ފިޝަރީޒް ކޮލެޖުން ފަށާ މަސްވެރިކަމުގެ ދާއިރާގެ ކޯސްތަކުގައި ބައިވެރިވުމުގެ ފުރުސަތު ހުޅުވާލައިފި

ކޮލެޖް އޮފް ފިޝަރީޒް އެންޑް އޯޝަން ސައިންސަސް އިން މިއަހަރު ހިންގުމަށް ހަމަޖެހިފައިވާ ހަތަރު ކޯހުގައި ބައިވެރިވުމުގެ ފުރުސަތު މޯލްޑިވްސް ނެޝަނަލް ޔުނިވަސިޓީން މިއަދު ހުޅުވާލައިފި އެވެ.

މޯލްޑިވްސް ނެޝަނަލް ޔުނިވާސިޓީ(އެމްއެންޔޫ) މިއަދު ބުނީ، 2024 ވަނަ އަހަރުގެ ދެވަނަ ޓާމުގައި އެ ޔުނިވަރސިޓީގެ ފެށުމަށް ހަމަޖެހިފައިވާ ކޯސްތަކުގެ ތެރޭގައި މަސްވެރިކަމުގެ ދާއިރާގެ ހަތަރު ކޯހެއް ހިންގުމަށް ހަމަޖެހިފައިވާކަމަށާއި މިއަދު ހެނދުނު 10:00 ގައި އެޕްލައި ކުރުމުގެ ފުރުސަތު ހުޅުވާލާފައިވާކަމަށެވެ. އަދި މި ކޯސްތައް ހިންގާނީ ކޮލެޖް އޮފް ފިޝަރީޒް އެންޑް އޯޝަން ސައިންސަސްގެ ދަށުން ކަމަށް ބުނެފައި ވެއެވެ.

ކޮލެޖް އޮފް ފިޝަރީޒް އެންޑް އޯޝަން ސައިންސަސް އިން ހިންގުމަށް ހަމަޖެހިފައިވާ ކޯސްތައް:

1- ނޭޝަނަލް ސެޓްފިކެޓް 3 އިން ސްޕޯޓްސް ފިޝިންގ ގައިޑިންގ

2- ނޭޝަނަލް ސެޓްފިކެޓް 1 އިން ފިޝް ޕްރޮސެސިންގ އެންޑް ކޮލިޓީ ކޮންޓްރޯލް

3- ނޭޝަނަލް ސެޓްފިކެޓް 2 އިން ފިޝް ޕްރޮސެސިންގ އެންޑް ކޮލިޓީ ކޮންޓްރޯލް

4- ނޭޝަނަލް ސެޓްފިކެޓް 3 އިން ފިޝް ޕްރޮސެސިންގ އެންޑް ކޮލިޓީ ކޮންޓްރޯލް

ފުލްޓައިމް(ބްލެންޑެޑް)ކޮށް ހުރިހައި ކޯސްތަކެއްވެސް ހިންގުމަށް ހަމަޖެހިފައިވާއިރު، ސްޕޯޓްސް ފިޝިންގ ގައިޑިންގ ކޯސް ހިންގުމަށް ހަމަޖެހިފައިވަނީ މާލެ، ކުޅުދުއްފުށި އަދި އައްޑޫ ސިޓީގައެވެ. އަދި، އަނެއް 3 ކޯސް ހިންގަނީ މާލެ ސިޓީއާއި ލ. ގަމުގައި ކަމަށް އެމްއެންޔޫއިން ބުންޏެވެ.

އެމްއެންޔޫއިން ބުނީ، މިއަދުން ފެށިގެން 03 ސެޕްޓެންބަރު ވާ އަންގާރަ ދުވަހުގެ މެންދުރުފަހު 14:00 ނިޔަލަށް ކޯސްތަކަށް ކުރިމަތިލުމުގެ ފުުރުސަތު ހުޅުވާލާފައިވާކަމަށެވެ. ކޯސްތަކަށް އެޕްލައިކުރާނީ އޮންލައިންކޮށް portal.mnu.edu.mv ގައިވާ ޕޯރޓަލް މެދުވެރިކޮށް ކަމަށާއި، އިތުރު މަޢުލޫމާތު ބޭނުންވާނަމަ studentservices@mnu.edu.mv އަށް މެއިލް ކުރުމުން އަދި 1445 ފޯނާ ގުޅާލުމުން މައުލޫމާތު ލިބޭނެ އިންތިޒާމު ހަމަޖައްސާފައިވާކަމަށް އެމްއެންޔޫއިން ބުނެއެވެ. މި ކޯސްތަކާ ބެހޭ މަޢުލޫމާތު courses.mnu.edu.mv/ އިން ބަލާލެވޭނެއެވެ.

ރާއްޖޭގައި ފުރަތަމަ ފަހަރަށް ފިޝަރީޒް ކޮލެޖެއް ޤާއިމުކުރެއްވުމަށް ނިންމަވާފައިވާކަން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އިއުލާނު ކުރެއްވީ މިދިޔަ އަހަރު ފާހަގަކުރި، ދިވެހިރާއްޖޭގެ 43 ވަނަ މަސްވެރިންގެ ދުވަހުގެ މުނާސަބަތުގައި ބޭއްވި ޖަލްސާގައި ދެއްކެވި ވާހަކަފުޅުގަ އެވެ. އަދި ފިޝަރީޒް ކޮލެޖް ގާއިމުކުރުމުގެ އެއްބަސްވުމަކަށް އެމްއެންޔޫއާއި ފިޝަރީޒް މިނިސްޓްރީއާ މެދު ފަހުމުނާމާއެއްގައި ސޮއިކޮށްފައިވަނީ މިދިޔަ އަހަރުގެ ޑިސެންބަރުމަހުގެ 27 ވަނަ ދުވަހު އެވެ.