އިންޑިއާ ކަނޑުގެ އައްސޭރިފަށުގެ ގައުމުތަކުގެ މެދުގައި މަސްވެރިކަން ރާވާ، ހިންގައި، ބެލެހެއްޓުމުގައި ސައިންސްގެ ދައުރު އިތުރަށް ފުޅާކުރުމާއި އަދި ބެލެހެއްޓުމުގައި އަޅާ ފިޔަވަޅުތަކާއި ބެހޭ ގޮތުން އެއްބަސްވާއިރު އަމަލުކުރާނެ ގޮތްތަކާއި ބެހޭ މެނޭޖްމަންޓް ސްޓްރެޓެޖީ އިވެލުއޭޝަން ތަމްރީން ޕްރޮގްރާމް ފަށައިފި އެވެ.
ދިވެހިރާއްޖެއާއި އިންޑިއަން އޯޝަން ޓޫނާ ކޮމިޝަންއާއި ގުޅިގެން ކުރިޔަށްގެންދާ މި މަސައްކަތު ބައްދަލުވުން އިއްޔެ ފަށާފައިވާއިރު، މި ތަމްރީން ޕްރޮގްރާމްގައި އިންޑިއާ ކަނޑުގެ އައްސޭރިފަށުގެ 16 ގައުމަކުން 36 މަންދޫބުން ބައިވެރިވެވަޑައިގަންނަވަ އެވެ. އޭގެތެރޭގައި، ސައުތު ޕެސިފިކްގެ ސައިންޓިސްޓުންނާއި އިންޑިއަން އޯޝަން ޓޫނާ ކޮމިޝަންގެ ސައިންޓިފިކް ކޮމެޓީގެ ޗެއަރ އަދި އެކި ކޮމެޓީތަކުގެ އެންމެ ފުންނާބު އުސް ސައިންޓިސްޓުން ހިމެނެއެވެ.
ބަޑޮސް މޯލްޑިވްސްގައި ތިން ދުވަހުގެ މުއްދަތަކަށް ކުރިޔަށްދާ މި މިތަމްރީން ޕްރޮގްރާމް އިފްތިތާޙް ކޮށްދެއްވީ މިނިސްޓްރީ އޮފް ފިޝަރީޒް އެންޑް އޯޝަން ރިސޯސަސްގެ ޕާމަނަންޓް ސެކްރެޓަރީ ޑރ. އާމިނަތު ޝާފިއާ އެވެ. އެކަމަނާގެ ވާހަކަފުޅުގައި މި ތަމްރީން ޕްރޮގްރާމްގެ މުހިއްމުކަމާއި އަދި އިންޑިއާ ކަނޑުގައި ކުރެވޭ މަސްވެރިކަން ރާވާ، ހިންގައި، ބެލެހެއްޓުމަށް އަޅާ ފިޔަވަޅުތަކުގައި އައްސޭރިފަށުގެ ގައުމުތަކުގެ ބައިވެރިވުން އިތުރުކުރުމުގެ މުހިއްމުކަމުގެ މައްޗަށް އަލިއަޅުއްވާލައްވާފައި ވެއެވެ. އަދި، މިފަދަ ތަމްރީން ޕްރޮގްރާމްތައް ބޭއްވުމަކީ އައްސޭރި ފަށުގެ ގައުމުތައް ބާރުވެރިކުރުމުގައި އިސް ދައުރެއް އަދާކުރާނެ ކަމެއްގެ ގޮތުގައި އެކަމަނާ ފާހަގަކުރައްވާފައި ވެއެވެ.
މި ވޯކްޝޮޕްގައި ކަމާގުޅޭ މިނިސްޓްރީތަކާއި، ސަރުކާރުގެ މުއައްސަސާތަކާއި އިދާރާތަކުގެ މަންދޫބުންވެސް ބައިވެރި ވަޑައިގަންނަވަ އެވެ. މިބައްދަލުވުން މާދަމާގެ ނިޔަލަށް ކުރިޔަށްދާނެއެވެ.