ތުރުކީ ވިލާތުގެ ކަނޑުގެ އަސްކަރިއްޔާގެ މަނަވަރެއް ރާއްޖެ އަތުވެއްޖެ އެވެ.
ރާއްޖެ އައިސްފައިވަނީ، ތުރުކީ ކޯސްޓްގާޑުގެ މަނަވަރެއްކަމުގައިވާ ކިނާލިއާޑާ އެވެ. އެ މަނަވަރު މިހާރު ބަނދަރު ކޮށްފައި އޮތީ މާލޭގަ އެވެ. އެމަނަވަރު ރާއްޖެއަށް އައުމުން މޯލްޑިވްސް ނެޝަނަލް ޑިފެންސް ފޯރސް(ޢެމްއެންޑީއެފް) އިން ވަނީ ހޫނު މަރުހަބާއެއް ކިޔާފަ އެވެ.
އެމްއެންޑީއެފުން ބުނީ އެ މަނަވަރު ރާއްޖެ އައީ ’ގުޑްވިލް‘ ދަތުރެއްގައި ކަމަށެވެ. އަދި މިދަތުރުގެ ސަބަބުން ދެގައުމުގެ އަސްކަރީ ‘ޕާޓްނާޝިޕް’ އިތުރަށް ވަރުގަދަވެ ތުރުކީއާއި ރާއްޖެއާ ދެމެދު އޮންނަ ގުޅުން އިތުރަށް ބަދަހިވެގެންދާނެ ކަމަށެވެ. އެހެންނަމަވެސް މި މަނަވަރު ރާއްޖެ ކުރާ ދަތުރާއި ބެހޭ އެއްވެސް ތަފުސީލެއް އެމްއެންޑީއެފްއިން ހާމަކޮށްފައެއް ނުވެއެވެ.
ތުރުކީއާއި ރާއްޖެއާ ދެމެދު އަސްކަރީ ނުވަތަ ދިފާއީ އެއްބަސްވުމަކަށް އައިސްފައި ނެތްނަމަވެސް އެމްއެންޑީއެފްގެ ވައިގެ ބާރުގައި ބޭނުންކުރަމުންދަނީ ތުރުކީގައި އުފައްދާފައިވާ ޔޫއޭވީ ތަކެކެވެ. އަދި ޔޫއޭވީތައް އޮޕަރޭޓްކުރާ ސިފައިން ތަމްރީނުކޮށްފައިވަނީ ތުރުކީގެ އެހީގައެވެ.
މިމަހުގެ ކުރީކޮޅު މ. މަޑުއްވަރީން ތިން މީހުންނާއެކު ފަރުމަހަށް ނިކުމެ އުޅުނު ޑައިވިންގ ދޯނި ހޯދާފައިވަނީ ޔޫއޭވީގެ އެހީގަ އެވެ. ޔޫއޭވީ އަކީ މަސްވެރިކަމުގެ ސިނާއަތަށް ވަރަށް ބޭނުންހިފޭނެ އުޅަނދެކެވެ. މަސްވެރިންނާއި މަސްވެރި އުޅަނދުތައް ގެއްލިގެން ހޯދަން ކުރިޔަށް ގެންދާ ރެސްކިއު އޮޕަރޭޝަންތަކުގައި މި ޔޫއޭވީތައް ބޭނުންކުރާނެއެވެ.