން. މިއީ ވަކި ވަކި މަސްވެރިންނަށް ބަލަންޏާ ކިރިޔާ ކާލެވޭވަރު އެތިކޮޅެއް. އަހަރުމެންދެ ދަރަނި ދައްކާފައި އަސްލު ބުނަންޏާ މިއަކު ބާކީ އޮންނާނެ ވަރެއް ބުނާކަށްވެސް ނޭނގޭ. ކޮންމެއަކަސް މިތާ ތިބެވޭކަށްވެސް ނެތް ކާންބޯން މަސައްކަތްކުރަން އެބަޖެހޭ ވިއްޔާ“ ކެޔޮޅަކު ބުންޏެވެ.

ކެޔޮޅު ބުނީ ބީއެމްއެލް އެކައުންޓް ގެންގުޅޭ ގިނަ އޮޑިތަކަށް މިހާރު ފައިސާ ލިބިފައިވާ ކަމަށެވެ. އެހެންނަމަވެސް އިސްލާމިކް ބޭންކް އެކައުންޓް ގެންގުޅޭ އޮޑިތަކަށް އަދި ނުލިބޭކަމަށެވެ. ކެޔޮޅު ބުނީ މިވަގުތަށް އިހުތިޖާޖު މެދުކަނޑާލީ ކަމަށާއި، ވައުދުވެފައިވާ ގޮތަށް ފައިސާ ދައްކަމުން ނުދާނަމަ އަނެއްކާވެސް އިހުތިޖާޖަކަށް ދާން ޖެހިދާނެކަމަށެވެ.

ކޫއްޑުގައި މަސްވެރިން އިހުތިޖާޖު ކުރަން ފެށީ އާދީއްތަ ދުވަހު އެވެ. އެމީހުން ޑިމާންޑް ކުރީ މަސްވެރިންނަށް ދޭން ހުރި ހުރިހައި ފައިސާއެއް ވަގުތުން ދެއްކުމަށެވެ. އެހެންނަމަވެސް ސަރުކާރަށް އެއްފަހަރާ ފައިސާ ދެއްކެން ނެތުމުން މިހާރު ފައިސާ ދައްކަން ރާވާފައިވަނީ އެކި ފަހަރު މަތިން ބަހާލައިގެންނެވެ. އެހެންނަމަވެސް މާޗު މަހުގެ ނިޔަލަށް މަސްވެރިންނަށް ދޭން ހުރި ހުރިހާ ފައިސާ ދައްކާ ޚަލާސް ކުރާނެކަމަށް ފިޝަރީޒް މިނިސްޓަރ ވަނީ ވިދާޅުވެފަ އެވެ. އަދި މިހާރު ބާނާ މަހަށް ހަފުތާއިން ހަފުތާއަށް ފައިސާ ދެއްކޭނެ އިންތިޒާމު ހަމަޖައްސަމުންދާކަމަށްވެސް މިނިސްޓަރ ވިދާޅުވެފައި ވެއެވެ.

ސަރުކާރުން ފައިސާ ދައްކާނެކަމަށް ބުނާ ޓައިމްލައިން:

• މިދިޔަ ހަފުތާ ކިރި މަހުގެ 26 މިލިއަން ރުފިޔާ މި ހަފްތާ ތެރޭ ދޫކުރުން
• މިއަދާއި މާދަމާ 70 މިލިއަން ދޫކުރަން
• އަންނަ އާދިއްތަ ހޯމައިގައި 30 މިލިއަން ދޫކުރަން
• ބާކީ 180 މިލިއަން ރުފިޔާ މާޗު 5 އަށް ދީ ޚަލާސްކުރުން

ރައީސް ޑރ. މުއިއްޒުގެ ވައުދަކީ މަސްކިރާތާ 48 ގަޑިއިރުގެ ތެރޭގައި ފައިސާ ދެއްކުމެވެ. އެހެންނަމަވެސް ދައުލަތުގެ މާލިއްޔާގެ މިހާރު ހާލަތު ހުރި ގޮތުން މިކަން ވާކަށް ނެތެވެ. މިކަމާއި ގުޅިގެން މިނިސްޓަރު ވިދާޅުވީ ދައުރުގެ ކުރީކޮޅު މި ވައުދާ އެއްގޮތަށް ކަންކަން ރޭވޭނެ ގޮތް ހަމަޖެހިގެން ދާނެކަމަށެވެ.