ދ. ހުޅުދެލީގައި މަސްވެރިކަން ކުރަމުން އައި ނަސްރު-2 ދޯނި ވިއްކާލަން އެ ދޯނީގެ ވެރިފަރާތުން ނިންމައިފި އެވެ.
ނަސްރު-2 ދޯންޏަކީ، ދިގުމިނުގައި 27.6 މީޓަރު އަދި ފުޅާ މިނުގައި 7.8 މީޓަރުގެ ބޮޑުމިނުގެ، 30 ޓަނަށް ވުރެ ގިނަ މަސް ރައްކާކުރެވޭ ގޮތަށް ފަރުމާކޮށްފައިވާ ރަނގަޅު ހާލަތެއްގައި އޮތް ދޯންޏެކެވެ. ވެރި ފަރާތުން އެ ދޯނި ވިއްކަން ނިންމާފައިވަނީ 5.5 މިލިއަން ރުފިޔާއަށެވެ. އެހެންނަމަވެސް ގަންނަން ބޭނުންވާ ފަރާތްތަކަށް އަގު ”ނެގޯޝިއޭޓް“ ކުރެވޭނެކަމަށް ވެރި ފަރާތުން ބުނެފައި ވެއެވެ.
ދޯނި ވިއްކާލަނީ އޭގައި އަޅާފައި ހުރި ދެ އިންޖީނާއި، ޖީޕީއެސް(ޓްރާންސްޑޫސަރާއެކު)އާއި، ދޮށްޓާއި، އެން ދަމަން ބޭނުންކުރާ ދަލާއި، ލައިޓްތަކާއި އެކުގަ އެވެ. ދޯނި ގަންނަން ޝައުގުވެރިވާ ފަރާތްތަކުން 9900590 ނުވަތަ 7300593 އަށް ގުޅާލުމުން އިތުުރު މައުލޫމާތު ދޭނެކަމަށް ވެރިފަރާތުން ބުނެފައި ވެއެވެ.
ދޯނި ވިއްކުމުގެ މުއާމަލާތްތައް ކުރުމުގައި އިސްކޮށް ހަރަކާތްތެރިވަމުން އަންނަ، ފަރުހާދުބުނީ، ދޯނި ވިއްކާލަނީ އާ ދޯންޏެއް ބަނުމުގެ މަސައްކަތް ކުރަމުންދާތީ ކަމަށެވެ. އެދޯނީގެ މަސައްކަތް ޑިސެންބަރު މަހުގެ ނިޔަލަށް ނިމޭނެ ކަމަށް ދޯނި ބަންނަ ފަރާތުން ބުނެފައިވާތީ އޭގެ ކުރިން މިދޯނި ވިއްކާލަން ގަސްތު ކުރަނީ ކަމަށް ފަރުހާދު ބުންޏެވެ.
ނަސްރު-2 ދޯނި ގަންނަން ޝައުގުވެރިވެގެން ބައެއް ފަރާތްތަކުން މީހުން ގުޅަމުން އަންނަކަމަށް ފަރުހާދު ބުންޏެވެ. އެހެންނަމަވެސް، ގަންނަން ބޭނުންވާ ފަރާތްތަކަށް އެއް ފަހަރާ ފައިސާ ދެއްކޭނެގޮތް ނެތުމާއި، މަސްވެރި ދޯންޏެއް ވީމައި ލޯނުނެގުމުގެ ކަންކަން އޮންނަ ގޮތުން ގަންނަން ދަތިކަމަށް ބައެއް ފަރާތްތަކުން ބުނެފައިވާކަމަށް ފަރުހާދު ބުންޏެވެ.
އަލަށް ބަންނަ ދޯނި ފަރުމާކޮށްފައިވަނީ، އެންމެ ފަހުގެެ ޒަމާނީ ޓެކްނޯލޮޖީއާއެކު، އާރްއެސްޑަބްލިއު ސިސްޓެމްއާއި ރާޑާ ސިސްޓަމާއެކުގައި ކަމަށް އޭނާ ބުންޏެވެ. މިީއީ 116 ފޫޓް ގެ ބޮޑު މިނުގެ އަދި ކުރީ ދޯންޏާ އަޅާ ކިޔާއިރު ދެގުނަ އިތުރަށް މަސް ރައްކާކުރެވޭގޮތަށް ޑިޒައިންކޮށްފައިވާ ދޯންޏެއްކަމަށްވެސް ފަރުހާދު ބުންޏެވެ.
”މިހާރު ދުއްވާ ދޯނި ކުޑަވެފަ ޚަރަދުބޮޑުވަނީ، އައިސް އަޅަންޖެހުމާ، ތަންކޮޅެއް ދުރުން މަސް ބާނައިގެން އެ ކިރަން ގޮއްސަ އެ އޮންނަންޖެހޭ ވަގުތާ އެހުރިހައި ކަމަކަށް ބަލާފައި އެހާ ރަނގަޅުގޮތަކަށް ނުވާތީ ވިއްކާލަނީ މިހާރު ބަންނަ ދޯނީގައި 80 ވަރަކަށް ޓަނުގެ މަސް ރައްކާ ކުރެވޭނެކަމަށް ބަލައިގެން އޮގޮތަށް ބޮޑު ދޯނީގެ ނިޒާމް ބަދަލުކުރަނީ.“ ފަރުހާދު ބުންޏެވެ.
ފަރުހާދު ބުނީ، ނަސްރު-3 ބަންނަނީ ގެސްޓުންނާއެކު ލޯކަލް ފިޝިން އަށްދެވޭގޮތަށް ކަމަށެވެ. އެހެންނަމަވެސް ގާނޫނާއި ގަވައިދުތައް މިހާރި އޮތްގޮތުން އެކަމަށް ބޭނުންވާ ހުއްދަ ލިބޭނެ އިންތިޒާމު އަދި ހަމަނުޖެހޭ ކަމަށް ފަރުހާދު ބުންޏެވެ.
“ ސަފާރީތަކަށް އެ ހުއްދަވެސް ދީފައި މިއޮންނަނީ. ވަރަށް މަސައްކަތް ކުރެވިއްޖެ މިނިސްޓްރީތަކާއެކު ވާހަކަ ދައްކައިގެން. އަދި ނެތް ވާގޮތެއް. 10 ދުވަހުގެ ޕެކޭޖެއްގެ ތެރެއިން 5 ދުވަހު ގެސްޓުން ލޯކަލް ޓޫނާ މަސްވެރިކަން ތަޖުރިބާކޮށްލެވޭ ޕްލޭން އޮއްކޮށް ރެޑީކޮށްފައި އޮތީ. ފެއާތަކަށް ގޮސް ޕްރޮމޯޓްވެސް ކޮށްފިން. އަސްލު ބޭނުންވަނީ ރާއްޖޭގައި މިއޮންނަ ޓޫނާ ފިޝިންގް ތަޖުރިބާކޮށްލުމުގެ ފުރުސަތު ފަތުރުވެރިންނަށް ހޯދައިދޭން.“ ފަރުހާދު ބުންޏެވެ.
ނަސްރު-3 ދޯންޏަކީ ފަރުހާދުގެ އާއިލާން ބަންނަ 5 ވަނަ މަސްއޮޑިއެވެ.