މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ(މިފްކޯ) ގެ ސީއީއޯ އަހްމަދު ޝައްމާން ރަޝީދު ގެއްލިގެން ކަމަށް ބުނެ މަސްވެރިން އޭނާ ހޯދުމުގެ މަސައްކަތް ފަށައިފި އެވެ.
ކޫއްޑޫގައި އިހުތިޖާޖު ކުރަމުންދާ މަސްވެރިން ބުނީ އެންމެ ފަހުން ޝައްމާން އެމީހުންނާއި ބައްދަލުކުރީ ރޭ އެގާރަ ޖެހި އިރުކަމަށެވެ. އަދި އެ ބައްދަލުވުމުގައިވެސް މަސްވެރިންނާއެކު ގޮތެއް ނިމެންދެން މަޑުކުރާނެކަމަށް ވައުދުވި ނަމަވެސް މިއަދު ސީއީއޯ ލޮލަށް ނުފެންނަކަމަށް އިހުތިޖާޖުގައި ބައިވެރިވަމުން އަންނަ މަސްވެރިން ބުންޏެވެ. އަދި އެރަށު އެއްވެސް ތަނެއްގައި ސީއީއޯ ހުންނެވިތޯ ހޯދާ ބަލަމުން ދާ ކަމަށް މަސްވެރިން ބުންޏެވެ.
”ސީއީއޯ ވަޑައިގެންނެވީ ހޯމަދުވަހުގެ ރޭ އަށެއް ޖެހި އިރު. ދޭތެރެ ދޭތެރެއިން ބައްދަލުކޮށް އަޕްޑޭޓް ދެއްވާނެ. ރޭ އެގާރަ ޖެހި އިރު އެންމެ ފަހުން ދިމާވީ. މިހާރު ވީތަނެއް ނޭނގޭ. މި ރަށުން ފުރައިގެން ދިޔަތަނެއް ނުފެނޭ. ވީނުވީއެއް ނޭނގި ގެއްލިގެން އަހަރުން ހަމަ މިހޯދަނީ“ މަސްވެރިއަކު ބުންޏެވެ.
މަސްވެރިން ބުނީ، މަސްވެރިންނަށް ދޭން ހުރި ފައިސާގެ ތެރެއިން 119 މިލިއަން ރުފިޔާ މިހާރު ހަމަޖެހިފައިވާ ކަމަށް ސީއީއޯ ވިދާޅުވި ކަމަށެވެ. އެހެންނަމަވެސް އެފައިސާއަށްވެސް ވީނުވީއެއް ނޭނގޭ ކަމަށެވެ. ހައްތާވެސް ސީއީއޯ ވިދާޅުވަމުން ގެންދެވީ އެ ފައިސާ ދޫކުރާނެ ގޮތްތަކެއް ކަނޑައެޅުމުގެ މަސައްކަތް ކުރަމުންދާކަމަށެވެ.
މަސްވެރިން ބުނީ ފިޝަރީޒް މިނިސްޓަރު އަހްމަދު ޝިޔާމުވެސް ކޫއްޑޫއަށް ދަތުރުކުރައްވާ މޮޅެތި ވާހަކަތައް ދައްކާފައި އެނބުރި ވަޑައިގެންނެވީ ކަމަށާއި، އަނެއްކާ ސީއީއޯވެސް ގޮތެއް ހަމަޖެހެންދެން ހުންނާނެ ކަމުގެ ވައުދު މަސްވެރިންނަށްވެފައި ފިއްލެވީ ކަމަށެވެ. މަސްވެރިން ބުނީ، އެމީހުންނާއި ބައްދަލުކުރަން ބޭނުންވާ އިއްޒަތްތެރިން މިފަހަރު އަންނަން ޖެހޭނީ އެމީހުން ކައިރިއަށް ކަމަށެެވެ. އެއީ ގައުމުގެ ރައީސް ވިޔަސް މިފަހަރު އެކަން އޮންނާނީ އެގޮތަށް ކަމަށެވެ.
މިދިޔަ އާދިއްތަ ދުވަހުން ފެށިގެން ކޫއްޑޫގައި މަސްވެރިން އިހުތިޖާޖު ކުރަމުން އަންނަ އިރު އެމީހުން ބޭނުންވާ ”ޑިމާންޑް“ އަދިވެސް ސަރުކާރުން ފުއްދައެއް ނުދެއެވެ. ތަކުރާރުކޮށް ބުނަމުން ދަނީ ފައިސާ ހަމަޖެހިއްޖެ ކަމަށާއި، ދޭން ހުރި ހުރިހައި ފައިސާއެއް އަންނަ މަހުގެ ފަހެއްގެ ކުރިން ދައްކާ ޚަލާސް ކުރާނެކަމަށެވެ. މަސްވެރިން ބުނަމުން ދަނީ އެމީހުންނަށް ދޭން ހުރި ފައިސާ ޚަލާސް ނުކުރަނީސް ކޫއްޑޫން ނުފައިބާނެކަމަށެވެ. އަދި މަހަށްވެސް ނުދާނެކަމަށެވެ. ރައީސާއި ފިޝަރީޒް މިނިސްޓަރ ވަނީ މަސްވެރިން އިހުތިޖާޖު ހުއްޓާލާ މަހަށް ފުރުމަށް އިލްތިމާސްކޮށްފަ އެވެ. އެއީ މަސްވެރިން މަހަށް ނުފުރާ މަޑުކުރުމުން ލިބޭނެ ގެއްލުމަކަށް ބަލާފަ އެވެ.