ސްރީލަންކާގެ މަސްބޯޓެއް އޮޔާދާކަމުގެ މަޢުލޫމާތު މޯލްޑިވްސް ނެޝަނަލް ޑިފެންސް ފޯސް (އެމްއެންޑީއެފް) ކޯސްޓްގާޑަށް ލިބިއްޖެއެވެ.
އެމްއެންޑީއެފް އިން ބުނީ، މި މަސްބޯޓް އޮޔާ ދަނީ ހއ. ވަނގާރުގެ ހުޅަނގުން 39 ނޯޓިކަލް މޭލު ބޭރުން ކަމަށެވެ.
”މި ބޯޓަކީ އިންޖީނަށް މައްސަލައެއް ޖެހުމުގެ ސަބަބުން އޭގެ ފަޅުވެރިން ދޫކޮށްލާފައިވާ މަސްބޯޓެއްކަން ވަނީ މަޢުލޫމާތު ލިބިފަ.“ކޯސްޓްގާޑުން ބުނެފައި ވެއެވެ.
ކޯސްޓް ގާޑުން ބުނީ، މިއީ ހުޅަނގު މޫސުމުގެ ގަދަ ދުވަސްވަރަކަށްވެފައި ވައި ޖެހެނީ ހުޅަނގާއި ހުޅަނގުއުތުރުން ކަމަށްވާތީ މި ބޯޓް، އޮޔާއެކު ދިވެހިރާއްޖެއަށް ކައިރިވާނެކަމަށް ލަފާކުރެވޭކަމަށެވެ.
މިކަމާއި ގުޅިގެން، އެ ސަރަހައްދުން ދަތުރު ކުރާ ފަރާތްތަކުން މިކަމަށް ސަމާލުކަން ދެއްވުމަށް ކޯސްޓްގާޑުންވަނީ އިލްތިމާސްކޮށްފަ އެވެ. އަދި ރޭގަނޑު އެ ސަރަހައްދުން ދަތުރުކުރާ ފަރާތްތަކުން ދަތުރުކުރުމުގައި ޚާއްޞަ ސަމާލުކަމެއްދިނުމަށް އިލްތިމާސްކޮށްފައި ވެއެވެ.