މަސްވެރިކަމުގެ ސިނާއަތަށާއި. މަސްވެރިންނަށް ދިމާވެފައިވާ ހުރިހާ ގޮންޖެހުމެއް ހައްލުކޮށްދެއްވާނެ ކަމަށް ފިޝަރީޒް މިނިސްޓަރު އަހުމަދު ޝިޔާމް ވިދާޅުވެއްޖެއެވެ.
ރޭގެ އަހާ ފޯރަމްގައި މިނިސްޓަރު ވަނީ މަސްވެރިކަމުގެ ސިނާއަތަށް ކުރިއެރުވުމަށް ސަރުކާރުން ކުރިޔަށްގެންދަން ރާވާފަައި މަސައްކަތްތަކަށް އަލި އަޅުއްވާލާ ފައެވެ. އަދި މަސްވެރިކަމަށާއި މަސްވެރިންނަށް އެކި ގޮތްގޮތުން ކުރިމަތިވަމުން އަންނަ ގޮންޖެހުންތައް ފާހަގަކުރައްވައި، އެކަންކަން ހައްލުކުރުމަށް ކުރެވޭ މަސައްކަތުގެ އަދާހަމަ ހާމަކުރެއްވި އެވެ. އަދި އެކަންކަން ހައްލުކައްވާނެކަމުގެ ޔަގީންކަން ދެއްވި އެވެ.
”ދޭން އޮތް ޔަގީންކަމަކީ ރައީސް މުއިއްޒުގެ ޒައާމަތުގައި މަސްވެރިންނާ މަސްވެރިކަމުގެ ސިނާއަތުގައި ހުރި ހުރިހާ ގޮންޖެހުންތަކެއް ހައްލުކުރާނަން.“ މިނިސްޓަރު ވިދާޅުވިއެވެ.
މިނިސްޓަރު ވިދާޅުވީ އިންޓަނޭޝަނަލް މާކެޓްގައި މަހަށް ލިބޭ އަގު ބޮޑު ކުރެވޭނީ ސްޓޯރޭޖް ކެޕޭސިޓީއާއި ޕްރޮސެސިން ކެޕޭސިޓީ އިތުރުކޮށްގެން ކަމަށެވެ. އެގޮތުން، ސްޓޯރޭޖް އިތުރުކުރުމަށް މިހާރު ކުރަމުންދާ މަސައްކަތާއި ކުރަން ރާވާފައިވާ މަސައްކަތްތައް ފުރަތަމަ ދެ އަހަރުގެ ތެރޭގައި ނިންމުމަށް މަސައްކަތް ކުރަމުންދާ ކަމަށާއި، ޕްލޭނާ އެއްގޮތަށް މަސައްކަތް ގޮސްފިނަމަ މިހާރު ހުރި 10،000 މެޓްރިކް ޓަނުގެ ސްޓޯރޭޖް މަދުވެގެން 14،000 މެޓްރިކް ޓަނަށް އިތުރުކުރެވޭނެ ކަމަށް ވިދާޅުވި އެވެ. އެހެން ވެއްޖެނަމަ 24،000 މެޓްރިކް ޓަނުގެ ކެޕޭސިޓީ މުޅި ރާއްޖޭގައި އޮންނާނެ ކަމަށް މިނިސްޓަރު ވިދާޅުވިއެވެ.
މަސް ޕްރޮސެސް ކުރުމާއި ގުޅޭގޮތުން މިނިސްޓަރު ވިދާޅުވީ، ފެލިވަރާއި ހޮރައިޒަން އެއްކޮށްލުމުން ވޯކިން ކެޕޭސިޓީ 110 ނުވަތަ 120 އަށް އަރާކަމަށެވެ. ރާއްޖެއިން ބޭރަށް ފޮނުވާ ހުރިހާ މަހަކީ ޕްރޮސެސްކުރެވިގެން ނުވަތަ ވެލިއު އެޑް ކޮށްގެން ބޭރުކުރާ މަސްކަމުގައި ހެދުމަށް ރައީސް ބޭނުންފުޅުވާކަމަށާއި، ސަރުކާރުން މިހާރު ހިފާފައިވާ އަމާޒަށް ވާސިލުވެއްޖެނަމަ މަސް އެކްސްޕޯޓްކޮށްގެން ލިބޭ އާމްދަނީ ދެގުނަ އިތުރުވެގެންދާނެކަމަށް ވިދާޅުވި އެވެ.
މަސްވެރިންނާއި ބެހޭގޮތުން މިނިސްޓަރު ވިދާޅުވީ، މަސްވެރިންނާއި ވަރަށް ގާތުން މަސައްކަތްކުރެއްވުމަށް ރައީސް ބޭނންފުޅުވާކަމަށެވެ. އެގޮތުން، ރައީސް ޑރ.މުއިއްޒުގެ ވައުދުފުޅާއިއެއްގޮތަށް މަސްވެރިންގެ ދަފްތަރު އެކުލަވާލަން ފަށާފައިވާނެ ކަމަށް ޝިޔާމް ވިދާޅުވިއެވެ. އަދި ވީހާ ވެސް އަވަހަކަށް ދަފްތަރު ފުރިހަމަކުރުމަށްޓަކައި ކައުންސިލްތަކާއި މަސްވެރިންނާ އޮޑިވެރިންގެ އެހީތެރިކަން ވަރަށް ބޮޑަށް ބޭނުންވާ ކަމަށް މިނިސްޓަރ ވިދާޅުވި އެވެ. އަދި މަސްވެރިންނަށް އައިސް ލިބުމުގައިހުރި ދަތިކަން ހައްލުކުރުމަށް ސަރުކާރުން ކުރިޔަށްގެންދާ މަޝްރޫއުތަކުގެ މައްޗަށްވެސް އަލިއަޅުއްވާލާފަ އެވެ.