މިފްކޯގެ ޗީފް އެގްޒެކެޓިވް އޮފިސަރު (ސީއީއޯ) އަހްމަދު ސަމާހު ރަޝީދު އެ މަގާމުން ވަކިކޮށްފި އެވެ.
މިފްކޯގެ ސީއީއޯގެ މަގާމުން އޭނާ ވަކިކުރި ކަން ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑް(ޕީސީބީން)އިން މިރޭ ހާމަކުރީ އެ ބޯޑުން މިރޭ ”އެކްސް“ގައި ހިއްސާކުރި ޕޯސްޓެއްގަ އެވެ. އެޕޯސްޓްގައި ބުނެފައިވަނީ ސަމާހު ސީއީއޯގެ މަގާމުންނާއި މިފްކޯގެ ބޯޑުގެ ޑިރެކްޓަރުކަމުން މިއަދުން ފެށިގެން ވަކިކޮށްފައިވާ ކަމަށެވެ. އެހެންނަމަވެސް އޭނާ ވަކިކުރީ ކީއްވެގެންކަމެއް ބުނެފައެއްނުވެއެވެ.
މިފްކޯ ގެ ސީއީއޯ މަޤާމުގައި ހުންނެވި އަލްފާޟިލް އަހުމަދު ސަމާހު ރަޝީދު އެމަޤާމުންނާއި މިފްކޯގެ ބޯޑުގެ ޑިރެކްޓަރު ކަމުން މިއަދުންފެށިގެން ވަކިކޮށްފީމެވެ.
— Privatization & Corporatization Board (@pcb_gov) May 21, 2024
ޕީސީބީގެ ވިޒްލްބްލޯވަރ ޕޯޓަލްއިންނާއި، އެ ބޯޑަށް ހުށަހެޅިފައިވާ މައްސަލަތަކާއި ގުޅިގެން އިންކުއަރީއެއް ހިންގުމަށްޓަކައި، ސަރުކާރު ހިއްސާވާ ކުންފުނިތަކުގެ ޑިރެކްޓަރުންގެ ސުލޫކީ މިންގަޑާއި ޝަކުވާ ހުށަހެޅުމާއި، އަދި ފިޔަވަޅު އެޅުމާއި ބެހޭ އުސޫލުގެ 25 ވަނަ މާއްދާގެ (ށ) ގެ އެއްވަނަ ނަންބަރުގައިވާ ހާލަތައް ރިއާޔަތްކޮށް މިއަހަރުގެ މާޗް މަހުގެ 18 ވަނަ ދުވަހުން އެޕްރީލް 21 ވަނަ ދުވަހާ ހަމަޔަށް އޭނާ ސަސްޕެންޑް ކުރި އެވެ. ސަސްޕެންޝަން އަށް ފަހު އޭނާގެ މައްޗަށް އިންކުއަރީއެއް ހިންގާނެކަމަށް ބުނި ނަމަވެސް އެ އިންކުއަރީ ހިންގިކަމެއް ސާފުވެފައެއް ނުވެއެވެ. ފަހުން އޭނާގެ ސަސްޕެންޝަން އުވާލާ ވަޒީފާއަށް ނިކުތުމުގެ ހުއްދަ ޕީސީބީން ދިނީ އެޕްރީލް މަހުގެ 24 ވަނަ ދުވަހު އެވެ.
މިހާރު ސަމާހް ހުންނެވީ ތައިލޭންޑްގައި ކުރިޔަށްދާ އިންފޯ ފިޝް ވޯލްޑް ޓޫނާ ޓްރޭޑް، ކޮންފަރެންސް އެންޑް އެގްޒިބިޝަންގައި ބައިވެރިވުމަށް ތައިލޭންޑްގަ އެވެ.
ޕީސީބީން ޝަމާހުގެ މައްޗަށް ތުހުމަތުކުރި ކަންތައްތަކުގެ ތެރޭގައި، ކުންފުނީގެ މުދަލާއި ވަސީލަތްތައް އަމިއްލަ ބޭނުމުގައާއި ސިޔާސީ ބޭނުންތަކަށް ފާޅުކަންބޮޑު ގޮތެއްގައި ބޭނުންކުރުމާއި، ކުންފުނީގެ ދާއިމީ މުވައްޒަފުން ނުހައްގުން ވަޒިފާގެ މަސްއޫލިއްޔަތުން ދުރުކުރުމާއި, ވަޒީފާގެ ބިރުދެއްކުމާއި, ދާއިމީ މަގާމްތަކުގައި ތިއްބެވި މުވައްޒަފުންނަށް ވަޒީފާއާބެހޭ ގާނޫނާއި ޚިލާފުވާ ސަބަބެއްނެތި މަގާމާއި މުސާރަ ދަށްކުރުމާއި, ސަބަބެއް ނެތި އެހެން ޑިޕާޓްމަންޓްތަކަށާއި, ކުންފުނީގެ ސައިޓުތައް ހުންނަ ރަށްރަަށަށް ބަދަލުކުރުން ހިމެނެއެވެ.
މީގެ އިތުރުން، ކުންފުނީގެ މުވައްޒަފުން ނެގުމާއި ގުޅޭގޮތުން ހަދާފާއިވާ ޕޮލިސީތަކާއި މުސާރައިގެ އޮނިގަޑާއި ޚިލާފަށް ސީއީއޯގެ އާއިލީ ގުޅުންހުރި ފަރާތްތަކަށާއި, ރައްޓެހިންނަށް ބަޖެޓް ހަމަޖެހިފައި ނުވަނީސް ވަޒީފާ ދިނުމާއި، ބެސްޓު ޕްރެކްޓިސްއާއި ގަވަރނަންސް އުސޫލުތަކާއި ޚިލާފަށް ހެޑް ހަންޓް ކުރުމުގެ ނަމުގައި މުވައްޒަފުންގެ ގަވާއިދާއި ޚިލާފަށް, އެއްވެސް ޝަރުތަކަށް ބެލުމެއްނެތި, އާންމުކޮށް އިއުލާން ކުރުމަކާނުލާ, އިޖުރާތުތައް ފުރިހަމަނުކޮށް މުވައްޒަފުން ވެއްދުމާއި، ޕީސީބީގެ ހުއްދަ ހޯދުމަކާނުލާ, ކުންފުނީގެ މަގާމްތައް އުފައްދާ, އެމަގާމްތަކަށް މީހުން ވެއްދުމާއި، އުސޫލުތަކާއި ޚިލާފަށް, އެކަށީގެންވާ ތައުލީމާއި ތަޖުރިބާ ނެތް ފަރާތްތައް ޑިޕާޓްމަންޓްތަކުގެ ވެރިންނަށް ލުންވެސް ފާހަނގަކޮށްފައި ވެއެވެ.