ދިވެހިރާއްޖޭގެ ކަނޑުމަހުގެ މަސްވެރިކަން އިތުރަށް ތަރައްގީކުރުމަށް ކަމަށް ބުނެ، ރީނދޫއުރަހަ ކަންނެލި އަދި ލޯ ބޮޑު ކަންނެއްޔަށް އަމާޒު ކޮށްގެން ލޭނު މަސްވެރިކަން ކުރުމުގެ ހުއްދަ ދޭން ސަރުކާރުން ނިންމުމާގުޅިގެން، އެކަމާދެކޮޅު ހެދުމުގެގޮތުން މަސްވެރިން މުޒާހަރާއަށް ނިކުންނަން ނިންމައިފި އެވެ.
މިކަމުގައި އިސްކޮށް ހަރަކާތްތެރިވާ ބޮޑު ކަންނެލި މަސްވެރިންގެ ޔޫނިއަން (ބީކޭއެމްޔޫ)އިން ބުނީ، ލޭނު މަސްވެރިކަމާ ދެކޮޅަށް މަސްވެރިން ބޮޑު މުޒާހަރާއެއް ބާއްވަން ތައްޔާރުވަމުން އަންނަކަމަށެވެ. އަދި މި މުޒާހަރާ އިންތިޒާމުކުރަނީ، އެ ޔޫނިއަންއާއި ލޭނު މަސްވެރިކަމާއި ދެކޮޅަށް މިހާރު ވަކާލާތުކުރަމުން އަންނަ މަދަނީ ޖަމްއިއްޔާތަކުން ކަމަށެވެ. މިކަމަށް ތައްޔާރުވުމުގެ ގޮތުން، މިހާރު މުޒާހަރަާ ބާއްވާނެ ދުވަހަކާއި ވަގުތެއް ކަނޑައެޅުމުގެ މަޝްވަރާކުރަމުން އަންނަކަމަށް އެ ޔޫނިއަން އިން ބުންޏެވެ. އަދި، ކަނޑައެޅުނުހާ އަވަހަކަށް އިއުލާނުކުރާނެކަމަށްވެސް ބީކޭއެމްޔޫއިން ބުނެފައި ވެއެވެ.
ބީކޭއެމްޔޫއިން ބުނީ، މުޒާހަރާ ބާއްވަނީ ލޭނު މަސްވެރިކަމާ މަސްވެރިން ދެކޮޅުކަން ސަރުކާރުގެ ސަމާލުކަމަށްގެނެސް، މިހާރު ސަރުކާރުން ލޭނުމަސްވެރިކަމަށް ހުޅުވާލުމަށް ނިންމާފައިވާ ނިންމުން މުރާޖައާކުރުމަށް ގޮވާލުމުގެ ބޭނުމުގައި ކަމަށެވެ.
”އަހަރުމެން އަބަދުވެސް ލޭނުމަސްވެރިކަމާ ދެކޮޅު. ފިޝަރީޒް މިނިސްޓްރީގައި މަޝްވަރާކުރުމަށް ބޭއްވި ބައްދަލުވުމުގައިވެސް ވާނީ އެކަމަށް އިންކާރުކޮށްފައި. ލޭނު މަސްވެރިކަމުގެ ގަވައިދަށްވެސް އަހަރުމެންވާނީ ޚިޔާލުހުށަހަޅާފައި. އެކަމު ސަރުކާރުންއެއްވެސްވަރަކަށް އަޅާލާތަނެއް ނުފެނޭ. އިއްޔެވެސް މިކަމާގުޅޭގޮތުން މަޖިލީހަށް ވެއްދި ކުއްލި މައްސަލަވެސް ބޭރުކޮށްލިތަން ފެނުނީ. ސަރުކާރުގެ މެންބަރުން އެޓްލީސްޓް ބަހުސްކޮށްލަންވެސް ބޭނުންނުވި.މިއީ މައްސަލަ އޮތް ހިސާބު. އެހެންވީމައި އަހަރުމެން މި ނިކުންނަނީ.“ބީކޭއެމްޔޫއިން ބުންޏެވެ.
ބީކޭއެމްޔޫ އިންވަނީ ހުރިހައި މަސްވެރިންނާއި، މަދަނީ ޖަމްއިއްޔާތަކާއި، ހެޔޮއެދޭ ހުރިހައި ފަރާތްތަކަށް މިމުޒާހަރާގައި ބައިވެރިވުމަށް ދައުވަތު އަރުވާފަ އެވެ. ބީއެމްކޭޔޫއިން ބުނީ މިއީ އެއްވެސް ހާލެއްގައި، ސިޔާސީ މަގުސަދެއްގައި ބާއްވާ މުޒާހަރާއެއް ނޫންކަމަށާއި، މިއީ މަސްވެރިންނާއި، މަސްވެރިންގެ އާއިލާތަުގެ ހައްގުގައި ބާއްވާ މުޒާހަރާއެއް ކަމަށެވެ. އެހެންކަމުން އެއްވެސް ފަރާތަކުން މިކަން ސިޔާސީ ނުކުރުމަށް އެދިފައި ވެއެވެ.
”އެއްވެސް ސިޔާސީ ޕާޓީއަކުން މިކަން ސިޔާސީކޮށް، މިކަމުގައި ބައިވެރި ނުވުމަށް އެދެން. މިއީ، ކަނޑުގެ ދަރީންގެ މުޒާހަރާއެއް. މާނައަކީ މަސްވެރިންނާއި، ކަނޑުގެ އެކިވަސީލަތްތަކުން ނަފާ ހޯދައިގެން ދިރިއުޅުން ހަމަޖައްސައިގެންއުޅޭ މީހުންނާއި، ޑައިވަރުންފަދަ މިކަހަލަ އެކިދާއިރާތަކުގައި މަސައްކަތްކުރާ މީހުންނާއި، މަސްވެރި އާއިލާތަކާއި މަސްވެރިންނަށް ހެޔޮއެދޭ މީހުންނާއި ރާއްޖޭގެ ކަނޑުތައް ހިމާޔަތްކުރުމަށް މަސައްކަތްކުރާ މީހުން. ޖުމްލަކޮށް ހެޔޮނިޔަތެއްގައި އަޅުގަނޑުމެންނަށް ވަކާލާތުކޮށްދޭން ޝައުގުހުރި އެންމެހައި ފަރާތްތަކަށް ދައުވަތުއަރުވަން.“ ބީކޭއެމްޔޫއިން ބުނެފައި ވެއެވެ.
ބީކޭއެމްޔޫ އިންބުނީ ރާއްޖޭގެ އެކިކަންކޮޅުތަކުން މަސްވެރިންނާއި، ފަޅުވެރިންނާއި، ކެޔޮޅުން މިމުޒާހަރާގައި ބައިވެރިވާނެ ކަމަށެވެ.