ސްރީލަންކާގެ ކަނޑުގެ ސަރަހައްދުގައި ގަވާއިދާ ޚިލާފަށް މަސްވެރިކަން ކުރަން އުޅުމުގެ ތެރޭގައި ސްރީލަންކާގެ ކަނޑުގެ އަސްކަރިއްޔާއިން ހައްޔަރުކުރި އިންޑިއާގެ 13 މަސްވެރިއަކު އަނބުރާ އިންޑިއާއަށް ފޮނުވާލައިފި އެވެ.
އިންޑިއާގެ ނޫސްތަކުން ރިޕޯޓްކުރާގޮތުގައި ސްރީލަންކާގައި ހުންނަ އިންޑިއާ ހައިކޮމިޝަންގެ އެހީތެރިކަމާއެކު އެމީހުން ފޮނުވާލީ އިއްޔެގެ ވަގުތެއްގަ އެވެ.
13 Indian fishermen are on their way home after being successfully repatriated from Sri Lanka. pic.twitter.com/im0CEnZGmL
— India in Sri Lanka (@IndiainSL) August 16, 2024
ސްރީލަންކާގެ ކަނޑުގެ ސަރަހައްދަށްވަދެ އިންޑިއާ މަސްވެރިން، ގަވާއިދާ ޚިލާފަށް މަސްވެރިކަން ކުރަނިކޮށް އެގައުމުގެ ކަނޑުގެ އަސްކަރިއްޔާއިން ވަރަށް ގިނައިން އިންޑިއާ މަސްވެރިންނާއި މަސްވެރި އުޅަނދުތައް ހިފަހައްޓައެވެ. މިގޮތަށް ހިފެހެއްޓި 17 މީހަކު މިދިޔަ ހަފުތާގެ ބުދަދުވަހުވެސް ވަނީ އަނބުރާ އިންޑިއާއަށް ފޮނުވާލާފަ އެވެ. އަދި، މިމަހުގެ ކުރީކޮޅުވެސް މިގޮތަށް ހައްޔަރުކުރި 21 މީހަކު ވަނީ ފުރުވާލާފަ އެވެ.
މަސްވެރިންގެ މި މައްސަލައަކީ އިންޑިއާ އާއި ސްރީލަންކާގެ ގުޅުމަށް ބުރޫ އެރުމަށް ދިމާވާ އެއް މައްސަލައެވެ. ބައެއް ފަހަރު ސްރީލަންކާ ސިފައިން އިންޑިއާގެ މަސްވެރިންނަށް ހަމަލާދޭ ކަމަށް ރިޕޯޓްތައް ބުނެފައިވާއިރު، މިމަހުގެ އެއްވަނަ ދުވަހު ސްރީލަންކާ ސިފައިންނާއި އިންޑިއާ މަސްބޯޓަކާއި ދެމެދު ހިނގައި ދިޔަ ހަމަނުޖެހުމެއްގައި އިންޑިއާގެ މަސްވެރިއަކު މަރުވެ، އިތުރު މަސްވެރިއަކު ގެއްލިފައި ވެއެވެ.
އިންޑިއާ ކަނޑުގެ ސަރަހައްދަށް މަސްވެރިކަމަށް ވަންނަ ސްރީލަންކާ މަސްވެރިންނާ އިންޑިއާ ސިފައިންވެސް ބައެއް ހާލަތްތަކުގައި ކުރިމަތިލާކަމަށް ރިޕޯޓް ކޮށްފައި ވެއެވެ.
އިންޑިއާގެ ޓެމިލްނާޑޫ ސްޓޭޓާއި ސްރީލަންކާ ވަކިވާ ސަރަހައްދީ އިމުގައި އޮންނަ ޕާކް ސްޓްރެއިޓަކީ ދެ ގައުމުގެ މަސްވެރިކަން ތިޔާގި ސަރަަހައްދެެެކެވެ. ދެގައުމުގެ މަސްވެރިން ބައެއް ފަހަރު ގަސްދުގައިވެސް މި ސަރަހައްދަށް ގޮސް މަސް ބާނާ ހަދައެވެ. ބައެއް ފަހަރު ދެގައުމު މަސްވެރިންނަށް އޮޅިގެންނާއި ހާލުގައި ޖެހިގެން ކަނޑުގެ އިން ހުރަސް ކުރެވޭތަންވެސް އާދެއެވެ.