ވައިގަދަވާނެކަމަށް ލަފާކޮށް ކ އަތޮޅުން ފެށިގެން އައްޑު ސިޓީއާ ހަމަޔަށް ވައިޓް އެލާޓް ނެރެފި އެވެ.
މެޓް އޮފީހުން ހެދުނު 06:00 ޖެހިއިރު މި އަތޮޅުތަކަށް ނެރުނު އެލާޓްގައި ބުނެފައިވަނީ، ބޯކޮށް ވާރޭވެހި ގުގުރާނެކަމަށެވެ. އަދި، ވިލާގަނޑުގައި ގަޑިއަކު 40 މޭލަށް ވައި ގަދަވާނެކަމަށް ލަފާކުރެވޭ ކަމަށެވެ. މި އެލާޓް ނެރެފައިވަނީ މެންދުރު 12:00 ޖެހުމާ އަމަޔަށެވެ.
ހއ އިން ފެށިގެން ކ އަތޮޅާ ހަމަޔަށްވެސް އޮތީ ވައިޓް އެލާޓް ނެރެފަ އެވެ. އެ ސަރަހައްދަށް 04:30ގައި ނެރެފައިވާ އެލާޓްގައި ބުނެފައިވަނީ އެއަތޮޅުތަކަށް ގަޑިއަަކު 19 މޭލާއި 24 މޭލާ ދެމެދުގެ ބާރު މިނުގައި ވައިޖެހޭނެކަމަށް ލަފާކުރެވޭކަމަށެވެ. އަދި، ވައިޖެހި ކަނޑުތައް ގަދަވާނެކަމަށްވެސް ލަފާ ކޮށްފައި ވެއެވެ.
މޫސުން ގޯސްވެފައިވާތީ ހުރިހާ ކަނޑު ދަތުރުކުރާ ފަރާތްތަކުންވެސް މޫސުމަށް ސަމާލުވެ، ދަތުރަށް ފެށުމުގެ ކުރިން ލައިފް ޖެކެޓް ފަދަ ތަކެތި ހަމަތޯ ބަލައި، މުވާސަލާތީ އާލާތްތައް ރަނގަޅަށް ޗެކް ކުރުމަށް ފަހު ދަތުރު ފެށުމަށް ކޯސްޓް ގާޑުން ވަނީ އިލްތިމާސްކޮށްފަ އެވެ.