ބ .ތުޅާދޫގައި މަސް މާރުކޭޓެއް އަޅައިދޭނެ ފަރާތެއް ހޯދަން އެރަށު ކައުންސިލުން އިއުލާނުކޮށްފި އެވެެ.
ތުޅާދޫ ކައުންސިލުން ބުނީ، މަސް މާރުކޭޓު ޢިމާރާތްކުރުމަށް ހަމަޖެހިފައިވަނީ ބ. ތުޅާދޫ ބަނދަރުގެ ހުޅަނގުކޮޅުން، އެރަށުގެ ލޭންޑް ޔޫޒް ޕްލޭންގައި އެކަމަށް ކަނޑައަޅާފައިވާ ސަރަޙައްދުގައި ކަމަށެވެ. އެގޮތުން، މާރުކޭޓް އަޅަން 11 މީޓަު ފުޅާ ދިގުމިނުގައި 32 މީޓަރު ހުންނަގޮތަށް ޖުމްލަ 3788 އަކަފޫޓުގެ ބިމެއް ވަނީ ކަނޑައަޅާފަ އެވެ.
މި މަޝްރޫޢު ހިންގުމަށް ހަމަޖެހިފައިވަނީ ކޮންޓްރެކްޓަރ ފައިނޭންސް އުސޫލުން މަޝްރޫޢާ ޙަވާލުވާ ކޮންޓްރެކްޓަރު މަޝްރޫޢުގެ އެންމެހައި ޚަރަދުތަކަށް ޒިންމާވާގޮތަށް ކަމުން، މަސްމާރުކޭޓަށް ޖުމްލަ ކަޑައެޅިފައިވާ 3788 އަކަފޫޓު ބިމުގެތެރެއިން މަސްމާރުކޭޓު އެޅުމަށްފަހު ބާކީ
އޮތްބައިގައި އިމާރާތްކޮށްގެން ބޭނުންކުރުމުގެ ފުރުޞަތު ކޮންޓެކްޓަރަށް އޮވެއެވެ. ކައުންސިލުން ބުނީ،، މަސްމާރުކޭޓް އެޅުމަށް 2000 އަކަފޫޓު ބޭނުން ކުރަންވާނެކަމަށާއި، މަސްމާރުކޭޓު އަޅާ އިމާރާތުގެ މަތީބައި ބުރިބުރިއަށް ނަގައިގެން ބޭނުންކުރުމުގެ ފުރުޞަތުވެސް
ކޮންޓްރެކްޓަށް ދޭނެކަމަށެވެ. އަދި، އިމާރާތުގެ މަތީބައި ކޮންޓްރެކްޓަރަށް 30 އަހަރު ދުވަހުގެ މުއްދަތަށް އެއްވެސް ކުއްޔަކާ ނުލައި ދިނުމަށް ނިންމާފައިވާ ކަމަށް ކައުންސިލުން ބުނެފައި ވެއެވެ.
ކައުންސިލުން މިހާރު ވަނީ މަސްމާރުކޭޓް އަޅަން ޝަޢުޤުވެރިވާ ފަރާތްތަކަށް މިމަހުގެ 27 ވަނަ ދުވަހުން ފެށިގެން ޕްރޮޕޯސަލް ހުށަހެޅުމުގެ ފުރުސަތު ހުޅުވާލާފަ އެވެ. މިމަހުގެ 8 ވަނަ ދުވަހުގެ މެންދުރުފަހު 13:00 ގެ ކުރިން ޕްރޮޕޯސަލް ހުށަހަޅަން ޖެހެއެވެ. ކައުންސިލުން ބުނީ އެއިދާރާގެ ކައުންޓަރުންނާއި އީމެއިލްގެ ޒަރީއާއިންވެސް ޕްރޮޕޯސަލް ހުށަހެޅޭނެ ކަމަށެވެ. އީމެއިލް ކުރާނީ info@thulhaadhoo.gov.mv އަށެވެ.
ތުޅާދޫ ކައުންސިލުން މަސް މާރުކޭޓެއް އަޅަން ނިންމީ، އެރަށަކީ މަސްވެރި ރަށަކަށް ވެފައި މަސްވެރިކަމަކީ ރަށުގެ އިގްތިޞާދުގެ ބޮޑު އިންސައްތައެއް ހިމެނޭ މަސައްކަތަކަށްވާތ،ީ މަސްވެރިންނަށް ރަށުގައި މަސް ކެނޑުމަށް ދިމާވަމުން އަންނަ ދަތިތައް ހައްލުކޮށް ލުއިފަސޭހަ ގޮތެއްގައި މަސް ކެނޑޭނެ އިންތިޒާމު ހަމަޖައްސައިދިނުމުގެ ގޮތުންނެވެ. އަދި، މަސް ވިއްކާ ފަރާތްތަކަށާއި ގަންނަ ފަރާތްތަކަށް ފަސޭހަ ނިޒާމެއްގެ ދަށުން އެކަންކަން ކުރާނެ ތަނެއް ހޯދައިދ،ީ ތުޅާދޫގައި އޮތް މަސްވެރިކަމުގެ އިޤްތިޞާދު ކުރިއަރުވައި ފުޅާކުރުމަށްޓަކައި މިވަގުތަށް
އެންމެ ބޭނުންޖެހިފައިވާ އެއް ކަމަކީ މަސްމާރުކޭޓު ޢިމާރާތްކުރުން ކަމަށްވާތ،ީ ޒަމާނީ ފެންވަރުގެ މަސް މާރުކޭޓެއް ގާއިމުކޮށްދިނުމުގެ ބޭނުމުގައި ކަމަށް ކައުންސިލުން ބުނެފައި ވެއެވެ.
މަސް މާރުކޭޓް އަޅަނީ، ކަނޑުމަސް ކެނޑުމަށް ޚާއްސަކޮށް މަދުވެގެން 12 ސްޓޭޝަނާއި، ފަރުމަސް ކެނޑުމަށް ޚާއްސަކޮށް މަދުވެގެން 06 ސްޓޭޝަނާއި، މަސް ގަންނަ ފަރާތްތަކަށް ފަސޭހައިން ހިނގާ ބިނގާވެ އުޅެވޭނެގޮތަށް ޕްލެޓްފޯމާއި ވޯކްވޭއާއި، އެޑްމިނިސްޓްރޭޓިވް އޮފީސް ހިންގުމަށް ބޭނުންކުރާނެ ކޮޓަރިއަކާއި، 2 ފާޚާނާއާއި 4 މީހުންނަށް އެއް ފަހަރާ ބޭނުންކުރެވޭ ފެންވަރާ ތަނަކާ އެކުގައެވެ.