ބޮއެތައް މަރާމާތު ކުރުމުގެ ދަތުރުތައް އަންނަމަހު ފަށާނެކަމަށް މިނިސްޓްރީ އޮފް ފިޝަރީޒް އިން ބުނެފި އެވެ.
ރ، ކަނދޮޅުދޫ ބޭރުގައި އަޅާފައިވާ ބޮއެ މިދިޔަ ގަދައިގައި ކަނޑައިގެން ދިއުމާ ގުޅިގެން، އަލުން ބޮއެއް އަޅައިދިނުމަށް އެރަށު މަސްވެރިން ފިޝަރީޒް މިނިސްޓްރީގައި އެދިފައިވާތީ، އެކަމާއި ބެހޭ މައުލޫމާތު ހޯދުމަށް ކެޔޮޅާއިން ގުޅާމުން އެމިނިސްޓްރީގެ ސްޓޭޓް މިނިސްޓަރު މުހައްމަދު މުއްޠަލިބް ވިދާޅުވީ، އެ ބޮއެ ކަނޑައިގެން ދިޔަކަމުގެ ރިޕޯޓް މިނިސްޓްރީއަށް ލިބިފައިވާކަމަށެވެ. އެހެންނަމަވެސް، އެ މަރާމާތުކުރެވޭނީވެސް ނުވަތަ އާ ބޮއެއް އެޅޭނީވެސް މިނިސްޓްރީން އެކަމަށް ޚާއްސަކޮށްގެން ކުރާ ދަތުރުގެ ތެރެއިން ކަމަށް ވިދާޅުވި އެވެ.
މުއްޠަލިބް ވިދާޅުވީ، ބޮއެ އެޅުމާއި ބޮއެ މަރާމާތު ކުރުމުގައި ލަސްތަކެއް އުޅެނީ، އެ މިނިސްޓްރީން ކުރިން ގާ އަޅަން ބޭނުންކުރަމުންދިޔަ ސައިޓް އޮފީސްގައި އިމާރާތެއް އަޅަމުން ދިއުމާއި ގުޅިގެން އެތަނުގައި މިވަގުތައް ގާ އެޅުން ހުއްޓިފައިވާތީ ކަމަށެވެ. އަދި، އޭގެ ބަދަލުގައި މިހާރު މިނިސްޓްރީ އޮފް ސިޓީސް، ލޯކަލް ގަވަންމެންޓް އެންޑް ޕަބްލިކް ވާކްސްގެ ސައިޓެއްގައި ގާ އެޅުމުގެ މަސައްކަތް ކުރަމުން އަންނަކަމަށް މުއްޠަލިބް ވިދާޅުވި އެވެ.
މުއްޠަލިބް ވިދާޅުވީ، ބޮއެ މަރާމާތު ކުރުމުގެ ދެ ދަތުރެއް މިހާރު ރާވަމުން އަންނަކަމަށާއި، ފުރަތަމަ ދަތުރުކުރާނީ ދެކުނަށް ކަމަށެވެ. އަދި، ދެވަނަ ދަތުރު އުތުރަށް ކުރާނީ އަންނަ ސެޕްޓެމްބަރު މަހުގެ ފަހުކޮޅު ނުވަތަ އޮކްޓޯބަރުމަހުގެ ކުރީކޮޅުކަމަށް މުއްޠަލިބް ވިދާޅުވި އެވެ.
އެހެންކަމުން، ރ. ކަނދޮޅުދޫ ބޮއިގެ މައްސަލަ ހައްލުކުރެވޭނީ އުތުރަށް ކުރާ ދަތުރުގަ އެވެ.