މިހާރު ކުރިމަތިވެފައި މިވާ ބަޖެޓްުގެ ތާށިކަމާއެކުވެސް ބޭނުންވަނީ، މިއަހަރުގެ މަސްވެރިންގެ ދުވަހަކީ ފަހުގެ ތާރީޚެއްގައި ފާހަގަ ކުރެވޭ އެންމެ ފުރިހަމަ މަސްވެރިންގެ ދުވަހަށް ހެދުމަށް ކަމަށް މިނިސްޓްރީ އޮފް ފިޝަރީޒް އެންޑް އޯޝަން ރިސޯސަސް އިން ބުނެފި އެވެ.
މި އަހަރުގެ މަސްވެރިންގެ ދުވަސް ގައުމީ ފެންވަރެއްގައި ފާހަގަކުރުމަށް ސަރުކާރުން ނިންމާފައިވާއިރު، ރަސްމީ ހަރަކާތްތައް ބޭއްވުމަށް ނިންމާފައިވަނީ، ބ. ތުޅާދޫގަ އެވެ. އެދުވަހުގެ ހަރަކާތްތައް ކުރިޔާލާ ރާވާ، އެކަމަށް ވާންޖެހޭ ތައްޔާރީތައް މިހާރު ފިޝަރީޒް މިނިސްޓްރީން ދަނީ ކުރަމުންނެވެ. ފުރަތަމަ ކަމެއްގެގޮތުން، މިނިސްޓްރީގެ ސްޓޭޓް މިނިސްޓަރ މުޙައްމަދު މުއްޠަލިބާއި ހިމެނިވަޑައިގަންނަވާގޮތަށް ފަންނީ ބޭފުޅުންގެ ޓީމެއް މިމަހުގެ 24 ވަނަ ދުވަހު ވަނީ، ތުޅާދޫއަށް ޒިޔާރަތްކުރައްވާފަ އެވެ. އެ ޒިޔާރަތުގައި ރަށު ކައުންސިލާއި، ސްކޫލާއި އަދި ސިއްޙީ މަރުކަޒާއެކު ރަސްމީ ބައްދަލުވުންތަކެއް ބާއްވާފައިވެއެވެ. މި ބައްދަލުވުންތަކުގައި މަސްވެރިންގެ ދުވަހާ ގުޅިގެން ކުރިއަށް ގެންދާ ރަސްމީ އިންތިޒާމްތައް ހަމަޖެއްސުމާ ގުޅޭގޮތުން މަޝްވަރާކުރައްވާފައި ވެއެވެ.
މިދަތުރާ ގުޅޭގޮތުން ސްޓޭޓް މިނިސްޓަރ މުޙައްމަދު މުއްޠަލިބް ވިދާޅުވީ، ބައްދަލުކުރެއްވި ހުރިހައި އިދާރާއަކުންވެސް މަސްވެރިންގެ ދުވަސް ފާހަގަކުރުމަށް އެއްބާރުލުންދޭނެކަމުގެ ޔަގީންކަން ދެއްވާފައިވާކަމަށެވެ.
”ކައުންސިލުން ޕޮޒިޓިވްކޮށް ތިބީ. ކައުންސިލުންވެސް އަދި އެހެނިހެން މުއައްސަސާތަކުންވެސް ވަރަށް ބޮޑަށް އެރަށުގައި ބާވަން ބޭނުންވާ ދުވަހެއްގެގޮތުގައި އެބޭފުޅުންނަށް ފެންނާތީ، މަސައްކަތްތައް ކޮށްދޭނެކަމާއި، އެއްބާރުލުންދޭނެކަމާއި، ހުރިހައި ކަމަށް އެއްބަސްވި.“ މުއްޠަލިބް ވިދާޅުވި އެވެ.
ސަރުކާރުން މި އަހަރުގެ މަސްވެރިންގެ ދުވަސް ބ. ތުޅާދޫގައި ބޭއްވުމަށް ނިންމާފައިވާއިރު، މިއަރުގެ މަސްވެރިންގެ ދުވަސް ފާހަގަކުރުމަށް އެހެން އަހަރުތަކެކޭވެސް އެއް ފަދައިން ރަސްމީ ޖަލްސާއެއް ބޭއްވުމަށް ވަނީ ހަމަޖެހިފައެވެ. މުއްޠަލިބް ވިދާޅުވީ، ރަސްމީ ޖަލްސާގެ އިތުރުން މަސްވެރިކަމާ ގުޅުން ހުރި އެކި ހަރަކާތްތައް ބާއްވަން ގަސްދުކޮށްފައިވާ ކަމަށެވެ. އެެހެންނަމަވެސް މިނިސްޓްރީން އެ ބާއްވާނެ ހަރަކާތްތައް ކަނޑައެޅުމަށް މަޝްވަރާކުރަމުން އަންނަ ކަމަށް މުއްޠަލިބް ވިދާޅުވި އެވެ.
”ދެން އޮންނާނީ، މިނިސްޓްރީ ތެޜޭގައި އެދުވަހު ބާއްވާ ހަރަކާތްތަކާ ގުޅޭގޮތުން މަޝްވަރާކޮށްފައި އެކަންކަން ފައިނަލްކުރުން. ހީވަނީ މިހަފްތާތެރޭގައި އެކަންކަން ފައިނަލްކޮށް ތައްޔާރު ކުރެވޭނެހެން.“ މުއްޠަލިބް ވިދާޅުވި އެވެ.
މުއްޠަލިބް ވިދާޅުވީ، މިހާރު މިއޮތް ބަޖެޓްގެ ތާށިކަމާއެކުވެސް މިނިސްޓްރީން ބޭނުންވަނީ، މިއަހަރުގެ މަސްވެރިންގެ ދުވަސް ވަރަށް ފުރިހަމަޔަށް ފާހަގަކުރުމަށް ކަމަށެވެ.
ސަރުކާރުން މަސްވެރިންގެ ދުވަސް ފާހަގަކުރަމުން އަންނަނީ ކޮންމެ އަހަރެއްގެ ވެސް ޑިސެންބަރު މަހުގެ 10 ވަނަ ދުވަހުއެވެ. މިއަހަރު ފާހަގަކުރާނީ 44 ވަނަ މަސްވެރިންގެ ދުވަހެވެ. މި ދުވަހަކީ ސަރުކާރުން ގެންގުޅޭ މަސްވެރިކަމުގެ ސިޔާސަތުތަކާއި ކުރިޔަށް ރޭވިފައި ހުންނަކަންކަން ހިއްސާކުރާ ދުވަހަކަށްވާތީ މަސްވެރިން މިދުވަހަށް ވަރަށް އިންތިޒާރު ކުރެއެވެ.