މިހާރު މަސްވެރިންގެ ބެކްލޮގްގައި ހުރި ތިން ހަފުތާގެ ފައިސާ އަންނަ ހަފުތާގެ ތެރޭގައި ދެއްކުމަށް މަސައްކަތް ކުރަމުން އަންނަ ކަމަށް މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ(މިފްކޯ)އިން ބުނެފި އެވެ.
މިފްކޯގެ ޕަބްލިކް ރިލޭޝަންސް ޑެޕިއުޓީ މެނޭޖަރ އިބްރާހިމް ސައީދު (ކޭޑު) ވިދާޅުވީ، ތިން ހަފްތާގައި މަސްވެރިން އަތުން މަސްގަނެފައި، ނުދެއްކި މިހާރު 10 މިލިއަން ރުފިޔާ ބެކްލޮގްގައި އެބަހުރި ކަމަށާއި، ފިނޭންސް މިނިސްޓްރީއާ ގުޅިގެން ވީހާވެސް އަވަހަށް އެ ފައިސާ ދައްކައި ޚަލާސްކުރެވޭތޯ މަސައްކަތް ކުރަމުން އަންނަކަމަށެވެ.
”މިހާރު މިއޮތް ދަތި ހާލުގަވެސް ފަންޑު ބޮރޯ ކުރެވޭތޯ ފިނޭންސް އާ ތަންތަނާ ވާހަކަ ދައްކަމުން މިދަނީ. އަންނަ ހަފްތާގަ މިފްކޯއަށް އެބޮތް ފަންޑު ބޮރޯކުރެވެން. އިރާދަ ކުރެއްވިއްޔާ އެ ފަންޑު ލިބުނުހާ އަވަހަކަށް، މި ފެށޭ ސެޕްޓެންބަރު ފުރަތަމަ ހަފްތާގަ ފައިސާ ދައްކަން ފަށާނަން. އެޔަވުރެ އަވަހަށްވެސް ލިބިއްޖެއްޔާ ހުޅުވޭ ހަފްތާގަވެސް ދޫކުރާނަން.“ ސައީދު ވިދާޅުވި އެވެ.
ސައީދު ވިދާޅުވީ، ފައިސާ ދައްކާނެ ސީދާ ވަކި ދުވަހެއް އަދި ބުނެވެންނެތީ ފަންޑު މިފްކޯއަށް ލިބިފައި ނުވާތީކަމަށާއި، އެހެންނަމަވެސް، ފަންޑް ލިބުމުން ލަސްނުކޮށް ތިން ހަފްތާގެ ޕެންޑިން ޕޭމަންޓް އެއްކޮށް ދައްކާނެކަމަށް ސައީދު ވިދާޅުވި އެވެ.
ސައީދު ވިދާޅުވީ މިފްކޯއަށް ބޭނުންވާ މިންވަރަށް މަސް ނުލިބޭތީ މިދުވަސްކޮޅު އާމްދަނީ ހޯދުމުގައި ދަތިތަކެއް އުޅޭކަމަށެވެ. މިވަގުތު މިފްކޯގެ ފެސިލިޓީތަކަށް މަސް ކިރެނީ ކިރިޔާ ކޭނަރީތަކުގެ ޕްރޮޑަކްޝަނަށް ބޭނުންވާ މިންވަރަށްކަމަށެވެ.
”މިއުޅެނީ ބަލްކް އެއްޗެއް ނުލިބިގެން، ފުރޯޒެން އެއްޗެއް ވެސް ނުލިބިގެން. މިފްކޯއަށް ދުވާލަކު 150ޓަނު މަސް ބޭނުންވޭ. އެކަމަކު މިހާރު މިލިބެނީ 30-40ޓަނުގެ މަސް. އެހެންވީމަ އެ މަސް މިޖެހެނީ ގުރުބާން ކޮށްލަން ކޭނަރީ އަށް.“ ސައީދު ވިދާޅުވި އެވެ.
މިފްކޯއަށް މަސް ލިބުމުގައި ދަތިތަކެއް އުޅެނީ، ބައެއް އޮޑީ ފަހަރު މަހަށް ނުދާތީއާއި، މަހަށްދާ ބައެއް އޮޑިފަހަރުތަކުންވެސް މިފްކޯގެ ފެސިލިޓީތަކަށް މަސް ނުކުރާތީ އެވެ. އެކަން ހައްލުކޮށް މަސްވެރިންނަށް ހިތްވަރު ދިނުމުގެ ގޮތުން މިމަހުގެ 22 ވަނަ ދުވަހު އެ ކުންފުންޏަށް މަސް ކިރާ އޮޑިފަހަރަށް، ކޮންމެ އޮޑިއަކަށްވެސް، 3 ޓަނުގެ މަގުން އައިސް ބަހަން ފުރުސަތު ހުޅުވާލި އެވެ. އެފުރުސަތުގައި އައިސް ނަގަންދިޔަ 24 މަސް ދޯންޏަކަށް ޖުމްލަ 68 ޓަނު އައިސް ދޫކޮށްފައި ވެއެވެ. އެއީ، 51،000 ރުފިޔާގެ އައިހެވެ.
މަސްވެރިން މަހަށް ނިކުންނަށް ހިތްވަރު ދިނުމުގެ ގޮތުން، މިއަދު މިފްކޯއިން ވަނީ 10 ޓަނުގެ އައިސް ކްރެޑިޓަށް ދޫކުރަން ފަށާފައެވެ. މިފްކޯއިން ބުނީ، އެ ކުންފުންޏަށް މަސް ކިރާ އޮޑިފަހަރަށް އެކި މިއަދުން ފެށިގެން އެކި ފަހަރުމަތިން10 ކިލޯއާ ހަމަޔަށް އައިސްނެގޭނެކަމަށެވެ. އަދި މަސްވެރިން މިފްކޯގެ ފެސިލިޓީތަކަށް ކިރާ މަހުގެ ބިލަށް ފައިސާ ދޫކުރާނީ އައިހަށް ވާފައިސާ އުނިކުރުމަށްފަހު ކަމަށް މިފްކޯއިން ބުނެފައި ވެއެވެ.
މިފްކޯއިން މާލީ ހާލަތު މިވަގުތު ވަރަށް ދަށްކޮށް އޮތުމާއެކު، ފިޝަރީޒް މިނިސްޓްރީއާއި، ފިނޭންސް މިނިސްޓްރީގެ އިރުޝާދާއެކު ކުންފުނި ހަމަމަގަށް އެޅުވުމަށް އެކުންފުނިން ދަނީ ގިނަ މަސައްކަތްތަކެއް ކުރަމުންނެވެ. އެގޮތުން، މިހާރުކުރިޔަށްގެންދާ އެފިޝެންސީ އެކްސަސައިޒާއެކު، އެކުންފުންޏަކީ ފައިދާގަ ހިންގައިގެން ދައުލަތަށް ޑިވިޑެންޑް ދައްކާނެ ކުންފުންޏަކަށް ވެގެންދާނެކަމަށް މީގެ ކުރިން މިފްކޯއިން ބުނެފައި ވެއެވެ.
މިފްކޯ އެފިޝެންސީ އެކްސަސައިޒްގައި އެ ކުންފުނިން މިހާރު އުފައްދާ ކަނޑުމަހުގެ ބާވަތްތައް ބައިނަލްއަގްވާމީ ބާޒާރުގައި އިސްތިހާރުކޮށް ވިއްކުމަށް ގެންގުޅޭނެ އައު މާކެޓިން ޓެކްނިކްތަކާއި، އައު މާކެޓްތައް ހޯދުމާއި، ކޮލެޓީ ކޮންޓްރޯލް ކުރުމުގައި ގެންގުޅޭ މިންގަނޑުތައް މުރާޖައާކުރުން ހިމެނެއެވެ. އަދި ވެސެލް މޫވްމަންޓް އޮޕަރޭޝަން ކުރިއަށް ގެންދިއުމާއި، ލޯކަލް ޕްރޮޑަކްޓްތައް ފުޅާކުރުމާއި، އަލަށް ކުރެވިދާނެ ވިޔަފާރިތައް ބަލައި ހަރުދަނާކުރުން ހިމެނެއެވެ.
މީގެ އިތުރުން، ކަނޑު މަހުގެ ރިޖެކްޝަން ހުންނަ މިންވަރާއި ފިޝް ކަލެކްޝަން އަދި އޮޕަރޭޝަންގެ ކަންކަން ހަރުދަނާކުރުމަށް މަސް ކިރާ ވަގުތުން ފެށިގެން އެކްސްޕޯޓް ޕްރޮސެސް ނިމެންދެން މޮނިޓަރިން މެކޭނިޒަމެއް ތައާރަފް ކުރުންވެސް އެފިޝިއެންސީ އެކްސަސައިޒްގައި ހިމެނެއެވެ.