މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ(މިފްކޯ) ގެ ހުރިހައި ސެންޓަރުތަކުން މިއަދު ހިލޭ އައިސް ބަހަމުންދާނެކަމަށް އެކުންފުނިން ބުނެފި އެވެ.
މިފްކޯއިން ހިލޭ އައިސް ބެހުމަށް ނިންމާފައިވަނީ މަސްވެރިން މަހަށް ފުރުވުމަށް ހިތްވަރު ދިނުމުގެ ގޮތުންނެވެ. މިފްކޯއިން ބުނީ، އެކުންފުނީގެ ހުރިހައި ސެންޓަރުތަކުންނާއި، ތިނަދޫ އައިސް ޕްލާންޓުން މިއަދު ސްޓޮކް ހުސްވަންދެން އައިސް ބަހާނެކަމަށެވެ.
މިފްކޯއިން މަސްވެރިންނަށް މިއަދު ހިލޭ އައިސް ބަހަމުން މިދަނީ، ފަހަކަށް އައިސް މަހަށް އޮޑިތައް ނިކުންނަން ފަސްޖެހެމުންދާތީ އެވެ.
މަސްއޮޑިތައް ކުރިޔާ އަޅާބަލާއިރު މަހަށް ނިކުންނަ މިންވަރު ނިސްބަތުން މަދުވެފައިވަނީ، މިފްކޯއިން މަސްގަތުމަށްފަހު ބިލުތައް ދެއްކުން ލަސްވުމުގެ ސަބަބުން އޮޑިތަކުން ފަޅުވެރިން ފޭބުމާއި، އައިސް ހޯދުމަށާއި މަސްކިރަން ދުއްވަން ޖެހި، އެއީ ދެކޮޅު ޖެހޭ ޚަރަދަކަށް ނުވާތީއެވެ. ޚާއްސަ ގޮތެއްގައި މަސްވެރިކަމުގައި ހަރަކާތްތެރިވާ ޒުވާނުންވަނީ މަސް އޮޑިތަކުން ފައިބާ އާދައިގެ ވަޒީފާތަކަށް ނިކުންނަން ފަށާފައެވެ. އެއީ އާއިލާގެ ޚަރަދުތައް ބެލެެހެއްޓުމުގައި ދަތިތަކެއް ކުރިމަތިވަމުން އަންނާތީ އެވެ.
މިފްކޯއަށް ކިރާ މަހަށް ފައިސާ ދެއްކުމުގައި ލަސްވާ މައްސަލަ ހައްލުކުރުމަށް އެކުންފުނިން ދަނީ ގިނަ މަސައްކަތްތަކެއް ކުރަމުންނެވެ. ފަހަކަށް އައިސް ދެހަފުތާއިން ބިލުތަކަށް ދަނީ ފައިސާ ދައްކަމުންނެވެ. އެެންމެ ފަހުން މަސްވެރިންގެ ބިލުތަކަށް ފައިސާ ދައްކާފައިވަނީ، މިމަހުގެ 11 ވަނަ ދުވަހު އެވެ. އެދުވަހު ފައިސާ ދޫކޮށްފައިވަނީ ޖުލައި 27 އިން ޖުލައި 8 ވަނަ ދުވަހުގެ ނިޔަލަށް ކިރާފައިވާ މަަހަށެވެ.