މަސްވަރިކަމާއި ބެހޭ ކޮލެޖުގެ ކިޔެވުން ފަށަން މޯލްޑިވްސް ނެޝަނަލް ޔުނިވަސިޓީ(އެމްއެންޔޫ) އިން ތައްޔާރުވެއްޖެ އެވެ.
ޤައުމީ ޔުނިވަރސިޓީން ބޭއްވި ނޫސްވެރިންގެ ބައްދަލުވުމެއްގައި ވައިސް ޗާންސެލަރ ޑރ. ޢައިޝަތު ޝެހެނާޒް އާދަމް ވިދާޅުވީ މަސްވެރިކަމާބެހޭ ކޮލެޖު، މާލެ ސިޓީގައި ގާއިމުކުރުމަށް ސަރުކާރުން ނިންމާފައިވާކަމަށާއި، ކޮލެޖު ގާއިމުކުރުމުގެ މަސައްކަތް މިހާރު ފަށާފައިވާ ކަމަށެވެ.
ޝެހެނާޒް ވިދާޅުވީ ކޮލެޖުގެ ކިޔެވުން ފަށާނީ މަސްވެރިކަމާ ބެހޭ ކުދި ކޯސްތަކުން ކަމަށާއި، އަދި ކޮލެޖު ގާއިމުކުރެވުމުން، މިހާރު އެމްއެންޔޫއިން ހިންގަމުން އަންނަ މަސްވެރިކަމުގެ ކޯސްތައް ކުރިޔަށްގެންދާނީ މަސްވެރިކަމާއި ބެހޭ ކޮލެޖުގެ ދަށުން ކަމަށެވެ. އަދި މަސްވެރިކަމާއި ބެހޭ ކޮލެޖުގެ ކިޔެވުން މިއަހަރުގެ އޮގަސްޓުމަހު ފަށާނެކަމަށްވެސް ޝެހެނާޒު ވިދާޅުވި އެވެ.
އެމްއެންޔޫއާއި ގުޅިގެން، މަސްވެރިކަމާބެހޭ ކޮލެޖެއް ގާއިމުކުރައްވާނެކަން ރައިސުލްޖުމްހޫރިއްޔާ ޑރ. މުހައްމަދު މުއިއްޒު އިއުލާނުކުރެއްވީ މިދިޔަ އަހަ އަހަރުގެ މަސްވެރިންގެ ދުވަހުއެވެ. އަދި، މަސްވެރިކަމާ ބެހޭ ކޮލެޖު ގާއިމު ކުރަން ފިޝަރީޒް މިނިސްޓްރީ އާއި އެމްއެންޔޫއާ ދެމެދު ސޮއިކުރީ މިދިޔަ އަހަރުގެ ޑިސެމްބަރު މަހުގެ 27 ވަނަ ދުވަހު އެވެ.