ހުޅުމާލޭގައި ހުންނަ ވަގުތީ މަސްމާރުކޭޓް ހިންގަން ކުއްޔަށް ހިފުމަށް ހައުސިން ޑިވެލޮޕްމެންޓް ކޯޕަރޭޝަން (އެޗްޑީސީ) އިން ހުޅުވާލައިފި އެވެ.
އެޗްޑީސީ އިން ވަނީ މަސްމާރުކޭޓް ކުއްޔަށް ހިފުމުގެ ފުރުސަތު އިއްޔެއިން ފެށިގެން އަންނަ މަހުގެ ތިންވަނަ ދުވަހުގެ ނިޔަލަށް ހުޅުވާލާފަ އެވެ. އެތަން ކުއްޔަށް ލިބޭނީ ފޯމު ހުށަހަޅާ ފަރާތްތަކުގެ މެދުގައި ބާއްވާ ގުރުއަތުުލުމުން ހޮވޭ ބަޔަކަށެވެ. އެތަން ކުއްޔަށް ހިފަން ކުރިމަތިލާ ފަރާތަކީ 100 ޕަސެންޓް ދިވެހި ވިޔަފާރިއަކަށް ވާން ޖެހޭނެ ކަމަށާއި އެއްވެސް ދަރަންޏެއް އޮތް ފަރާތަކަށް ވެގެން ނުވާނެ ކަމަށް އެޗްޑީސީން ބުނެފައި ވެއެވެ.
އެއް އަހަރުގެ މުއްދަތަށް މާރުކޭޓު ކުއްޔަށްދޭއިރު، މަހަކު ކުލީގެ ގޮތުގައި 6،000ރ. އަދި ލީސް ޑިޕޮސިޓްގެ ގޮތުގައި 18،000ރ. ދައްކަން ޖެހެއެވެ. ޖާގަ ލިބުނުކަން އެޗްޑީސީން އަންގާތާ 5 ދުވަސް ތެރޭ ލީސް ޑިޕޮސިޓް ދައްކަން ޖެހެއެވެ.
މަސްމާރުކޭޓުގައި މަސްކަނޑާދިނުމުގެ ހިދުމަތް ދެވެނީ އެޗްޑީސީން ކަނޑައަޅާފައިވާ އަގުތަކުގަ އެވެ. އަދި އެ އަގު ލިސްޓު އާންމުންނަށް ފެންނާނެހެން ބަހައްޓަން ޖެހޭ ކަމަށް ވެސް އެޗްޑީސީން ބުންޏެވެ.
މަސްމާރުކޭޓު ކުއްޔަށް ހިފަން ޝައުގުވެރިވާ ފަރާތްތަކުން އަންނަ މަހު ތިނެއްގެ ކުރިން ފޯމު ހުށަހަޅަން ޖެހޭނެ ކަމަށް އެ އިއުލާނުގައި ވަނީ ބުނެފައެވެ. މި ތަން ކުއްޔަށް ހިފުމަށްޓަކައި ހުށައަޅަން ޖެހޭ ފޯމު އެޗްޑީސީން ވަނީ އެ ކުންފުނީގެ ވެބްސައިޓުގައި އާންމުކޮށްފައެވެ.
އެޗްޑީސީން ކުއްޔަށް ދޫކުރުމަށް ހުޅުވާލާފައިވާ ހުޅުމާލޭ ވަގުތީ މަސްމާރުކޭޓަކީ 2،378.82 އަކަފޫޓުގެ ތަނެކެވެ.