މިފްކޯއިން މަސްވެރިންނަށް ފައިސާ ދޫކުރުމުގެ ޕްރޮސެސް ފަށައިިފި އެވެ.
މިފްކޯއިން މިރޭ ނެރުނު ނޫސްބަޔާނެއްގައި ބުނެފައިވަނީ، މިފްކޯގެ ކޫއްޑޫ ފިޝަރީޒް ކޮމްޕްލެކްސް ގައި މިފްކޯގެ ސީއީއޯ އާއި މެނޭޖްމަންޓް ޓީމުން މަސްވެރިންނާ ބައްދަލުކޮށް އެ ބޭފުޅުންގެ އުދާސްތަކާއި ޝަކުވާތައް ވަރަށް ގާތުން އަޑުއަހާފައިވާ ކަމަށެވެ.
”މަސްވެރިން ތަހައްމަލު ކުރަމުން ގެންދަވާ މޮޅިވެރިކަމަށް ނިމުން ގެނައުމަށް މިފްކޯގެ މެނޭޖްމަންޓުން އަބަދުވެސް މަސައްކަތް ކުރާނެ. މި ބައްދަލުވުންތަކުގައި މަސްވެރިން ދެއްކެވި ރިވެތި ނަމޫނާ އާއި އެބޭފުޅުން ބެހެއްޓެވިގާތްކަން ނުހަނު އުފަލާއެކު ބަލައިގަންނަން. މިފްކޯގެ ބަޔާނުގައި ވެއެވެ.
ބަޔާނުގައި ބުނެފައިވަނީ މަސްއޮޑިފަހަރަށް ދޭންޖެހޭ ފައިސާ ދޫކުރުމުގެ ހައްލު ހޯދައިިދިނުމަށް ކަމާއި ބެހޭ ވުޒާރާތަކާއި، މަސްވެރިން ހިމެނޭގޮތަށް، ގުޅިގެން މިފްކޯގެ މެނޭޖްމެންޓް ޓީމުން މެދު ކެނޑުމެއް ނެތި މަސައްކަތް ކުރަމުން ގެންދާނެ ކަމަށެވެ. އަދި ކޫއްޑޫގައި ބޭއްވި ބައްދަލުވުންތަކުގައި ފާހަގަކުރި ގޮތަށް މަސްވެރިންނަށް ފައިސާ ދޫކުރާނެ ގޮތުގެ ތަފުސީލުތައް ހިއްސާކޮށްފައިވާ ގޮތަށް މިއަދުން ފެށިގެން ފައިސާ ދޫކުރުމުގެ ޕްރޮސެސް ކުރިޔަށް ގެންދާނެ ކަމަށެވެ.
މިފްކޯއިން އަބަދުވެސް މަސައްކަތް ކުރަމުން ގެންދަނީ މަސްވެރިންނަށް ދެވޭ ޚިދުމަތުގެ ފެންވަރު ރަނަގޅުކުރުމަށާއި، އަވަސް ޚިދުމަތް ފޯރުކޮށްދީ މަސްވެރިންގެ ކަންބޮޑުވުންތައް ބަލައިގަނެ އެ ކުންފުނިން ދޭ ޚިދުމަތަކީ، މަސްވެރިންނަށް ފަސޭހަ ޚިދުމަތަކަށް ހެދުމަށް ކަމަށް މިފްކޯއިން ބުނެފައި ވެއެވެ.
މިފްކޯއިން ވަނީ މި ދަނޑިވަޅުގައިވެސް މަސްވެރިންގެ ފަރާތުން ފެނިގެންދާ ކެތްތެރިކަމާއި، އެ ކުންފުންޏަށް ދޭ އެއްބާރުލުން ފާހަގަކޮށް ޝުކުރު އަދާކޮށްފަ އެވެ.