މަސްވެރިން މިފްކޯއަށް މިހާތަނަށް ކިރާފައިވާ މަހަށްވާ ފައިސާ މިމަހުގެ މުސާރައިގެ ކަންތައް ނުވަތަ މަސްނިމުމަށްފަހު ދޫކުރަން ފަށާނެކަމަށް ފިޝަރީޒް މިނިސްޓަރު ވިދާޅުވެއްޖެއެވެ.
މިހާރު ކުރިޔަށްދާ އަހާ ފޯރަމްގައި ވީޑިއޯ މެސެޖެއް މެދުވެރިކޮށް މީހަކު ކުރި ސުވާލަކަށް ޖަވާބުދެއްވަމުން މިނިސްޓަރު ވިދާޅުވީ، މިހާރު ހަތާވީސް މިލިއަން ރުފިޔާ މަސްވެރިންނަށް ނުދެއްކި އެބަހުރި ކަމަށެވެ. އަދި، އެ ފައިސާ ދެއްކުމުގެ މަސައްކަތް މިފްކޯއިން މިމަސްނިމުމަށް ފަހު ވީހާވެސް އަވަހަށް ފަށާނެކަމަށް މިނިސްޓަރު ވިދާޅުވި އެވެ.
”މީދެން އަބަދުވެސް އޮންނަނީ މަސްވެރިން މަސް ބާނާ އެދުވަހުން އެދުވަހަށް ފައިސާނުދޭކަމަށް ވަންޏާ، ރަނގަޅަށް މަސްބާނާ ކަމަށްވަންޏާ ބޮޑެތި އަދަދުތަކުން ހުންނާނެ. މިވަގުތު އަޅުގަނޑު ވާޙަކަ ދައްކާއިރު، ހަތާވީސް މިލިއަން ރުފިޔާ މަސްވެރިންނަށް ނުދެވި އެބައޮތް. އެހެންނަމަވެސް މީ އަޅުގަނޑުމެންނަށް ނުދެއްކޭނެ އަދަދެއް ނޫން. އިރާދަކުރެއްވިއްޔާ ހަމަ މުސާރަ މިމަހު ނިންމާފަ މިފްކޯއިން މަސްވެރިންނަށް ނުދީ ހުރި ފައިސާ ވީހާވެސް އަވަހަކަށް ދައްކާނެ“ މިނިސްޓަރު ވިދާޅުވި އެވެ.
މިނިސްޓަރު ވިދާޅުވީ ރައީސުލްޖުމްހޫރިއްޔާ ޑރ. މުހައްމަދު މުއިއްޒު ޒައާމަތާއި ހަވާލުވެވަޑައިގެންނެވިއިރު، މަސްވެރިންނަށް ނުދެވި ވަރަށް ބޮޑު އަދަދެއްގެ ފައިސާ ހުރިކަމަށެވެ. އެގޮތުން، 17 ނޮވެމްބަރުގައި ވެރިކަމާއި ހަވާލުވީއިރު 250 މިލިއަނަށްވުރެ ގިނަ ރުފިޔާ މަސްވެރިންނަށް ދައްކަން ހުރި ކަމަށެވެ.
”އެނގިވަޑައިގަންނަވާނެ އިންތިޚާބުގެ ފުރަތަމަ ބުރު، 9 ސެޕްޓެމްބަރާއި، ދެވަނަ ބުރު 30 ސެޕްޓެމްބަރާއި ދޭތެރޭގައި 16 ސެޕްޓެމްބަރުގައި މިވަނީ މަހުގެ އަގަށް ބަދަލެއް ގެނެވިފައި. މަހުގެ އަގު 17 ރުފިޔާއަށް ހުއްޓާ 16 ސެޕްޓެމްބަރުގައި މިވަނީ 25 ރުފިޔާއަށް މަހުގެ އަގު ބަދަލުކުރެވިފަ. އެބަދަލާއެކީގައި ހަގީގަތުގައި އޭގެ ފަހުން މަސްވެރިންނަށް ފައިސާ ނުދެވި އެކިއުމުލޭޓްވެފަ އޮތް އަދަދުގައި ވާޙަކަ އަޅުގަނޑު މިދެންނެވީ.“ މިނިސްޓަރ ވިދާޅުވި އެވެ.
މިނިސްޓަރު ވިދާޅުވީ މަސްވެރިންގެ ”ބެކްލޮގް“ އައީ ސަރުކާރަށް ވަރަށް އުދަނގޫ ހާލަތެއްގައި ކަމަށެވެ. އަދި މާލީ ހާލަތު އޮތްގޮތުންނާއެކީގައި ކުއްލިޔަކަށް އެފައިސާ ދައްކަން އުދަނގޫތަކެއް ހުރިކަމަށެވެ. އަދި 17 ނޮވެންބަރުން ފެށިގެން އެކިއުމުލޭޓްވަމުން އައި ފައިސާ ސަރުކާރަށް ދެއްކޭވަރަކުން ދައްކަމުން އައިސް ”ބެކްލޮގް“ އެއްކޮށް ކްލިއަރ ކުރި ކަމަށެވެ.
”އެހެންނަމަވެސް މިދިޔަ ރޯދަމަހުގެ ކުރިޔަށް ރައީސުލްޖުމްހޫރިއްޔާ ބޭނުންފުޅުވީ މަސްވެރި އާއިލާތަކަށް ނުދެވި ހުރި ހުރިހާ ފައިސާ ދައްކާ ނިންމަން. 17 ނޮވެމްބަރުން ފެށިގެންވެސް އެކިއުމުލޭޓްވަމުން އައީ. ސަރުކާރަށް ދެއްކޭ ވަރަކުން ދައްކަމުން އައީ. ނަމަވެސް އެެބެކްލޮގް އެއްކޮށް ކްލިއަރ ކުރެވިއްޖެ ރަމަޟާންމަހުގެ ކުރިޔަށް.“ މިނިސްޓަރު ވިދާޅުވި އެވެ.
ރައީސް ވެރިކަމާއި ހަވާލުވެވަޑައިގަތްފަހުން މިހާތަނަށް 850 މިލިއަން ރުފިޔާ މަސްވެރިންނަށް ދޫކުރެވިފައިވާކަމަށްވެސް މިނިސްޓަރު މިރޭގެ ފޯރަމްގައި ވިދާޅުވި އެވެ.