މިހާރު ރާއްޖެއަށް ކުރަމުންދާ ހުޅަނގު މޫސުމުގެ ވިއްސާރައާއި ގުޅިގެން އުތުރުގެ އަތޮޅުތަކަށް މޫސުމާ ބެހޭ ގައުމީ އިދާރާއިން ވަނީ ރީނދޫ އެލާޓް ނެރެފައެވެ.
އުތުރުގެ އަތޮޅުތަކަށް އެންމެ ފުރަތަމަ ޔެލޯ އެލާޓް ނެރުނީ އިއްޔެގެ މެންދުރުފަހު 02:00 ޖެހިއިރު އެވެ. އޭގެ ފަހުން މިހާތަނަށް އާއިރު، ވަނީ 6 ފަހަރަށް އެލާޓްގެ ވަގުތު ދަންމާފައިވެއެވެ.
އެންމެ ފަހުން އެލާޓް ދަންމާލާފައިވަނީ މެންދުރުފަހު، 05:00 ގަ އެވެ. މިހާރު އޮތް ގަޮތުންނަމަ ހއ އަތޮޅުން ފެށިގެން އދ އަތޮޅާ ހަމަޔަށް އޮތް އެލާޓްގެ ވަގުތު ހަމަވާނީ ހަވީރު 10:00 ގައެވެ.
މި ފަހަރު އެލާޓް ދަންމާލިއިރު މެދު ރާއްޖެތެރޭގެ ބައެއް އަތޮޅުތައްވެސް ވަނީ އެލާޓުގައި ހިމަނާފަ އެވެ. މިއެލާޓްގައި ބުނެފައިވަނީ ހއ އިން ވ އަތޮޅާ ހަމަޔަށް ބޯކޮށް ވާރޭވެހި، ގަޑިއަކު 25 މޭލާއި 30 މޭލާ ދެމެދުގެ ބާރުމިނުގައި ވައިޖެހޭނެކަމަށެވެ. އަދި ވިލާގަނޑުގައި ގަޑިއަކު 50 މޭލަށް ވައިޖެހި ކަނޑުތައް ވަރަށް ގަދަވާނެކަމަށް މޫސުމާބެހޭ ގައުމީ އިދާރާއިން ވަނީ ލަފާކޮށްފަ އެވެ.
މޫސުމާބެހޭ ގައުމީ އިދާރާއިން މޫސުމަށް ރައްކާތެރިވުމަށް އިލްތިމާސްކޮށްފައިވާއިރު، ކޯސްޓްގާޑުންނާއި ފުލުހުންވަނީ ކަނޑު ދަތުރުކުރާ ފަރާތްތަކުން މޫސުމަށް ޚާއްސަ ސަމާލުކަމެއް ދިނުމަށް އިލްތިމާސްކޮށްފައެވެ. އެގޮތުން، މިވަގުތު ކޮންމެހެން ކުރަންޖެހޭ ދަތުރުތައް ނުކުރުމަށާއި، ދަތުރުކުރަންޖެހިއްޖެނަމަ، އޮޑީގައި ސަލާމަތީ އަދި މުވާސަލާތީ އާލާތްތައް ރަނގަޅަށް މަސައްކަތްކުރޭތޯ ކަށަވަރުކޮށް އަދި ފަސިންޖަރުންނާއި ފަޅުވެރިންގެ ސަލާމަތާއި ރައްކާތެރިކަމަށް ފަރުވާތެރިވެ ރައްކާވެތިބުމަށް އިލްތިމާސްކޮށްފައި ވެއެވެ.