އިޤްތިޞާދީ ތަރައްޤީއާއި ބެހޭ ވުޒާރާއާއި ޔޫއެންޑީޕީ ގުޅިގެން ބާއްވާ އޭޝިއާ ޕެސިފިކް ބްލޫ އިކޮނޮމީ ފޯރަމް މިއަދު ފަށައިފި އެވެ.
ރާއްޖެއިން ކޯ ހޮސްޓްކުރާ މި ފޯރަމް މިއަދު އިފްތިތާހުކޮށްދެއްވީ އިކޮނޮމިކް މިނިސްޓަރު މުހައްމަދު ސައީދެވެ.
މި ފޯރަމްގައި ޔުނައިޑަޓް ނޭޝަންސް ޑިވެލޮޕްމަންޓު ޕްރޮގްރާމް، ޔޫއެންޑީޕީން ރާއްޖެއަށް ކަނޑައަޅުއްވާފައި ހުންނަވާ ސަފީރު އެންރީކޯ ގަވޭލިއާ އާއި، އިނގިރޭސިވިލާތުން ރާއްޖެއަށް ކަނޑައަޅުއްވާފައި ހުންނަވާ ސަފީރު ކެރޮން ރޮސްލަރވެސް ބައިވެރިވަޑައިގެން ވާހަކަފުޅު ދައްކަވާފައި ވެއެވެ. މިފޯރަމްއަށް ފަންޑުކުރަނީ އިނގިރޭސި ވިލާތުންނެވެ.
ވިލާ ނޯޓިކާ ރިސޯޓުގައި، ދެދުވަހުގެ މުއްދަތަކަށް ކުރިޔަށްގެންދާ މި ފޯރަމްގައި ދުނިޔޭގެ 15 ގައުމަކުން 100 އަށްވުރެ ގިނަ މަންދޫބުން ބައިވެރިވެފައި ވެއެވެ. މި ފޯރަމްގައި، ނޫ އިޤްތިޞާދުގެ ވިސްނުމުގެ ދަށުން ޤައުމުތަކަށް ކުރެވޭނެ ކަންކަން ރާވައި ހިންގުމާއި ގުޅޭގޮތުން ބައިވެރިން މަޝްވަރާ ކުރުމަށް ވަނީ ހަމަޖެހިފަ އެވެ.
ނޫ އިޤްތިޞާދުގެ ތެރޭގައި އިއާދަކުރަނިވި ހަކަތަ ބޭނުންކުރުމާއި، ދެމެހެއްޓެނިވި މަސްވެރިކަމާއި ކަނޑު ދަތުރުފަތުރު ކުރުން، އަދި މޫސުމަށް އަންނަ ބަދަލުތަކާއި، ކުނި މެނޭޖުކުރުމާއި އަދިވެސް ކަނޑުފަޅާއި ގުޅިފައިވާ މިފަދަ އެހެނިހެން ގިނަ ދާއިރާތަކެއް އެކުލެވެއެވެ.
ދެދުވަހުގެ މުއްދަތަަކަށް ކުރިޔަށްދާ މި ފޯރަމަކީ، އިޤްތިޞާދީ ތަރައްޤީއާއިބެހޭ ވުޒާރާއާއި، ޔޫއެންޑީޕީއާއި، އިންގިރޭސިވިލާތުގެ ފޮރިން، ކޮމަންވެލްތު އަދި ޑިވެލޮޕްމެންޓް އޮފީހާއި ގުޅިގެން ބާއްވާ ފޯރަމެކެވެ.